گٹھ جوڑ

لكهت:رابعہ رحمن

وام کسے وی حکومت تے ملک لئی کامیابی دا زینہ ہوندی اے۔ اج تیکر پوری دنیا وچ جنہی وی حکومتاں ٹُٹیاں یا صفحہ ہستی اُتے کامیابی نال ہمکنار ہوئیاں تے عوام دی بدولت۔ عوام حکومت دی اواز ہوندی اے تے حکومت عوام دی امیداں دا مرکز۔ جے اسیں نکے اداریاں وچ ای ویکھیے تے اوتھے اک جماعت یا گروپ جدوں طاقت پھڑدا اے تے پورے ادارے نوں متاثر کرن دی صلاحیت وی رکھدا اے۔ ایسے طرح ایس لئی آسانیاں پیدا کرن دی خوبیاں وی ایہناں وچ کماحقہ موجود ہوندیاں نیں۔ عوام انج دا طبقہ اے جیہڑا ملک وچ کسے وی قسم دی تبدیلی یا شورش دا باعث وی بن دا اے تے سب توں پہلے اثر انداز ہوندا اے ۔ عوام نوں اپنے نال لے کے چلن لئی حکومت جیہڑا وی اقدامات کردی اے ایس نال مشکلات خود بخود گھٹ ہو جاندیاں نیں پر ایس دا مطلب ایہہ ہرگز نہیں کہ عوام جس وی گل اُتے متفق ہو کے احتجاج کرن لگے تے حکومت گھٹن ٹیک دیوے گی۔ اصل وچ عوام تے حکومت دے وچکار اک مطابقت دا معیار مقرر ہونا بوہت ضروری اے۔ جیہڑے اعلیٰ عہدیاں اُتے فائز نیں ایہناں دے کول سوچن، کرن تے ویکھن لئی بوہت کجھ ہوندا اے۔ حکومت دی عوام دے نال کوئی دشمنی نہیں ہوندی بلکہ حکومت تے عوام نوں ہمیشہ توں اپنا دایاں ہتھ سمجھدی اے پر کجھ انج دیاں شیواں ہوندیاں نیں جیہڑا کہ عوام اُتے واضح کرن دی بجائے ایہناں توں ایہناں دا اعتماد تے بھروسہ منگن دی کیفیت پیدا کردی اے۔ انج دی صورتحال وچ عوام دا فرض اے کہ اوہ اپنی حکومت اُتے اعتماد کرن۔
عوام دا کردار تے چہرے جے دور ہو جان تے حکومت نوں وی اپنی من مانی پالیسیز تے حکمت عملی بنان دا موقع مل جاندا اے۔ صفحہ ہستی اُتے ہر تھاں عوام اپنی موجودگی دا احساس بڑی شدو مد نال دلاندی اے۔ جتھے وسائل بڑھان لئی ہر تھاں تے ہر مقام اُتے صنعت کار، کسان، تجارت، کنندہ، کیمیا دان تے دیگر شعبہ ہائے زندگی دے لوک تگ و دو وچ لگے رہندے نیں اوتھے شومئی قسمت کہ مسائل گھٹ کرن لئی ساڈی عوام جنہوں بے انتہا تحمل و صبر دے نال اپنا مثبت کردار ادا کرنا چاہیدا اے اوہ انج نہیں کردے۔ منیا کہ اک مسئلہ ہو گیا ، سڑک اُتے اک بس دو طالبعلماں نال ٹکرا گئی تے اوہ شدید زخمی ہو گئے تے ایہہ وی منیا کہ بس ڈرائیور دی غلطی سی پر عوام نال ایتھے ایہہ درخواست اے کہ ایس وجہ نال قریبی مارکیٹ اُتے پتھرائو (مزید نقصان تے اپنے وطن دا نقصان) ، بساں نوں روک کے شیشے توڑنا (مزید اپنا نقصان)، سڑک بلاک کر کے ٹائر ساڑنا نقصان دے علاوہ باقی عوام لئی مشکلاں دا ساہمنا۔ جے ایتھے اسیں ایہہ ویکھیے اک تے ساڈے دو طالب علم زخمی ہوئے اوہ وی ساڈا ای نقصان ہویا۔ ہن معاملہ پولیس وچ جان دیو تے ایس نقصان دے بعد دیگر سارے نقصان توں بچ جائو۔ ایہہ بساں، ایہہ دکاناں، ایہہ سڑکاں ساڈا ای اثاثہ نیں۔ دکاناں نوں بند کرا دین نال اک گھنٹے وچ وی ساڈی تجارت دی اوسطاً بوہت تھلے چلے جاندی اے۔ ایہہ وی تے ساڈا نقصان اے۔ ایتھے عوام دی اپنے وطن، اپنی حکومت، اپنے لوکاں، اپنے اثاثیاں نال محبت دا امتحان ظاہر ہوندا اے۔
دوجے پاسے ویکھیا جائے تے جدوں عوام ایس طرح دی توڑ پھوڑ وچ ملوث ہوندی اے تے حکومت ایہناں نوں روکن لئی جیہڑے حربے استعمال کردی اے اوہ پہلے تے مصالحت تے صلح جوئی دے ای ہوندے نیں۔ فیر جدوں ایہناں نوں کامیابی نہیں ہوندی تے گل لاٹھی چارج یا آنسو گیس اُتے جا کے رُکدی اے۔ ایتھے ہن حکومت مجبور اے تے عوام نال ایہہ استدعا اے کہ اپنے جوش و جذبیاں نوں استعمال کردے ہوئے ہوش دے ناخن لینا بوہت ضروری اے جدوں اک ہاتھی آشفتہ سر ہوندا اے تے اوہ اپنے پیراں تھلے بوہت ساری شیواں نوں روند دیندا اے پر اک جاہ جلال نال بھرپور انسان تے ایس انھے ہاتھی وچ کجھ تے فرق ہونا لازم اے۔ جے ایتھے عوام کہے کہ ساڈے اُتے ٹیکسز لائے جاندے نیں۔ زندگی دی بے یقینی دی کیفیت ایہہ وے کہ سویرے سو کے اٹھو تے بجلی دیاں قیمتاں ودھی ہوئیاں نیں تے ایتھے ایہہ ویکھنا اے کہ کیہ حکومت عوام نوں اپنا دشمن سمجھدی اے یا عوام نوں بے وجہ تنگ کرنا چاہندی اے یا اپنے خلاف کرنا چاہندی اے۔ ایہناں وچوں کوئی وی گل حقیقت نہیں رکھدی کیوں جے حکومت نوں اینا احساس بہرحال ہوندا اے کہ عوام دی آواز نوں دبانا مشکل ہوندا اے۔ ایس ل ئی اوہ عموماً انج دا نوٹس جاری ای نہیں کر سکدی کہ اوہ برداشت نہ کر سکن جدوں تیکر کہ بوہت مجبوری نہ ہوئے۔ کجھ اوقات معاملے انج دے ہوندے نیں کہ کوئی ایکشن لینا پیندا اے کہ کدھرے ڈالر دی قیمت ودھ جائے تے مسئلہ کوئی انج دی شے امپورٹ کرنی پئے جس دی ملک وچ قلت ہوئے تے عوام نوں لوڑ ہوئے تے قیمتاں وچ وادھا کرنا پیندا اے۔ ملک دے قرضے اتارنا وی تے انج ای اے۔ عوام تے حکومت دے سر دا تاج ہوندی اے تے ایس اُتے ہیرے اودوں لگدے نیں جدوں اوہ اپنے ملک دے مسائل نوں سمجھ کے بے جا احتجاج نہیں کردی تے فیر مشکل وچ حکومت دے نال کھڑی ہو ندی اے۔ زیادتی وی برداشت کرنی پئے تے کردی اے پر اپنی قربانیاں نال اک دن فتح عوام دی ہوئے گی تے عوام دی فتح اپنے ملک تے حکومت دی فتح ہوئے گی۔