قائد،سیاست،قوم تے فوج

لكهت:رابعہ رحمن

اک مہذب قوم وانگوں حکمرانی دے مروجہ اصولاں دے تحت ہر کسے نوں آئینی حیثیت دے مطابق مقام دتا جائے

قائداعظم دی نجی زندگی وچ ڈاکٹر سعد خان لکھدے نیں کہ بیسویں صدی دے پہلے نصف وچ اسلامی دنیا اپنے طرز دے اصلاحاتی عمل توں لنگھ رہی سی ایس دور دے مسلمان راہنمائواں وچ ترکی توں اتاترک، انڈونیشیا توں احمد سیکارنو، ایران توں ڈاکٹر مصدق تے جنوبی ایشیا توں قائداعظم تے کئی دیگر روشن خیال شخصیات ابھریاں۔ ایہناں راہنمائواں دی کامیابی تے ایہناں نوں اج دے دن تیکر دتی جان والی تکریم ایس گل دی نشاندہی کردی اے کہ مسلمان قومیت دا اکثریتی دھڑا ترقی پسند تے جدید سوچ رکھدا اے۔ امریکہ وچ مقیم پاکستانی نژاد مورخ عائشہ جلال دا کہنا اے کہ محمد علی جناح نوں اشتعال انگیز تقریراں کرن تے مذہب نوں منفی مقصد لئی استعمال کرن والے ناپسند سن۔ قائداعظم نے یکم جنوری 1940 نوں گاندھی جی دے ناں خط وچ لکھیا، میرے نیڑے اعمال نوں اخلاقی بنیاد فراہم کرن والے عقیدے نوں ای مذہب کہیا جاندا اے۔
وطن عزیز دا ایہہ انمول تحفہ جدوں اوہناں نے مسلماناں نوں دتا تے ایس ویلے مسلماناں دا جوش و خروش تے جذبہ دیدنی سی پر 73 سالاں وچ اسیں اپنے ملک دے نال جیہڑا رویہ رکھیا ایس دی مثال دنیا وچ گھٹ ای ملدی ہوئے گی۔ اسیں کدھرے گھٹ وسائل رکھن والے ملک اج ترقی دی نس بھج وچ کدھرے اگے جا چکے نیں تے وجہ صرف دیانتداری تے خلوص توں اگے ودھن دا جذبہ اے۔ دنیا جہاں دیاں نظراں اج وی ساڈے اُتے مرکوز نیں پر خطرات نوں بھانپن دی بجائے اسیں اپنے حال وچ مگن اپنے ای وطن نوں لُٹن دے در اُتے آں۔ ایسے خود غرضی تے ناعاقبت اندیشی نے ساڈے توں وطن کھوہ لیا پر اسیں ایس توں وی کوئی سبق نہ سکھیا ۔ اک چنگی ، بصیرت افروز تے دور اندیش قیادت دی کمی دے باوجود پاکستان اج وی عالم اسلام دا اک اہم ملک اے۔ ساڈی عسکری تے ایٹمی قوت ایس گل دا منہ بولدا ثبوت نیں کہ پاکستانی کجھ وی کر گزرن دی صلاحیت رکھدے نیں۔ پاکستانی فوج دا شمار دنیا دی اعلیٰ درجے دی پیشہ ورانہ فوجاں وچ ہوندا اے۔ اج اقوام متحدہ دی امن افواج وچ سب توں وڈا حصہ ساڈا ای اے۔ اج پاکستان وچ جمہوریت کافی حد تیکر جڑاں پھڑ چکی اے تے اک جمہوریت حکومت نظام مملکت چلا رہی اے تے وطن دشمن قوتاں اک وار فیر توں فوج تے سول حکومت دے وچکار غلط فہمیاں پیدا کر کے اپنے مذموم عزائم نوں حاصل کرنا چاہندے نیں۔ پاک فوج پچھلی اک دہائی توں زیادہ عرصہ توں دہشت گردی دے خلاف جنگ لڑ رہی اے۔ ایہہ جنگ اپنی نوعیت دے لحاظ نال انسانی تاریخ دی مشکل ترین جنگ قرار دتی جا سکدی اے پر ساڈی بہادر فوج نے ایہہ جنگ نہ صرف انتہائی بہادری تے جوانمردی نال بلکہ بے مثال کامیابی نال لڑی اے۔ جس دی ساری دنیا معترف اے۔ قائداعظم جہی جہاندیدہ شخصیت نوں مدنظر رکھدے ہوئے جے اسیں ایہناں نوں خراج تحسین تے خراج عقیدت پیش کرنا چاہنے آں تے سانوں ایس جمہوریت مملکت نوں چلان لئی اپنے مفادات نوں پچھے چھڈنا ہوئے گا جتھے اک قائد اسمبلیاں وچ آن والی شخصیات نوں ایہہ کہے کہ چائے اپنے گھر توں پی کے آئو۔اوتھے جے ا ج وی ایہو رویہ رکھیا جائے تے معیشت اُتے آیا ہویا بحران کسے حد تیکر گھٹ ہو سکدا اے ایس جمہوری دور حکومت وچ وی فوج نے ساری مشکلاں تے اشتعال انگیزیاں دے باوجود جمہوریت دا ساتھ دتا جس دی بدولت عوام الناس دی نظراں وچ ایس دے وقار وچ بے پناہ وادھا ہویا۔ اج سانوں بوہت سارے چیلنجز دا ساہمنا اے جس وچ معاشی، بحالی دہشت گردی دا خاتمہ تے امن و امان دی بحالی سرفہرست اے۔ ایہناں مشکلاں دا سامنا کوئی وی حکومت تے ادارہ تنہا نہیں کر سکدا بلکہ باہمی اعتماد تے ربط وچ ای سب دی کامیابی اے۔ قائداعظم جہے اعلیٰ کردار دی زندگی اک کھلی کتاب دی مانند اے۔ اوہناں نے جس طرح اسلام نال محبت نوں اپنی ذاتی محبتاں تے مفادات اُتے ہمیشہ ترجیح دتی تے آپ دی قیادت وچ مسلمانان برصغیر نوں آزادی تے وکھرا ملک نصیب ہویا جس دا ثمر اج وی اٹھایا جا رہیا اے۔
سانوں ماضی دی غلطیاں توں سبق سکھنا چاہیدا اے نہ کہ ایہناں نوں دہران دی کوشش کرنی چاہیدی اے۔ اک مہذب قوم وانگوں حکمرانی دے مروجہ اصولاں دے تحت ہر کسے نوں آئینی حیثیت دے مطابق مقام دتا جائے۔ اختلاف رائے نوں ذاتی انا دا مسئلہ نہ بنایا جائے کیوں جے ایہہ کسے وی جمہوریت معاشرے دا حسن ہوندا اے۔ڈاکٹر سعد خان جہے وطن تے وطن دی سربلندی لئی عمل پیرا ہون والی شخصیات نال محبت کرن والے مصنفین ادب دا سرمایہ نیں تے اوہ سانوں تاریخ نہیں بھلن دیندے ایس لئی انج دیاں کتاباں نوں اپنی لائبریری دا حصہ بنا کے اپنی نوجان نسل نوں تاریخ نال جوڑے رکھن ای وچ ساڈے وطن دی حرمت تے سربلندی اے۔