کیا بات اے بٹ صاحب…واہ

لكهت:وقار احمد وقار

خاموش چہرہ خاموش لفظ دی طرحاں صاحبِ نظر انسان ساہمنے بولدا اے۔خاموشی وی گویائی ہندی اے۔ بقول شاعر
خاموش لوگ بھی بلا کے خطیب ہوتے ہیں
صاحبِ نظر خاموشی نال ہمکلام ہندا اے۔صاحبِ نظر انسان اُتے عجیب عجیب انکشافات ہندے رہندے نیں۔جہڑا منظر عام لوکاں لئی عام ہندا اے اوہ صاحبِ نظر لئی بڑا ای خاص ہندا اے۔علّامہ اقبال ؒ ایویں تے نئیں سی فرمایا کہ
دِلِ بینا بھی کر خُدا سے طلب
آنکھ کا نُور دِل کا نُور نہیں
صاحبِ نظر دی زندگی وچ ہونا تے نہ ہونا مسلسل ہندا رہندا اے۔ایہ چشمِ بینا دا اعجاز اے کہ اوہدے ساہمنے شبنم دا پاکیزہ قطرہ اِک مقدّس آیت وانگوں ہندا اے۔صاحبِ نظر ایس کائنات نُوں کتابِ مُبین دی طرحاں ویکھدا اے۔
ایہ حقیقت اے کہ ویکھن والیاں لئی نظارے ای کجھ ہور نیں۔اوہناں لئی ہر منظر وچ اک نواں منظر اے۔اوہناں لئی ایہو کائنات ورق در ورق اِک نویں تے من کچھویں کائنات اے۔نظر ملے تے دل کیوں نہ ملے۔؟ تے جے دل مل جاوے تے محفل مل جاوے۔ویکھن والے سُنن والے بنا دِتّے جاندے نیں۔اوہ لفظ نوں ویکھدے تے اوہدی آواز سندے نیں۔صاحبِ نظر دی سماعت کنّاں دی محتاج نئیں رہندی۔اوہ ہر چیز نوں ویکھ کے سُندا اے۔اوہ کائنات وچ ہون والی ہر اذان سُندا اے۔صاحبِ نظر ساز دے اندر موجود مخفی نغمے نوں سُندا اے تے مست ہو ہو جاندا اے۔نغمہ اجے ساز وچ ہندا اے تے دل والے دا دل ہل جاندا اے۔صاحبِ نظر ای اہلِ دِل ہندا اے تے اہلِ دل دا دِل دھڑکن دے نال نال تڑپدا وی اے۔عطاء اللہ عیسیٰ خیلوی گا گا کے دسیا اے کہ
اہلِ دِل اُس کو دِل نہیں کہتے
جو تڑپتا نہ ہو کسی کے لئے
میں ساری عمر صاحبِ نظر لوکاں دی محفل وچ گذاری اے ۔واصف علی واصف ؒ توں لے کے اج طاھرالقادری صاحب تک صاحبانِ فکر و نظر دی صحبت توں حسبِ اوقات فیض یاب رہن دا موقع نصیب رہئیا اے۔
میں وفاقی حکومت دے محکمے پاکستان بیت المال وچ اِک نکڑو اجیئہا مسکین تے غیر معروف کدی اکائونٹس تے کدی آڈٹ افسر آں۔اجکل تبادلہ ہو جان پاروں لہور چھڈ کے اسلام آباد رہن تے مجبور آں۔پاکستان بیت المال وچ سارے ملازم ای اپنے بھین بھرا نیں۔ سارے ای بڑے چنگے نیں پَر میری اِک مصیبت اے کہ میری طبیعت ہر کسے ول مائل نئیں ہندی تے نہ ای ہر کسے نال دل رلدا اے۔ جولائی 1992 وچ جدوں میں پاکستان بیت المال وچ ملازم ہویا اوس ویلے تے سارے ملازم کمال دے ساہن ۔ جناب راشد رندھاوا مرحوم ، تجمّل صاحب،قاضی ناصرالدین صاحب ،امجد صاحب،شریف صاحب،اختر اقبال صاحب،اصغر صاحب ، فرّخ صدّیق صاحب تے وغیرہ وغیرہ سارے افسر تے وغیرہ وغیرہ چھڈ کے میری طبیعت تے دل صرف فرّخ صدیق نال ای رلیا کہ اوہ نرا صاحب ای نئیں ساہن بلکہ صاحبِ نظر وی ساہن۔فیر اِک وقت آیا کہ ایس صاحبِ نظر نوں کسے دی نظر لگ گئی تے ایہ پاکستان بیت المال چھڈ کے کسے ہور محکمے دی نظر ہو گیا۔فیر کافی عرصہ بعد جناب احمد ندیم قادری صاحب ڈائریکٹر پاکستان بیت المال ۔صوبائی دفتر پنجاب جہڑا اجکل ریجنل آفس لہور مشہور اے ، دے زمانے وچ اِک سوہنے قد کاٹھ دا مالک چِٹّا گورا ، رج کے سوہنا تے نفاست و نزاکت دی شبنمی خوبیاں والا منڈا احمد نوید بٹ آئی ٹی دے شعبے وچ ملازم ہویا ۔کسے کول نظر نئیں سی کہ ویکھدا ورنہ لیفٹیننٹ (ر) کرنل سیّد احمد ندیم قا دری صاحب وی صاحبِ نظر انسان ساہن جہڑے اجکل روزنامہ نوائے وقت وچ ڈائریکٹر ایڈمن نیں۔
