سارے سرکاری اداریاں دیاں تنخواہواں برابر کیتیاں جان: چیف جسٹس

اسلام آباد: چیف جسٹس گلزار احمد نے وزارت خزانہ دے ملازماں دے الاؤنس دے کیس دی سنوائی دے دوران سرکاری اداریاں وچ غیر مساوی تنخواہواں تے سوال کردیاں آبزرویشن دتی اے کہ حکومت دے سارے اداریاں دی تنخواہ برابر کیتی جاوے۔ چیف جسٹس گلزار احمد دی سربراہی وچ دو رکنی بنچ نے کیس دی سنوائی کیتی، ایس موقع تے ڈپٹی اٹارنی جنرل نے مقدمے دی تیاری لئی التوا دی استدعا کیتی جہدے تے ایہناں دی سخت سرزنش کیتی گئی، چیف جسٹس آکھیا ڈپٹی اٹارنی جنرل صاحب تسیں ججاں تے ظلم کیتا، ججز کیس دی فائل پڑھ کے آندے نیں، تسیں لاء افسر کیویں بن گئے، کیہ تہانوں نوکری تے رکھیا جا سکدا اے، عدالت نوں ہلکا نہیں لوو، اسیں التوا لئی نہیں بیٹھے۔

چیف جسٹس نے ڈپٹی اٹارنی جنرل توں آکھیا تسیں دسو ریونیو ڈویژن نوں 100فیصد، آڈٹ تے اکاؤنٹ نوں 20فیصد الاؤنس کہڑے قنون دے تحت دتا گیا۔ ایہ وی دسیا جاوے کہ فنانس، اکنامک تے ریونیو ڈویژن وچ کیہ فرق اے؟ ڈپٹی اٹارنی جنرل نے دسیا ریونیو ڈویژن دی ورکنگ دوجیاں ڈویژناں توں وکھرا اے۔

چیف جسٹس آکھیا ایتھے ایہ حال اے کہ ہر سرکاری ادارے دی تنخواہ دوجے ادارے توں وکھری اے، ایہ فرق کیوں رکھیا گیا اے، سارے سرکاری اداریاں دی تنخواہ اک کر دیو۔ عدالت نے ڈپٹی اٹارنی جنرل نوں مقدمے دی تیاری لئی ویلا دیندیاں ہوئیاں سنوائی موسم سرما دیاں چھٹیاں دے اختتام تک ملتوی کر دتی۔