‘‘سوشل میڈیا تے حافظ قرآن داقتل’’

کپتان جی !سوشل میڈیا دے بے ہنگم استعمال دی روک تھام لئی قانون سازی کرنا تے کرانا وی تہاڈا فرض اے

تحریر: اکرم عامر سرگودھا

1990ء توں پچھے ویکھیے تے ملک وچ پیغام رسانی دا سب توں واحد ذریعہ ڈاک تے دوجے نمبر اُتے پی ٹی سی ایل فون سی، لوک اپنے عزیز و اقارب دا احوال جانن تے خوش غمی دے پیغام لئی اک دوجے نوں خط لکھیا کردے سن، ایس لئی محکمہ ڈاکخانہ جات وی سی تے ڈاکیے وی، جیہڑے ہن وی موجود نیں، ماضی وچ ڈاک دا ایہہ ادارہ انتہائی منافع بخش سی جد کہ ہن حکومت اُتے بوجھ بنیا ہویا اے ایس دور وچ ٹیلیفون (پی ٹی سی ایل) دا استعمال زیادہ تر وڈے کاروباری مراکز وچ ہوندا سی، دکاناں تے گھراں وچ خال خال ایہہ سہولت موجود سی، جوں جوں زمانہ ترقی کردا گیا تے ٹیلی مواصلات دے نظام وچ وی جدت آندی گئی فیر کارڈلیس فون آیا جیہڑا پی ٹی سی ایل توں لنک کر کے سنیا تے استعمال کیتا جا سکدا سی۔ لوک ایہنوں جدید ذریعہ مواصلات قرار دے رہے سن کہ 1989-90ء وچ موبائل فون آ گیا جس دا استعمال پاکستان سنے پوری دنیا وچ کثر ت دے نال ہون لگیا تے موبائل فون دے ذریعے سوشل میڈیا وی وجود وچ آگیا،آئے دن سوشل میڈیا دی نویں نویں ایپس، فیس بک، وٹس ایپ، سکائپ تے دیگر منظر عام اُتے آن لگیاں تے بدستور آ رہیاں نیں، ملک وچ فیس بک دا استعمال 2004 دے ابتدا وچ ہویا جد کہ ٹوئٹر دا استعمال 2006 وچ شروع ہویا، فروری 2009 وچ وٹس ایپ نے پاکستان وچ پیر رکھیا، ویکھدے ای ویکھدے نجانے کنہی ایپس متعارف ہوئیاں تے پاکستان سنے پوری دنیا دی عوام نوں ایہناں ایپس نے اپنے پاسے راغب کر کے اپنے سحر وچ جکڑ لیا، دوجے ملکاں دی نسبت پاکستان وچ خواتین تے بالاں وچ سوشل میڈیا تے ٹیلیفون دا تشویشناک حد تیکر ودھ چکیا اے جس دے معاشرے اُتے جتھے بوہت سارے منفی اثرات ویکھن وچ آ رہے نیں اوتھے موبائل فون تے سوشل میڈیا دے فائدے وی نیں، بہرحال ہن معاشرے لئی ایہہ آئینہ اے جس دے اندر طرح طرح دا مواد سوشل میڈیا یوزر نوں ملدا اے، موبائل فون تے سوشل میڈیا نے پوری دنیا دے فاصلے سمیٹ کے رکھ دتے نیں، ایس طرح خط و کتابت قصہ ماضی بن چکیا اے تے پی ٹی سی ایل فون ہن خال خال تھاواں اُتے ویکھن نوں ملدا اے، ارباں روپئے دا کاروبار وی موبائل فون دے ذریعے ہو رہیا اے پر ساڈی اکثریتی لاشعوری قوم سوشل میڈیا تے موبائل فون دا غلط استعمال کر رہی اے۔ راقم نے پچھلے دن موبائل فون اُتے وٹس ایپ آن کیتا تے دل دہلا دین والی خبر پڑھن نوں ملی کہ منڈی بہائوالدین وچ مدرسہ دے معلم نے اپنے 16 سالہ حافظ قرآن شاگرد دا تیز دھار آلے نال سر تن نال جدا کر کے ایہنوں قتل کر دتا اے جس دی مزید تفصیل کجھ انج ساہمنے آئی کہ منڈی بہاوالدین دے پنڈ ساہنا دے رہائشی حنیف حسین دا 16 سالہ پتر محمد فیضان جیہڑا کہ محلہ شفقت آباد وچ مدرسہ دا طالبعلم سی 5 مارچ نوں اوہ شام دے ویلے اپنا جیب خرچ چلان لئی محلہ لالہ زار وچ ٹیوشن پڑھان گیا تے غائب ہو گیا۔ 