گل ہو رہئی سی جناب احمد نو ید بٹ صاحب دی جہڑے پاکستان بیت المال وچ ملازم ہو جان بعد بڑے الگ تھلگ رہندے ساہن ۔مینوں اپنے کئی ملازم ساتھیاں آکھیا کہ ایہ کمپیوٹر برانچ وچ جہرا نواں منڈا آیا اے ، اخلاقی طور تے بول چال وچ بڑا چنگا بندہ جاپدا اے پَر کسے نال مکس اپ نئیں ہوندا بس اپنی موج مستی وچ ای رہندا اے۔میں وی مشاہدہ کیتا تے اُتھن بیٹھن تے بول چال وچ ایس New Comer نوں باقی ملازم ساتھیاں نالوں ڈھیر منفرد پایاتے میرے اندروں آواز نکلی
ساتھی مجھے مل گیا
بعدوں علیک سلیک بعد ملاقات رہن لگ پئی تے نوید بٹ صاحب وی میرے بارے محسوس کیتا کہ ایہ وی باقی ملازماں توں ہت کے کوئی وکھری ٹائپ دی ایٹم اے تے فیر ایہ ہویا کہ جناب نوید بٹ صاحب پاکستان بیت المال وچ میری پچھان تے چھیڑ بن گئے ۔ سیّد فہیم اقبال صاحب تے مینوں اچیچا چھیڑ کے کہنا جا تھلّے صحن وچ تیرا یار اِک منفرد انداز اختیار کیتے کھلوتا ہویا ای ، جا کے مل آ۔۔۔۔!!!
اج وقت سبھ تے ثابت کیتی بیٹھا اے کہ واقعی ایہ اِک منفرد تے خداداد صلاحیتاں دا مالک ہر فن مولا دوجے ملازم ساتھیاں توں وکھ تے جدا حیثیت تے طبیعت رکھن والا نویکلا یار اے تے مینوں اپنیب حصے وچ آن والی ایس منفرد تے نرالی سنگت تے بڑا ای مان تے اپنے مقدّر اُتے فخر اے کہ
A man is known by the Company the Keeps
احمد نوید بت صاحب بڑا گہرا دینی فہم تے مطالعہ رکھدے نیں۔میرے نال تحریکِ منہاج القرآن دے لہور مرکز اجتماعی اعتکاف وچ تے طاھرالقادری صاحب نوں سُنن لئی ڈھیر دُوجیاں مجلساں وچ شامل رہئے نیں۔پیر کرم شاہ ؒ ہوراں دے منظورِ نظر حافظ خان محمد قادری صاحب نوں سُنن کثرت نال داتا نگر بادامی باغ لہور جاندے رہئے نیں۔ایہناں دے گھر دی اسلامی لائبریری نوں پاکستان بیت المال دے سرکاری خطیب جناب حافظ محمد شفیق ( مالی ) بڑی حسرت دی نگاہ نال تکدے تے حیران کن انداز وچ بیان کردے رہئے نیں ۔پاکستان بیت المال دے معروف نعت خواں جناب شوکت علی نقیبی وی ایہناں دے عاشقاں وچ شامل نیں۔بٹ صاحب نوں نیچر دی ہر ہر ادا تے قدرتی حُسن نال گہرا لگائو تے سیاحت دا شوق اے ۔آپ نوں بزرگانِ دین دے مزارات دی حاضری دا وی عادت اے۔مطالعے دا شوق جنونی نوعیت دا اے تے اوہدا ثبوت ایہناں دے گھر وچ اپنے ذاتی کمرے دی لائبریری اے جس وچ تقریباًً ہر خاص و عام کتاب ایہناں دی ذاتی خرید پاروں موجود اے۔کتاباں دی صحبت وچ رہن والے ایس انسان دا اپنا چہرہ وی کتابی اے۔
میری اپنی حیرانگی تے حیرت اوس وقت انتہائی مقام اُتے جا کھلوتی جدوں اِکدن یو ٹیوب تے انجوائے کردیاں احمد نوید بٹ صاحب دی پوسٹ میری نظر ساہمنے آئی تے جدوں کلک کیتا تے بٹ صاحب مائیک پھڑ کھلوتے بڑی ای سُریلی آواز وچ گا رہئے ساہن کہ
دل کی تنہائی کو آواز بنا لیتے ہیں
درد جب حد سے گذرتا ہے تو گا لیتے ہیں
