عوام لئی آواز اُچی کرن والیاں دی آواز بند کر دتی جاندی اے: آصف زرداری

کراچی: سابق صدر آصف زرداری دا کہنا اے کسے نوں احساس نہیں کہ غریب دے نال کیہ ہو رہیا اے، جد کہ عوام لئی آواز بلند کرن والیاں دی آواز بند کر دتی جاندی اے۔ اپنے ویڈیو پیغام وچ سابق صدر آصف زرداری دا کہنا سی سرکار کساناں تے مزدوراں دے نال ناانصافی کر رہی اے، لوکاں نوں دو ویلے دی روٹی لئی مجبور کر دتا گیا اے، کسے نوں احساس نہیں کہ غریب دے نال کیہ ہو رہیا اے، اوہناں نوں پتہ نہیں کہ مہنگائی کیہ ہوندی اے، عوام دی آواز چُکن والیاں دی وی آواز بند کیتی جاندی اے ایس طرح ملک نہیں چل سکدا۔

آصف زرداری دا کہنا سی جتھے بلاول کھلوتا اے ایہ اوہی تھاں اے جتھے آمراں دے دور وچ ذوالفقار بھٹو تے بے نظیر بھٹو نوں شہید کیتا گیا، دوواں آمراں دے نال قدرت نے کیہ سلوک کیتا؟ سلیکٹرز نال ملک نہیں چل سکدا ہن بلاول بھٹو ساریاں مشکلاں نوں پار کردا ہویا اگے نکلے گا، اسیں بڑی جلدی عوام دی حکومت لیاواں گے تے عوام دیاں مشکلاں آسان کراں گے، پہلاں وی عوام دی خدمت کیتی تے اج وی ایسے سوچ دے مالک آں۔