اوکھا ویلا لنگھن مگروں دیس وچ معاشی استحکام آ گیا اے: وزیراعظم
کراچی: وزیراعظم عمران خان دا کہنا اے اوکھا ویلا لنگھن مگروں دیس وچ معاشی استحکام آ گیا اے۔ 2019ء معاشی استحکام دا سال سی تے 2020ترقی دا سال ہووے گا۔ کراچی وچ تقریب نال خطاب کردیاں وزیراعظم عمران خان دا کہنا سی پاکستان نوں ترقی وچ سب توں اگے لے جانا چاہنے آں، پاکستان جہڑے مقصد لئی بنیا سی جے اسیں اپنے سارے کم ایس مقصد نوں مدنظر رکھدیاں ہوئیاں کریئے تے سانوں کامیابی حاصل ہووے گی تے معاشی ترقی دے بغیر کسے وی ملک دی کامیابی ممکن نہیں اے جد کہ ریاست اپنے ماڑے طبقے دی ذمہ داری لیندی اے تے انج ای ملک توں غربت دا خاتمہ ممکن اے، چین نے اپنی پالیسیاں دے راہیں ملک توں غربت ختم کیتی۔
وزیراعظم عمران کان دا کہنا سی بزنس کمیونٹی دے دل وچ نیب دا بہت زیادہ خوف سی پر اج اسیں اک آرڈیننس دے راہیں نیب نوں تاجراں دے معاملات توں وکھرا کر دتا تے اسیں تاجر برادری لئی ہور آسانیاں پیدا کرنا چاہنے آں کیوں جے ساڈی پوری کوشش اے کہ ملک وچ ودھ توں ودھ سرمایہ کاری ہووے۔ وزیراعظم آکھیا لوک بار بار کہندے نیں پچھلیاں دی گل نہ کرو سگوں اپنی گل کرو کہ تسیں کیہ کیتا پر ایہناں نوں کہنا چاہنا آں سانوں سوئیڈن دی معیشت نہیں ملی سی، اسیں اپنی کارکردگی وی وکھاندے رہواں گے تے 2023تک تہانوں لوکاں نوں بھلن نہیں دیواں گا کہ سانوں کیویں دا پاکستان ملیا سی تاں جے لوک موازنہ کر سکن
۔ وزیراعظم عمران خان دا کہنا سی اوکھا ویلے توں لنگھن مگروں ملک وچ استحکام آ گیا اے، 2019ء معاشی استحکام دا سال سی تے 2020ترقی دا سال ہووے گا، ملک وچ روزگار دے مواقع پیدا کراں گے تے سیاحت دے شعبے وچ بہتری لیا کے نوجواناں لئی نوکریاں دے مواقع پیدا کراں گے۔
