پنجابی رنگ منچ ،ٹی وی تے فلماں دا وڈا ناں افتخار ٹھاکر

لیکھک:انگریز سنگھ وردی

اُلتھا: محمد آصف رضا

افتخار ٹھاکر پنجابی ر نگ منچ دا اک جانیا پہچانیا چہرہ ہن جیہناں نے اپنی سخت محنت اتے اپنے ہنر دے بل تے اپنے آپ نوں رنگ منچ،ٹیلیوژن اتے فلماں وچّ کامیابی نال قائم کیتا۔سٹیج دی جان تے مزاحیہ پہلوان اکھواؤن والے افتخار ٹھاکر دا شمار پاکستان دے چوٹی دے کمیڈیناں وچّ ہوندا ہے۔شو بزنس وچّ 26 سال کامیابی نال پورے کرن والے افتخار ٹھاکر نے ہن تک سیکڑے سٹیج شو کر کے اپنے خاص مزاحیہ انداز نال لوکاں دا بھرپور منورنجن کیتا ہے۔

جنم اتے خاندانی جان پچھان: افتخار ٹھاکر دا جنم متی 01 اپریل 1958 وچّ پنجاب دے ضلع خانیوال دے اک پنڈ میاں چنوں وِچ ہویا۔افتخار ٹھاکر دا اصل ناں افتخار احمد ہے۔ ایہناں دے ناں نال ٹھاکر دے جڑن پچھے اک دلچسپ قصہ ہے دراصل ایہناں دے پہلے سٹیج ڈرامے دی مشہوری دے دوران چھپن والے اشتہار تے غلطی نال افتخار احمد دی جگہ تے افتخار ٹھاکر چھپ گیا سی جو اگے چل کہ ایہناں دی پچھان ہی بن گیا۔افتخار دے والد دا ناں صوبیدار محمد علی ہے جو کہ پاکستانی فوج وچ نوکری کردے سن۔بچپن توں ہی شرارتی طبیعت دے مالک افتخار اپنیاں نکیاں نکیاں شرارتاں نال اپنی ماں تے سارے گھر دا جی لا رکھدا سی۔اس طرحاں بچپن توں ہی کامیڈی افتخار دے سبھاء دا حصہ سی۔پنڈ دے سکول وچّ پڑھدیاں اپنیاں شرارتاں کرکے دو وار سکول توں کڈھیا وی گیا پر پڑھائی وچ ہشیار ہون کارن پھر داخلہ مل جاندا سی۔اٹھویں پنڈ میاں چنوں توں پاس کرکے میٹرک دا امتحان نیڑلے پنڈ کبیر والا دے سکول توں دتا۔افتخار نوں لگدا سی کہ اوہ کتے بائیولوجی وچوں فیل نہ ہو جاوے اس لئی شرمندگی توں بچن لئی اوہ کراچی چلا گیا جتھے اوس نے دوبارہ میٹرک دا امتحان دتا جس وچو اوہ سیکنڈ ڈویزن وچّ پاس ہویا پر پنجاب بورڈ دے امتحان جو کہ اس نے کبیر والا سکول توں دتا سی فسٹ ڈویزن وچّ پاس ہویا۔دسویں کرن توں بعد افتخار نے کراچی کوسٹ گارڈ وچ نوکری کر لئی اتے نوکری دے نال نال پڑھائی وی جاری رکھی۔ایف.اے. کامرس کالج کراچی تو کر کے اپنی ٹرانسفر اسلام آباد ہون کارن بی.اے. دی ڈگری اسلام آباد توں حاصل کیتی۔

