زراعت دا ترقیاتی بجٹ 18 توں 20 ارب ہووے گا

لكهت:احسن صدیق

وزیر زراعت پنجاب سید حسین جہانیاں گردیزی نے کہیا اے کہ اللہ دے فضل نال حکومت ٹھیک چل رہی اے کیوں جے کجھ رہنما وی اعتراف کردے نیں، ایسے وجہ نال پاکستان توں سرمایہ باہر نہیں گیا تے تقریباً سال بعد پاکستان دا کرنٹ اکائونٹ سر پلس ہو گیا اے تے انج دا بہترین اکنامک مینجمنٹ پاروں ممکن ہویا اے۔ اوہناں نے ایس امر دا اظہار پچھلے دن انٹرویو وچ گل بات کردے ہوئے کیتا۔ اوہناں نے کہیا کہ پوری دنیا وچ کرونا دی وبا نے دباہی مچائی پر موجودہ حکومت نے جس طرح ایس دا مقابلہ کیتا ایس دی مثال نہیں ملدی احساس پروگرام دے ذریعے گھٹ آمدنی والے لوکاں دی مالی مدد کیتی ۔ ایس توں بچن لئی لوکاں وچ موثر انداز وچ آگاہی پھیلائی ایہہ ایس حکومت دی بوہت وڈی کامیابی اے۔ اوہناں نے کہیا کہ میں کرونا دے دوران کساناں دی جدوجہد نوں سلام پیش کرنا واں اوہناں نے فرنٹ لائن سولجر دا کردار ادا کیتا جس دے نتیجے وچ پاکستان وچ زرعی پیداوار وچ وادھا ہویا، خاص طور اُتے چاول دی ریکارڈ پیداوار حاصل ہوئی۔ اوہناں نے کہیا کہ کہن نوں تے ہر حکومت نے زراعت نوں اپنی ترجیح کہیا پر موجودہ حکومت نے پہلی وار سنجیدگی نال زراعت اُتے توجہ دتی کیوں جے وزیراعظم عمران خان نے فیصلہ کیتا کہ ہر 15 دن توں بعد زراعت دی پراگرس ریویو کراں گے۔ اوہناں نے کہیا کہ کرونا پاروں ترقیاتی بجٹ وچ کٹوتی ہوئی پر زراعت لئی ترقیاتی بجٹ سنجیدگی نال استعمال کیتا گیا اللہ دے فضل نال ڈھائی سال وچ اقتصادی کامیابیاں ملیاں، ساڈی بھرپور کوشش اے کہ آئندہ مالی سال لئی زراعت دا ترقیاتی بجٹ 18 ارب روپئے توں 20 ارب روپئے دا ہو جائے خاص طور تے سیڈ سیکٹر وچ بوہت سارے پراجیکٹس لیا رہے نیں ایس توں علاوہ ڈویلپمنٹ اُتے خاص توجہ دتی جائے گی۔ اوہناں نے کہیا کہ اللہ دا فضل رہیا تے ایس سال پنجاب وچ گندم دی کاشت دا 2 کروڑ میٹرک ٹن دا ہدف حاصل کر لاں گے۔ ہن تیکر فصل بوہت چنگی ہوئی اے اگرچے بارشاں نہیں ہوئیاں پر تربیلا دی میکینس پاروں نہراں بند نہیں ہوئیاں تے گندم دی فصل نوں پانی مل گیا۔ اوہناں نے کہیا کہ ایس سال پنجاب وچ 16.6 ملین ایکڑ زائد رقبے اُتے گندم دی کاشت ہوئی اے پچھلے سال 16 ملین ایکڑ اُتے گندم دی کاشت ہوئی سی۔ ایس سال پنجاب وچ گندم دی کاشت دا ہدف 2 کروڑ میٹرک ٹن اے جد کہ پچھلے سال پنجاب وچ 180 کروڑ میٹرک ٹن گندم پیدا ہوئی سی۔ اوہناں نے کہیا کہ ایس سال ملک وچ گندم دی پرائس دے حوالے نال انٹرنیشنل پرائس دا ایشو آئے گا۔ پاکستان وچ گندم دی قیمت تے انٹرنیشنل قیمت وچ فرق ہوئیگا۔ ایس دے علاوہ افغان ٹرانزٹ ٹریڈ دے تحت کئی شیواں پاکستان وچ آندیاں نیں تے کئی شیواں پاکستان توں باہر چلیاں جاندیاں نیں۔ اوہناں نے کہیا کہ جس طرح زراعت پاکستان دی ریڑھ دی ہڈی اے ایسے طرح کپاس دی فصل زراعت دی ریڑھ دی ہڈی اے ساڈا ملک کپاس دی فصل نوں نظر انداز کرن دا متحمل نہیں ہو سکدا۔ کیوں جے ان وی کپاس تے ایس دی مصنوعات دی برآمد ساڈی کل برآمد دا 50 فیصد اے تے ایس وچ بوہت زیادہ ویلیو اڈیشن کیتی جا سکدی اے پر افسوس کہ ماضی دی ناقص پالیسیاں دے نتیجے وچ کپاس دی پیداوار بری طرح متاثر ہوئی ہن اسیں کپاس دی پیداوار ودھان لئی اک مربوط پروگرام شروع کر رہے آں تے میں آپ کپاس دی پیداوار ودھان لئی ہفتہ وار میٹنگز دا آغاز کر دتا اے۔ ایس ورہے ملک وچ مجموعی طور اُتے 60 لکھ کپاس دی گانتھاں ہوئیاں جد کہ بھارت وچ کپاس دی پیداوار 4 کروڑ گانٹھاں اُتے چلیاں گئیاں میں پاکستان وچ کپاس دی پیداوار ودھان لئی بھرپور اقدام کر رہیا واں اوہناں نے کہیا کہ سی پیک دا سیکنڈ فیز شروع ہو رہیا اے ایس وچ کوشش کراں گے کہ چین دے اشتراک نال زراعت لئی متعدد پراجیکٹس شروع کیتے جان۔
اوہناں نے کہیا کہ پنجاب وچ زرعی پیداوارن ودھان لئی اسیں تجرباتی طور اُتے منصوبے شروع کر رہے آں۔ کوشش اے کہ ایہہ منصوبہ آئندہ مالی سال دے ترقیاتی بجٹ وچ شامل ہو جائے۔ ایسے طرح پنجاب دے سارے کساناں دا ڈیٹا بیس بنا رہے آں تے ایہناں نوں کسان کارڈ متعارف کراواں گے تاں جے اوہ فصلاں دی کاشت لئی بینکاں وچ دھکے نہ کھاندا پھرے۔ اوہناں نے کہیا کہ کھاد تے زرعی دوائیاں وچ ملاوٹ روکن لئی قانون نوں مزید سخت کیتا جائے گا۔ اوہناں نے کہیا کہ پنجاب سیڈ کارپوریشن دی تنظیم نو کیتی جا رہی اے تے بیج دی افزائش لئی مزید کجھ محکمیاں توں زرعی اراضی لے کے پنجاب سیڈ کارپوریشن نوں دتی جا رہی اے۔ پنجاب وچ کساناں لئی بلاسود قرضیاں دا حجم 5 ارب روپئے توں ودھا کے 10 ارب روپئے کرن دی بھرپور کوشش کراں گے۔