فیر کیہ ۔۔۔ چل سو چل ، بڑے گانے سُنن نوں ملے۔میں چائیں چائیں بٹ صاحب دی پوسٹ فیس بک تے فخریہ انداز وچ پوسٹ کیتی تے تھلّے اک مفتی ٹائپ بندے فقیہانہ انداز وچ پچھیا کہ
ایہ گلوکار اے ؟؟؟
کدی الحمرا ہال نمبر 1 لہور وچ روزنامہ جنگ دی انتظامیہ اِک مباحثہ کروایا سی جس دا عنوان سی کہ
کیا اسلام میں موسیقی سراسر حرام ہے۔؟
مینوں چنگی طرحاں یاد اے کہ اوتھے معروف علمائے دین قرآن و حدیث دی روشنی وچ انج دے دلائل دِتّے ساہن کہ ہال وچ موجود نوجواناں دے چہرے مرجھائے ہوئیے پُھلّاں دا نقشہ پیش کرن لگ پئے ساہن۔اوہناں شرعاً دلائل نال ایہ ثابت کیتا کہ موسیقی شیطانی تے کفریہ فعل اے تے ایس دے شوقین پکّے جہنّمی نیں۔کئی جوان منڈے کڑیاں تے مایوس ہو کے اُٹھ کے چلے گئے پَر میں آخر تک جم کے بیٹھا رہئیا کہ اوتھے مقرّرین وچ اِک صاحبِ نظر تے صاحبِ فکر شخصیّت موجود سی ( شخصیّت دا نام نئیں لوّاں گا کہ نام لئے دّسّے بغیر ای لوکاں نوں واقفیّت اے کہ اوہ کون اے ) روزنامہ جنگ دی انتظامیہ آخر خطاب لئی اوس نابغہء روزگار ہستی نوں دعوت دیندیاں مائیک تک استقبالیہ انداز وچ لیاندا تے جو استقبال ہویا اوہ منظر ای صاحبانِ نظر لئی اِک اشارہ سی کہ ہُن گل کجھ خاص ہون لگی اے۔
صاحبِ فکر و نظر مائیک تے آندیاں جو پہلا کلام کیتا اوہ ایہ سی کہ
اس سے پہلے کہ میں باقاعدہ قرآن و حدیث سے دلائل کی روشنی میں اپنی گفتگو کا آغاز کروں میں ہال میں موجود چہرے لٹکا کر بیٹھی نوجوان نسل کو بتا دینا چاہتا ہوں کہ
اسلام میں موسیقی سراسر حرام ہرگز نہیں ہے۔
ایہ سُن کے انج لگا جویں ہال وچ موجود مردہ جسم فیر حرکت کرن لگ پئے نیں۔
صاحبِ نظر دسیا کہ تسیں عالم تے مفتی حضرات فتوے دے زور تے ڈھولک ، پیانو ، بانسری تے گھٹار اُتے پابندی لگوا سکدے او تے لگوا لو پَر اوس موسیقی اُتے پابندی کون لوائے گا جہڑی قدرت آپ چھیڑ کے بیٹھی اے ۔؟؟؟
پہاڑاں توں ڈگن والے آبشاراں دے پانی دے ہوا نال ٹکران بعد پیدا شدہ نغماتی کیفیت تے پابندی کون لوائے گا ۔؟
تے سبھ نالوں وڈّی گل باغ وچ کوئل دے کُوکن اُتے پابندی کون لوائے گا۔؟؟؟
شریعت وچ کوئی وی کم اصلاً حرام نئیں ۔جہڑی موسیقی سوز و گداز دی کیفیت پیدا کردی اے اوہ جائز اے تے جہڑی شہوت دے جذبات اُبھاردی اے اوہ ناجائز تے حرام ۔موسیقی دا تعلّق سُنن نال اے ویکھن نال نئیں۔ہر سُنن والے دی اپنی طبیعت تے اپنی کیفیت ہندی اے۔جس دی اپنی طبیعت وچ سوز و گداز ہندا اے اوہنوں سوز و گداز ای نصیب ہندا تے جہڑا نیتاً حرامی تے منفی جذبات دا حامل اے اوہنوں پھل وی اپنی نیّت ورگا ای ملنا۔
پچھلے ہفتے جدوں چار دن لئی لہور رہن دا موقع ملیا تے بٹ صاحب وی لہور آئے ساہن ۔ مینوں میوزک مارک اکیڈمی مغلپورہ لاہور رات 9 وجے آن دی دعوت دتی جہڑی میں قبول کیتی تے اوتھے اکیڈمی چلان والے محترم شہزاد بٹ صاحب تے نوید بٹ صاحب دے والدِ محترم جناب صدیق بٹ صاحب دی سربراہی وچ نوید بٹ صاحب دے دو گانے اوہناں دے ساہمنے بیٹھ کے سنن دا موقع نصیب رہئیا تے بٹ صاحب دی گائیکی پاروں پیدا شدہ کیفیت تے جذبات بار بار ایہ کہن تے مجبور کیتی رکھیا کہ
کیا بات اے بٹ صاحب۔۔۔واہ
٭٭٭