اراکین اسمبلی توں اعتماد دا ووٹ

لكهت:طلعت عباس خان

آئین دے تحت صدر مملکت ایوان زیریں دا اجلاس اوس ویلے بلاندا اے جدوں اوہ سمجھے کہ وزیراعظم اسمبلی توں اعتماد کھو چکے نیں پر ایتھے تے وزیراعظم نے آپ کہیا سی کہ اجلاس بلایا جاوے تاں جے میں اعتماد دا ووٹ لے کے دس سکاں کہ ہن وی اکثریت میرے نال اے۔ وزیراعظم دے کہن تے صدر مملکت نے اسمبلی اجلاس سدیا جد کہ انج کرن دی آئین وچ گنجائش نہیں۔ ہن وزیراعظم بظاہر اعتماد دا ووٹ لے چکے نیں پر جو طریقہ اپنایا گیا اوہ غیرآئینی سی۔ انج وی سارے ایہ سمجھن توں قاصر نیں کہ وزیراعظم نوں اعتماد دا ووٹ لین دی لوڑ کیوں پیش آئی؟ پندراں سولاں ممبران اوہو سن جہناں نے تن مارچ نوں عمران خان دی مرضی دے خلاف ووٹ پائے۔ کہیا گیا سی کہ ایہ بے ضمیر نیں جہناں نے چوکھی رقم لے کے اپوزیشن نوں ووٹ دتے پر اعتماد دا ووٹ وی اوہناں توں خوشی خوشی ایہہ کہہ کے لے لیا کہ ہن اوہناں خلاف کوئی کاروائی نہیں کراں گے۔ کیہ ساڈے قول و فعل وچ تضاد نہیں؟ ایہو وجہ اے کہ کرپشن رکن دی تھاں تھلڑے لیول تک اپڑ چکی اے۔ آئین بڑا واضع اے ایہدے وچ کوئی ابہام نہیں کہ سینٹ الیکشن سیکرٹ بیلٹ توں ای ہون گے۔ سپریم کورٹ نے جو لکھیا ایہو اوہ پہلے دن ای لکھ سکدے سن پر تن ہفتیاں دی سوچ وچار دے بعد ریفرنس دا جواب دیندے ہوئے لکھیا کہ سینٹ الیکشن آئین وچ لکھے گئے طریقہ کار نال ای کرانا ممکن اے۔ الیکشن کمیشن نوں ایہ ہدایت جاری کیتی کہ سینٹ الیکشن وچ خریدوفروخت کرپشن نوں روکن وچ اپنا کردار ادا کرے۔ ایہدے بعد حکومتی ریفرنس تے آرڈیننس دا خاتمہ ہویا۔ اپوزیشن نے ایہنوں اپنی فتح کہیا۔
الیکشن کمیشن دا اجے تک جو کردار سامنے آیا اے اوہنوں ساریاں نے پسند کیتا اے تے اوہنوں قابل فخر قرار دتا اے۔ ڈسکہ دے ضمنی الیکشن توں سینٹ الیکشن تک دے رول وچ الیکشن کمیشن نوں لوکاں وچ زبردست پذیرائی ملی۔ یاد رہوے سپریم کورٹ وچ وی الیکشن کمیشن نے اوہو موقف اپنایا سی جو آئین وچ لکھیا گیا سی تے جو اپوزیشن دیاں جماعتاں دا سٹینڈ سی۔ ایسے طرح ڈسکہ الیکشن نوں نہ صرف منسوخ کر دتا سگوں انتظامیہ دے کرتے دھرتے لوکاں دے خلاف قنونی کاروائی کردے ہوئے اوہناں نوں نوکریاں توں وی فارغ کر دتا۔ اجہے الیکشن توں ایس ادارے دا ناں روشن ہویا اے تے عوامی اعتماد وچ وادھا ہویا اے۔ سینٹ الیکشن وچ اصل مقابلہ یوسف رضا گیلانی تے حفیظ شیخ دا سی۔ یاد رہوے جدوں یوسف رضا گیلانی وزیراعظم سن تے شیخ صاحب اوہناں دی کابینہ دے منسٹر ہوندے سن۔ ایہو وجہ سی کہ رزلٹ دے بعد وی دوہاں امیدواراں نے اسمبلی وچ اکٹھے واک کیتی تے گل بات وی کیتی۔ دوہاں نے احترام دا رشتہ بحال رکھیا۔ رزلٹ توں جت اپوزیشن دی ہوئی تے ہار حکومت دی۔ جتن دے بعد سب توں پہلاں سینئر منسٹر شاہ محمود قریشی نے پریس کانفرنس کردے ہوئے اعلان کر دتا کہ عمران خان اسمبلی توں اعتماد دا ووٹ لین گے۔ شام نوں وزیراعظم نے قوم نال اپنے خطاب وچ کہیا کہ میں آپ اعتماد دا ووٹ لینا چاہنا واں۔ لگ رہیا سی خان صاحب نے قوم نال نہیں صرف اپنی پارٹی نال خطاب کیتا ہووے۔
