کیہ ایہ صدارتی نظام لئی رچایا گیا ڈرامہ سی؟
لكهت:مطلوب وڑائچ
پاکستان دی سیاست یک رنگی نہیں ہمہ رنگی اے تے اسرار و رموز دے پردیاں وچ وی لپٹی ہوئی اے۔ سامنے کجھ ہو رہیا ہوندا اے پس منظر وچ کجھ ہور چل رہیا ہوندا اے۔ پس پردہ چلن والیاں کہانیاں کدی ہوش گم کر دیندیاں نیں۔ اندر کیہ ہو رہیا ہوندا اے باہر کیہ دسیا جاندا اے۔ ایہدے وچ کدی تے زمین اسمان دافرق ہوندا اے کدی حریفاں وچکار طے ہون والے معاملات مدتاں بعد سامنے آئوندے نیں تے کدی خفیہ ای رہندے نیں۔
وزیراعظم عمران خان نے قومی اسمبلی توں اعتماد دا ووٹ حاصل کر لیا۔ 2018ء وچ عمران خان نوں 176 جد کہ ہن اوہناں نوں 178 ووٹ ملے۔ فیصل واوڈا قومی اسمبلی وچ سینٹ دا ووٹ کاسٹ کر کے مستعفی ہو گئے سن۔ سپیکر دا ووٹ وی عمران خان نوں ای پینا سی ایس طرح اج حکومت تے اوہدے اتحادیاں دی طاقت 180 اے۔ جے ایہ کہیا جاوے کہ کل تک دی ساری ایکسرسائز اک طے شدہ حکمت عملی دے تحت ہوئی تے کئی لوک ایہدے تے شاید متفق نہ ہون پر ثبوتاں نوں جھٹلایا نہیں جا سکدا۔ کجھ لوکاں نوں غلط فہمی یاں خوش گمانی اے کہ اسٹیبلشمنٹ حکومت دی مدد توں دستبردار ہو گئی ایہ تے خام خیالی اے۔ حکومت تے مقتدر حلقے اک پیج تے سن تے ہے نیں۔ مسلم لیگ (ن) دے بیانیے نوں ذرا ذہن وچ لیائو تے فوج دے خلاف الزام‘ دشنام تے بہتان لائے گئے۔ جہدی بالکل وی پذیرائی نہ ہوئی ن لیگ دے ایس عمل سگوں احمقانہ بیانیے نے حکومت تے فوج نوں ہور نیڑے کر دتا۔ ہن ذرا پیپلزپارٹی دے بیانیے دی گل کریئے تے اوہ حکومت دے ڈاڈھے خلاف جد کہ اسٹیبلشمنٹ دی حمایت وچ اے۔ جدوں ن لیگ اسٹیبلشمنٹ دے حق وچ گل کرکے نوازشریف نوں جیلوں ہسپتال تے ہسپتالوں لندن لے گئی سی اوتھے جا کے میاں صاحب نے اشتہاری ہون توں بچن لئی فیر اوہناں تے زور دتا تے دال نہ گلن تے اوہناں تے ہتھ پا دتا جہناں نے سیاست وچ میاں صاحب نوں داخل کرکے اوہناں دے اتالیق دے فرائض نبھائے سن۔
ہن ذرا سینٹ دے قومی اسمبلی وچ ہون والے الیکشن دی گل کریئے تے اوتھوں پی پی پی دے امیدوار نوں 164 ووٹ ملے تحریک انصاف دی خاتون امیدوار نوں 174 ووٹ ملے۔ جتھوں پیپلزپارٹی تے تحریک انصاف نے اک اک سیٹ جت لئی جد کہ تحریک انصاف دی خاتون امیدوار دے مقابلے وچ مسلم لیگ (ن) دی امیدوار ہار گئی۔ عبدالحفیظ شیخ نوں یوسف رضا گیلانی نے ہرایا۔ ایہ وی طے شدہ پلاننگ سی جہدا مقصد وزیراعظم لئی اعتماد دا ووٹ حاصل کرن دا جواز پیدا کرنا سی جو اوہناں نے حاصل کر لیا۔ ایس سارے عمل وچ مسلم لیگ (ن) ہاری ای نہیں چارے شانے چت ہوئی اے۔ اسٹیبلشمنٹ حکومت تے پیپلزپارٹی اک پیج تے سن ہے نیں۔ ہتھ جے ہویا اے تے مسلم لیگ ن دے نال ہویا اے۔
دوستو! محترم مریم نوازشریف صاحبہ بھاویں جنی وڈی سیاسی بساط تے اکلے کھیڈن دا دعویٰ کرے پر ایہ حقیقت اے کہ میاں نوازشریف دے بناں اوہ اپنے آل دوالے دے ساتھیاں تے اکھ بند کرکے اعتبار نہیں کر سکدیاں۔ کیہ ایہ وی کھیڈ دا حصہ نہیں سی کہ سینٹ دے الیکشن توں صرف تن دیہاڑ پہلاں حمزہ شہباز دی ضمانت تے رہائی تے میاں شہبازشریف نوں قومی اسمبلی دے اجلاس تے یوسف رضا گیلانی نوں ووٹ دین لئی پروڈکشن آرڈر تے چھڈیا گیا۔
جے پی ڈی ایم دی گل کیتی جاوے تے اوہ یوسف رضا گیلانی دی جت تے جس طرح ہوا وچ اڈ رہی سی اوہ وزیراعظم عمران خان دے اعتماد دے ووٹ دے حصول دے موقعے تے منتشر نظر آئی جہناں دے نال ہتھ ہویا پارلیمنٹ دے باہر‘ اوتھے اپڑے تے دھینگا مشتی دا حصہ بن گئے۔ اک پارٹی دے لیڈراں دا دوجی پارٹی دے کارکناں دا کدی وی آمنا سامنا نہیں ہویا پر ایہ تماشا وی ڈی چوک وچ لگا تے دنیا نے ویکھیا۔ جتھے صرف ن لیگ دے لیڈر آئے۔ پی پی اک پیج تے ہون دا حق ادا کردی رہی۔ ایس سارے منظرنامے دا مقصد ملک وچ صدارتی نظام لئی راہ پدھری کرنا اے جو بڑی حد تک ہو گئی اے۔ سینٹ وچ پی ٹی آئی سب توں وڈی جماعت اے جتھے اوہنے اپنا چیئرمین منتخب کرا لیا اے پیپلزپارٹی دا چیئرمین بالفرض آ جاندا تے اوہ وی صدارتی نظام لئی اپنا کردار ادا کردا نظر آئوندا۔ ایس سارے منظرنامے وچ مسلم لیگ (ن) راندہ درگاہ نظر آئوندی اے۔
دوستو! چیئرمین سینٹ دے الیکشن ہو گئے پی ٹی آئی جت وی گئی ہن پاکستان دی سیاست وچ کجھ اہم کم سٹپ بائی سٹپ انجام پان گے۔ چیئرمین سینٹ دا انتخاب جتن مگروں پی ٹی آئی قومی اسمبلی توں اگلا بجٹ آسانی نال منظور کروان وچ کامیاب ہو جاوے گی۔ ایس ورھے اکتوبر تک ملک وچ صدارتی نظام لئی مطلوبہ ترمیم منظور کروا لئی جاوے گی جہدے نال اسٹیبلشمنٹ تے پی ٹی آئی دے سانجھے مفادات نوں تقویت ملے گی۔٭٭
