پنجاب دی جمہوری روایات تے چوہدری برادران

لكهت:اشرف شریف

بلاول بھٹو زرداری پنجاب وچ اپنیاں سٹ سیٹاں دے نال حکومت دا تختہ الٹن آئے نیں۔ اوہناں دی اتالیق کہندیاں نیں جمہوریت ڈیمانڈ دا ناں اے۔ اک زعم اے شاید جو حفیظ شیخ دے مقابل یوسف رضا گیلانی دی جت نے پیدا کر دتا اے۔ سوچیا جا رہیا اے کہ تحریک انصاف اپنے کارکناں دی حمایت کھو بیٹھی اے اتحادی رِنج نیں اپنے اراکین اسمبلی ناخوش نیں ایس لئی تبدیلی لیائی جا سکدی اے کوئی چاہے تے سینٹ اپ سیٹ دا کریڈٹ آصف زرداری یاں مریم نواز نوں دے سکدا اے۔ سانوں ایہدے تے کوئی اعتراض نہیں سانوں ایہدے نال غرض نہیں کہ اجہے کریڈٹ آصف علی زرداری نوں بھاری ثابت کرن لئی کتھوں جاری ہوندے نیں۔ اساں تے ایہ ویکھنا اے کہ ست سیٹاں والی پیپلزپارٹی پنجاب حکومت بدلن لئی کیہ پی ڈی ایم دیاں دوجیاں جماعتاں دی قائد بنے گی۔ پنجاب حکومت دا تختہ الٹن لئی جے کسے جماعت دے کول سب توں ودھ اراکین نیں تے اوہ مسلم لیگ ن اے۔ مسلم لیگ ن دے رہنما حمزہ شہباز تقریباً ڈیڑھ ورھے نیب دی حراست وچ رہ کے ضمانت تے رہا ہوئے نیں۔ اوہناں دے والد شہبازشریف اجے جیل چوں باہر نہیں آنا چاہندے۔ اوہناں دا خیال اے کہ پارٹی دے مستقبل دا تعین کرن والیاں قوتاں نوں جے اوہناں توں علاوہ کسے نال گل کرن وچ دلچسپی ہے تے اوہ اپنا شوق پورا کر لین۔
مسلم لیگ ن نوں مطلوبہ اکثریت حاصل کرن لئی پیپلزپارٹی توں علاوہ تن ووٹ وادھو مل سکدے نیں پر ایہدے توں ودھ ووٹاں دی کمی پوری کرن لئی پی ٹی آئی دے اراکین دی حمایت چاہیدی ہووے گی۔ دوجی صورت وچ مسلم لیگ قائداعظم نوں تعاون تے تیار کرنا ہووے گا۔ مسلم لیگ ق پنجاب وچ اک اہم سیاسی حقیقت بن کے ابھر رہی اے۔ ق لیگ دی قیادت چوہدری شجاعت تے چوہدری پرویزالٰہی کردے نیں۔ دوہاں بھراواں دی ایہ خوبی اے کہ رابطہ ساریاں نال رہندا اے شادی مرگ تے کسے نوں اکلا نہیں رہن دیندے پر اپنی سیاسی حکمت عملی تے سمجھوتہ نہیں کردے۔ سماجی رکھ رکھائو تے رابطے بحال رکھنا پنجابی ثقافت دا عکس تے اک جمہوری ماڈل اے۔ پنجاب سیاسی لحاظ نال ایس ویلے سارے صوبیاں وچ سب توں ودھ سنجیدگی دا مظاہرہ کر رہیا اے۔ تن ہفتے پہلاں پنجاب اسمبلی نے جس پرامن طریقے نال متناسب نمائندگی دا اصول سامنے رکھ کے سینٹ دے 11 اراکین دا انتخاب کیتا اوہدے توں باقی صوبے محروم رہے سگوں انج کہیا جاوے تے غلط نہیں ہووے گا کہ حکومت تے اپوزیشن نے جس شکل وچ اپنے اختلافات نوں جمہوریت دے سامنے سرنڈر کر دتا اوہ سلاہن جوگ اے۔