ایس موقعے تے الیکشن کمیشن تے ڈاڈھی تنقید کیتی ایہنوں سینٹ الیکشن وچ جو کجھ ہویا ایہدا قصور وار وی اوہنوں ٹھہرایا۔ جہدے تے الیکشن کمیشن نے افسوس دا اظہار کیتا۔ گل وی سچ اے جہڑے ایم این اے دا پتہ لگ گیا سی اوہناں دے خلاف کاروائی کردے پر ہن اوہناں توں اسمبلی دا ووٹ لین تے اوہناں نوں کوئی اعتراض نہیں سی۔ ایس توں پہلاں وی ایہو رولا پاندے رہے نیں کہ کرپشن ہو رہی اے تے ہو چکی اے۔ ایہ وی کہندے رہے کہ ساڈے کول ایس کرپشن دے ثبوت وی نیں پر اوہناں خلاف کوئی ایکشن نہیں لیا گیا۔ بس کرپشن کرپشن دا رولا ای پاندے رہے۔ کرپشن روکن لئی کوئی اقدامات کردے وکھائی نہیں دتے جہدی وجہ نال اوہناں دے دور وچ کرپشن ودھی اے گھٹ نہیں ہوئی سگوں ہن ایہ کرپشن تھلڑی سطح تک اپڑ چکی اے انج لگ رہیا اے جیویں ایہ ہن کرپشن نوں قنونی قرار دین دے موڈ وچ ہون۔ ایہناں خیالات تے گل کرن بابا کرمو نوں ملن گیا۔ پچھیا بابا جی ایہ دسو سینٹ الیکشن ہون یاں قومی اسمبلی دے الیکشن وچ کرپشن کیوں ہوندی اے۔ بابا کرمو نے مسکرا کے پچھیا کہ وکیلاں دے بار تے کونسلاں دے الیکشناں وچ کیہ کرپشن نہیں ہوندی۔ راقم نے کہیا چلو وکیلاں نوں وی ایہدے وچ شامل کر لینے آں۔ فیر بابا کرمو نے پچھیا کہ تہانوں کسے بیماری نال کدی واہ پیا اے۔ میں کہیا کینسر نال‘ کیہ اوہدے نال کوئی زندگی وچ تبدیلی آئی۔ کہیا بہت زیادہ۔ کہیا میں وی اک واری دل دی بیماری توں صحت یاب ہو چکیا واں ہن میں تندرست وی آں تے بدل وی چکیا واں۔ بابا کرمو نے کہیا میر ا ذاتی تجربہ اے کہ بیماریاں انسان نوں اللہ دے نیڑے لیان لئی لگدیاں نیں۔ ایہ بیماریاں گناہواں نوں گھٹ کرن وچ مددگار ثابت ہوندیاں نیں۔ کہیا جدوں انسان اللہ دے نیڑے ہو جاندا اے تے اوہ ہر گناہ کرن توں پہلاں اوسے طرح اللہ توں ڈرن لگدا اے جیویں اسیں کسے شاپ تے چوری ایس لئی نہیں کردے کہ سانوں اوہناں دے کیمرے دی اکھ ویکھ رہی ہوندی اے۔
انج ای حال اللہ دے اوہناں بندیاں دا وی ہو جاندا اے جو وگڑے ہوندے سن پر بیماری دے بعد اوس ذات دے نیڑے ہو جاندے نیں فیر اوہ ہر ویلے ایہو سمجھدے نیں کہ اوہ ذات مینوں ویکھ رہی اے۔ فیر اوہ بھیڑے کماں توں باز آ جاندے نیں۔ جھوٹ نہیں بولدے‘ کرپشن نہیں کردے‘ کسے نال زیادتی نہیں کردے۔ جس دن ساڈے لیڈران تے حکمراناں نوں بیماریاں لگن تے ایہ وی سمجھ جان گے کہ اللہ تے لوک ساڈے ہر ایکشن نوں ویکھ رہے نیں تے فیر ایہ دکھاوے والے کم کرنے بند کر دین گے۔ بابا کرمو نے کہیا ایس ویلے ساڈے سامنے میاں نوازشریف تے آصف علی زرداری اوہ سیاسی لیڈر نیں جو بیماری دے بعد بدلدے وکھائی دتے نیں۔ میاں صاحب خرابی صحت پاروں موت دے نیڑیوں گزرے فیر جیل چوں نکلے تے لندن اپڑ گئے۔لندن وچ اپڑ کے علاج کرایا۔ صحت یاب ہوئے‘ ایہدے بعد اوہ گلاں کرنیاں شروع کر دتیاں نیں جو کوئی سیاستدان کرن دی ہمت نہیں سی رکھدا۔ اجہیاں گلاں عمران خان وی وزیراعظم بنن توں پہلاں کدی کدی کردے سن پر ہن نہیں۔ ہن صرف میاں نوازشریف تے کجھ ساتھی ای کر رہے نیں جہدے تے ساریاں سیاسی جماعتاں نے میاں صاحب د اساتھ دتا تے لانگ مارچ تے دھرنے دی تھاں بدلن دا اعلان کیتا۔ راقم نے بابا کرمو توں پچھیا کہ ہن اپوزیشن مارچ وچ لانگ مارچ تے دھرنا دیوے گی۔ سینٹ الیکشن دے بعد نہ حالات بدلے نیں تے نہ ای واقعات۔ جے حکومت مہنگائی تے اپنی زبان تے کنٹرول کر لیندی تے شاید کجھ مہینے ہور گزار لیندے پر ایہناں دوہاں تے لگدا ایہو اے کہ کنٹرول کرنا اوہناں دے وَس وچ نہیں۔ ایہ آپ وی خواہش رکھدے نیں کہ آ بیل مینوں مار! ادارے وی باز نہیں آ رہے ایس لئی اپوزیشن دے کول ہن مارچ وچ لانگ مارچ تے دھرنا آپشن ای باقی بچیا اے۔ دعاواں دی لوڑ اے۔٭