16 سالہ حافظ قرآن پتر دے لاپتہ ہون اُتے والدین اُتے تے جویں قیامت گزر گئی تے خاندان اُتے سکتہ طاری ہو گیا، والد حنیف نے ہمت کر کے نامعلوم اغوا کار دے خلاف مقدمہ درج کر لیا تے پولیس نے مدرسہ دے معلم مغوی دے استاد مولوی شہزاد مزمل نوں شامل تفتیش کیتا تے ہوشیار شہزاد مزمل نے پولیس نوں کوئی روز نہ دتا تے پولیس نے روایتی تفتیش کیتی تے شہزاد مزمل نے ابتدائی طور اُتے انکشاف کیتا کہ مغوی فیضان زیادہ ویلا موبائل اُتے گھنٹیاں کسے نال گل بات کردا تے وٹس ایپ اُتے چیٹ کردا رہندا سی، جس اُتے مغوی دا موبائل ڈیٹا حاصل کیتا گیاتے ایس دی کڑیاں مولوی شہزاد مزمل دی سالی نال جا ملیاں تے عندیہ کھلیا کہ 16 سالہ حافظ قرآن محمد فیضان دے مولوی شہزاد مزمل دی سالی دے نال مراسم سن تے ایس رنج دی بنا اُتے مولوی شہزاد مزمل نے محمد فیضان نوں وقوعہ دے دن اپنے گھر بلایا تے ایس دیاں اکھاں بند کر کے ایہنوں تیز دھار آلے نال ایس دی دھون لاہ دتی۔ بعد وچ لاش بوری وچ پا کے ریلوے لائن تے دھون کھٹیالہ سیداں دے نیڑے گندے نالے وچ سٹ دتی، ایس طرح مولوی مزمل شہزاد نے 16 سالہ حافظ قرآن طالبعلم دے قتل دا اعتراف کر لیا تے قتل دا پس منظر مزید کجھ انج دسیا کہ محمد فیضان ایس دا قابل اعتماد شاگرد سی، جنہوں اوہ سامان دے کے گھر بھجواندا سی کہ ایس نے ملزم دی سالی دے نال تعلقات قائم کر لئے تے کئی کئی گھنٹے ایس نال فون اُتے گلاں تے سوشل میڈیا چیٹ کردا رہندا سی، سالی نال تعلقات دا انتقام لین لئی مولوی مزمل نے اپنے ای شاگرد نوں انتہائی سفاکانہ طریقے نال قتل کیتا جس دے اثرات ہن وی علاقے وچ خوف دی صورت وچ موجود نیں، حالانکہ پولیس نے ملزم نوں گرفتار تے آلہ قتل برآمد کر لیا اے، مولوی شہزاد مزمل دی بیان کردہ کہانی وچ کتھوں تیکر سچائی اے ایہہ تے اللہ پاک دی ذات ای جان دی اے پر ایس طرح والدین دا لخت جگر تے لاڈلا موت دی وادی وچ چلا گیا اے۔ مقتول بچے دا پورا خاندان افسردہ تے علاقے وچ سوگ دی فضا اے واقعے اُتے لوک مختلف رائے دے رہے نیں، چونکہ ہن ایس کیس دا چالان عدالت وچ جائے گا تے سزا جزا دا تعین وی عدالت کرے گی پر قتل دے ایس بھیانک واقعے نال پوری قوم نوں سوچنا ہوئے گا کہ ایہناں دے بچے سوشل میڈیا تے موبائل فون دے ذریعے کیہ کر رہے نیں؟ نہیں تے آن والے ویلے وچ ایس طرح دے بھیانک واقعیاں وچ مزید وادھا ویکھن وچ آئے گا۔ تے آئے دن محمد فیضان جہے بالاں دیاں لاشاں مختلف علاقیاں توں ملدیاں رہن گیاں تے ایہناں دی روک تھام فیر نہ عوام دے بس وچ ہوئے گی تے نہ حکومت دے؟
سو گل کتھوں کتھے نکل گئی گل ہو رہی سی سوشل میڈیا تے ایس دے نقصان دی تے کپتان جی جس ریاست وچ کوئی جانور وی بھُکا مر جائے تے ایس دا حساب حاکم وقت نے دینا ہوندا اے تسیں ملک نوں ریاست مدینہ بنان دے دعویدار او، سوشل میڈیا دے بے لگام گھوڑے نوں لگام دینا تہاڈی ذمہ داری اے، سوشل میڈیا دے بے ہنگم استعمال دی روک تھام لئی قانون سازی کرنا تے کرانا وی تہاڈا فرض اے۔ نیز ایہہ کہ حافظ قرآن محمد فیضان دا بہیمانہ قتل ریاست مدینہ دے صوبہ پنجاب دے شہر منڈی بہاوالدین وچ ہویا اے، تسیں حاکم وقت او، محمد فیضان دے قاتل نوں منطقی انجام تیکر اپڑانا تہاڈے فرائض منصبی وچ شامل اے تے تسیں وزیراعلیٰ پنجاب عثمان بزدار نوں حکم دیو کہ اوہ آئی جی پنجاب دی وساطت نال مقدمے دا چالان انج دا مرتب کروائے جس وچ کوئی قانونی سقم باقی نہ ہوئے، نیز ایہہ کہ ملزم نوں منطقی انجام تیکر اپڑان لئی سرکاری سطح اُتے پراسکیوشن ٹیم تشکیل دتی جائے جیہڑی عدالت وچ مقدمہ دی پیروی کرے، کیوں جے ہو سکدا اے کہ مقتول محمد فیضان دے والدین اینی سکت نہ رکھدے ہون کہ مقدمے دی پیروی لئی کوئی وکیل کر سکن، کپتان جی، اودوں بنے گا ریاست مدینہ؟ جے انج نہ کیتا گیاتے قاتل بچ گیا تے ایس دا حساب آخرت وچ قاتل دے نال تہانوں وی دینا ہوئے گا؟