تھیٹر وچّ اداکاری دی شروعات:-اسلام آباد رہندیاں افتخار دی ملاقات اوہناں دناں وچ تھیٹر دی بہت وڈی ہستی زیڈ.اے.زلفی نال ہوئی جیہناں نے افتخار نوں اپنے ڈرامے وچّ اک مزاحیہ رول کرن نوں کیہا۔اس ڈرامے وچّ کیتی مزاحیہ اداکاری توں متاثر ہو کے مشہور ناٹک کار سرور عطیق صاحبہ نے ایہناں نوں تھیٹر فیسٹیول لئی اپنے اک ڈرامے وچّ اداکاری کرن دی پیش کش کیتی۔اس ناٹک دی پبلسٹی دوران ہی غلطی نال پوسٹراں تے افتخار دے ناں پچھے ٹھاکر لکھیا گیا سی جو اگے چل کے ایہناں دے ناں نال جڑ گیا۔اس تھیٹرفیسٹیول وچّ افتخار ٹھاکر دی مزاحیہ اداکاری والا سرور عطیق صاحب دا ناٹک پہلے نمبر تے رہیا۔اس ڈرامے وچلی ایہناں دی مزاحیہ اداکاری درشکاں تے تھیٹر دیاں اس زمانے دیاں دگج ہستیاں نوں بے حدّ پسند آئی۔ اس طرحاں تھیٹر وچّ افتخار دی اداکاری دے سفر دی شروعات ہوئی۔تھیٹر دے شروعاتی دئور وچّ اپنا گزارا چلاؤن لئی افتخار ٹھاکر موٹر گڈیاں دے ٹیرا نوں پنچر لاؤن دی دُکان وی چلاؤندا رہیا۔
لاہور تھئیٹر نال جُڑناں:- سن 1996 وچّ افتخار ٹھاکر لاہور شفٹ ہو گیا جتھے ایہناں دی ملاقات تھیٹر دے وڈے نام سہیل احمد نال ہوئی جیہناں نے اپنے اِک تھیٹر دے اردو ڈرامے وچّ نواب دے رول لئی افتخار دی چون کیتی۔اس ڈرامے دے رول لئی وی ایہناں نوں کافی سراہنا حاصل ہوئی۔اس طرحاں سہیل احمد ،مستانہ،خالد عباس ڈار،عرفان کھوسٹ اتے سینئر اداکار محمد کوی خان نال مل کے افتخار نے بہت سارے سٹیج شوآں وچّ حصہ لیا۔سنّ 1997 وچّ سہیل احمد اتے محمد قوی خان افتخار نوں تھیٹر کرن لئی اپنے نال نیویارک لے کے گئے جتھے تھیٹر کردیا ہی ایہناں نے اوتھوں دی نیویارک فلم اکیڈمی وچّ ایکٹنگ دے کورس وچّ داخلہ لے لیا۔ایہناں نے اوتھے رہ کے 3 سال 2 مہینے وچّ ایکٹنگ دے ہر پہلو نوں بڑی بریکی نال سکھیا تے کورس ختم ہون مگروں واپس لاہور پھر اپنے تھیٹر گروپ وچّ آ شامل ہوئے۔اس مگروں ایہناں نے لاہور وچّ پھر توں تھیٹر کرناں شروع کر دتا۔افتخار ٹھاکر ہن تک 350 توں وی زیادہ مختلف ڈرامے کر چکا ہے جیہناں وچوں کجھ مشہور ڈرامیاں دے ناں ہن بلبل، مستیاں، سردی میں گرمی، ربا عشقَ نہ ہوئے، روٹی کھول دیؤ، پگلی، سوہنی منموہنی، سیلفی اتے چور پیار دا۔