وزیراعلیٰ عثمان بزدار تے اپوزیشن رہنماواں دا کردار یقینا قابل داد ہووے گا پر اوہ مرکز جو سیاسی رواداری نوں پھیلا رہیا اے سپیکر چوہدری پرویزالٰہی دی کرسی اے۔ اک توازن اے جو سانوں یاد دواندا اے کہ جمہوریت وچ ساریاں نوں اپنی حدود وچ رہ کے کیویں کم کرنا اے۔ سیاسی دانشمند چوہدری برادران دے کول بلاول دے اوس احسان جتلان دا جواب سی کہ آصف زرداری نے اوہناں نوں ڈپٹی وزیراعظم دا عہدہ دتا۔ اوہناں نے ایہو کہن تے اکتفا کیتا کہ آصف زرداری نال اوہناں دے چنگے تعلقات رہے نیں۔ بلاول نے چوہدری پرویزالٰہی نال سانجھی پریس ٹاک دا ارادہ کیتا تے چوہدری پرویزالٰہی نے پہلے ای میڈیا دے نمائندیاں نوں دس دتا کہ اسیں جناب بلاول بھٹو نوں دس دتا اے کہ تحریک انصاف دا ساتھ دیاں گے۔ چوہدری برادران دی دانشمندی نے پنجاب نوں انتشاری سیاست توں بچا لیا اے۔ اٹھارویں صدی وچ مریضاں دی دھڑکن سنن لئی ڈاکٹر عجیب و غریب طریقہ اختیار کردے۔ مریضاں نوں بالائی لباس لاہن نوں کہیا جاندا تے ڈاکٹر مریض دے سینے تے کن رکھ دیندا۔ خواتین مریضاں بارے ایہ طریقہ بڑا معیوب ہوندا پر متبادل نہ ہون پاروں خواتین نوں ایہ بے پردگی برداشت کرنی پیندی۔ فیر پیرس وچ رہن والے مشہور معالج ڈاکٹر Rene Laenne نے عورتاں نوں ایس شرمندگی توں بچان تے غور شروع کیتا۔ ڈاکٹر رینے نے کاغذ دا اک ٹکڑا رول دی شکل وچ لھویٹیا تے معائنہ لئی آن والی خاتون دے سینے تے رکھ دتا۔ اوہنوں دل دی دھڑکن صاف سنائی دتی۔ ڈاکٹر رینے نے تجربہ جاری رکھیا تے 1816ء وچ دستی سلنڈر نما اک آلہ ب نان وچ کامیاب ہو گیا۔ اوہنے اپنی ایجاد دا ناں سٹیتھوسکوپ رکھیا۔ 1826ء وچ ڈاکٹر رینے دا انتقال ہو گیا۔ سٹیتھو سکوپ دی مدد نال اوہدے بھتریئے نے پتہ چلایا کہ رینے نوں ٹی بی دا مرض سی ایس کارآمد آلے دی شکل اج بدل چکی اے۔ بہت سارے جائزیاں توں پتہ گا کہ ڈاکٹر کول سٹیتھو سکوپ ہووے تے مریض زیادہ اطمینان محسوس کردا اے۔
ڈاکٹراں دے روزمرہ کم وچ زیادہ تر اجہے مریض آئوندے نیں جہناں نال بالمشافہ ملیا جاندا اے۔ کئی واری مریض کمپیوٹر سکرین تے نمودار ہوندا اے کئی اجہی ویب سائٹس بن چکیاں نیں جو طبی مشورہ دیندیاں نیں پاکستان وچ اک مشہور لیبارٹری نے آن لائن ڈاکٹراں دی سہولت دے رکھی اے۔ صحت دی خدمات وچ سب توں اہم گل ایہہ وے کہ مریض اپنے معالج تے بھروسہ کردے نیں۔ جدوں لوک اپنی جسمانی تے نفسیاتی صحت دے بارے فکرمند ہون تے اوہ ڈاکٹر نال مشورہ کردے نیں مریض جدوں ڈاکٹراں نال بالمشافہ ملدا اے تے اوہدی بصارت جس سماعت حس لمس سنگھن دی حس تے حس ذائقہ دا معائنہ ہوندا اے۔ ڈاکٹر تے مریض اک کمرے وچ نہ وی ہون تے آن لائن معائنے وچ ایہناں چیزاں دی اہمیت ہوندی اے۔ اہم گل ایہہ وے کہ مریض ڈاکٹر تے اعتماد کردا اے۔ غنیمت اے کہ منہ چوں جھگ اڑاندے تے ایمبولینس تے مخالفین نوں گھر گھلن دیاں گلاں کرن والیاں توں ودھ موثر تے بردبار رہنما پنجاب وچ موجود نیں۔ ایہ سیاست دا سٹیتھوسکوپ نیں۔ آصف زرداری نے پنج ورھے ایہناں دی مدد نال پورے کیتے ہن ایہ سٹیتھوسکوپ عمران خان کول اے تے مریضاں نوں اطمینان اے کہ سیاسی امراض نقصان نہیں کر سکن گے۔