ٹی.وی اتے فلماں وچّ اداکاری:-تھیٹر دے نال نال افتخار ٹھاکر نوں فلماں دیاں وی پیشکشاں آؤن لگیاں۔سال 2004 وچّ ایہناں دی پہلی فلم رلیز ہوئی مشہورڈائریکٹر سید نور دی اردو فلم ہم ایک ہے جس وچّ افتخار ٹھاکر نے پہلی وار اداکار شان اتے اداکارہ صائمہ نال کم کیتا۔اوسے ٹیم دی ہٹ پنجابی فلم مجاجن جو کہ 2006 وچّ رلیز ہوئی افتخار دی دوسری فلم سی جس وچّ ایہناں نے اک ولین کمیڈین دا وکھرا جیہا رول ادا کیتا سی۔اس فلم توں بعد افتخار ٹھاکر نے ہور وی بہت ساریاں پاکستانی فلماں کیتیاں۔ہن تکّ افتخار ٹھاکر کلّ 13 پاکستانی فلماں کر چکا ہے۔فلماں ،تھیٹر دے نال نال افتخار ٹھاکر نے ٹی.وی. دے بہت سارے سیریلاں وچّ کم کیتا جناں وچّ ڈبل سواری،لاہوری گیٹ،لگان،مستی گیٹ پرمکھ ہن اس توں علاوہ سہیل احمد نال ٹی وی شو مذاق رات افتخار دا بے حدّ مقبول شوہے جو 2013 توں ہن تکّ دنیا نیوز چینل تے چل رہیا ہے۔
چڑھدے پنجاب دیاں پنجابی فلماں وچّ آمد:-بھارتی پنجابی فلم انڈسٹری وچّ فلم کمپنی ردم بوائز انٹرٹینمنٹ دا بہت وڈا ناں ہے جس ولوں ہن تکّ جنیاں وی فلماں دا نرمان کیتا گیا لگ بھگ سبھ فلماں نے بے حدّکامیابی حاصل کیتی جیہناں وچّ گوریاں نوں دفعہ کرو، انگریز، لوَ پنجاب، بمبوکاٹ، لہوریئے، اشکے دے ناں پرمکھ ہن۔سال 2019 وچّ اس کمپنی دے بینر تلے فلم بنائی گئی چل میرا پتّ جس دی خاصیت ایہہ سی کہ اس فلم وچّ لہندے پنجاب دے تنّ بہتّ ہی مشہور کمیڈین افتخار ٹھاکر، ناصر چنیوٹی اتے اکرم اداس نوں وی کاسٹ کیتا گیا۔26 جولائی 2019 نوں رلیز ہوئی اس فلم دے نردیشک سن جنجوت سنگھ اداکارہ وچّ امریندر گلّ،سمی چاہل، ہردیپ گلّ ، گرشبد۔ افتخار ٹھاکر نے اس فلم وچّ چودھری شمشیر دا بے حدّ مزیدار کردار ادا کیتا سی جس نوں درشکا نے بہت پسند کیتا سی۔سال 2019 دی ایہہ سپرہٹّ فلم بنی جس نے ریکارڈ بزنس کیتا تے نال ہی سال 2020 دا پی.ٹی.سی ولوں فلم ایوارڈ وچّ بیسٹ فلم دا تے بیسٹ ڈیبیو نردیشک دا اوارڈ وی حاصل کیتا۔اس طرحاں افتخار دی بھارتی پنجابی فلماں وچّ شاندار اینٹری ہوئی۔اسے ٹیم ولوں چل میرا پتّ 2 بنائی گئی جس وچّ افتخار ٹھاکر، ناصر چنیوٹی اتے اکرم اداس دے نال دو ہور پاکستانی دگز پنجابی کمیڈین ظفری خان اتے روبی انم نوں وی شامل کیتا گیا۔اجکل افتخار ٹھاکر پولی ووڈ فلم پانی وچّ مدھانی دی شوٹنگ وچّ رُجھے ہوئے ہن۔
ویاہتا زندگی:- افتخار ٹھاکر نے زندگی وچّ کامیاب ہون لئی سخت محنت کیتی۔اداکاری وچّ اپنے آپ نوں کامیاب کرن اپرنت 38 سال دی عمر وچّ افتخار ٹھاکر نے اپنی رشتے داری وچّ ہی ویاہ کروایا۔ایہناں دے گھر چار بچیاں نے جنم لیا اِک بیٹا اتے تنّ بیٹیاں۔افتخار ٹھاکر اپنے پریوار نال لاہور وچّ خوش حال زندگی بسر کر رہے ہن۔

اداکاری وچّ ولکھن پیڑا پاؤن دے عوض وجوں پاکستان سرکار نے سال 2019 وچّ ایہناں نوںاو تھوں دے سبھ توں وڈے ایوارڈ پرائیڈ آف پرفارمنس نال سنمانت کیتا۔