پتہ نہیں اسیں کدوں ٹھیک ہوواں گے؟

لكهت:صوفیہ بیدار

چھوٹی چھوٹی جت تے چھوٹی چھوٹی ہار تے رولا پاندے سیاستدان بالکل انج ای لگدے نیں جیویں سستے نشے دے زیراثر کوئی گلیں وچ بڑھکاں مار رہیا ہووے ٹھرے تے کچی شراب دا زہرآلود نشہ بڑی چھیتی اعصاب تے چڑھ کے کیہ کیہ کجھ نہیں کہلواندا: غالب نے تے کہلوان دی نزاکت نوں چھڈ کے سدھا کہیا اے:
بک رہا ہوں جنوں میں کیا کیاکچھ
کچھ نہ سمجھے خدا کرے کوئی
غالب نوں مدعا نہ سمجھن والیاں وچ رعایت دا پہلو نظر آیا جد کہ ایتھے جواب آں غزل دوجیاں دے گناہ گنوا کے اپنے پاک کیتے جاندے نیں ساڈے اندر جو اللہ تعالیٰ نے تکڑی لائی ہوئی اے اوہ فطرتاً پورا تولدی تے سچ بولدی اے پر پہلی آواز تے جے دھیان نہ دتا جاوے تے بعد دیاں ساریاں آوازاں وچ جواز شامل ہو جاندے نیں کہ فلاں نے وی تے میرے نال ایہ کیتا یاں پورا معاشرا ایہ سب کر رہیا اے ایس لئی میں کر لیا تے کیہ ہویا۔ غلاماں‘ کنیزاں تے اسیراں توں جو خطاواں ہون اوہ لاعلمی تے جہالت پاروں اوہ مقام نہیں رکھدیاں جو سمجھدار‘ پڑھے لکھے عالماں دی دیدہ و دانستہ خطاواں‘ غلطیاں تے گناہواں دا اے۔
میرے خیال وچ اسمبلیاں تے ایوان بالا سسٹم نوں چلان لئی مشینری دے طور تے بنے سن جہناں دا طریقہ کار وقت دے نال نال شفاف تے جدید ہونا چاہیدا سی۔ مقصد سارا وقت ایہناں دے کل پرزیاں دی مرمت وچ گزارن لئی نہیں سی ایہدے تے اوہنوں چھیتی توں چھیتی نبیڑکے ملکی معاملے چلانا اصل موضوع سی ایہدی دوجی مثال ایہہ وے کہ جے باراں مہینے واشنگ مشین دی مرمت ای کردے رہے تے گھر میلے کپڑیاں نال بھر جاوے گا تے جے مرمت وچ ای وقت گزارنا چاہو تے پنج ورھے وی لگ سکدے نیں جد کہ الیکشن کمیشن نامی محکمہ وی کروڑاں دی تنخواہواں تے خرچیاں نال چل رہیا اے اسیں اک اجہی فیکٹری وچ بہہ گئے آں جتھے سارا وقت مرمت وچ باقی اک دوجے تے الزامات وچ لنگھ رہیا اے پاکستان دی کہڑی بچی دنیا دے ریکارڈ توڑ گئی سانوں ایہدا نال کوئی مطلب نہیں طب دے شعبے وچ کیہ کیتا کجھ ہو گیا اسیں لاعلم آں سگوں اسیں اوہ آں جہناں نے کرونا نوں وی سیاست وچ استعمال کر لیا۔
Stem Cell Bank بارے پڑھیا سنیا تے سی پر فیوچر ہسپتال کیویں ہون گے ایہدے توں ناواقف رہن وچ ای عافیت سمجھی کہ روزانہ دے لائیو لڑائی شوز نے رومینٹنک فلماں بنان والیاں دا وی بیڑا غرق کر دتا ایہدے وچ کوئی شک نہیں کہ تھرتھلی ڈپریشن چوں کڈھدی اے روز نت نویاں خبراں جیلاں‘ قیداں تے باغیانہ تقریراں دل تے لائی رکھدیاں نیں پر ایس خامی دے نال کہ چھیتی ای دل بھر جاندا اے بالکل انج ای کیویں مسٹر چپس و جین آمیئر دا خشک ناول پڑھن دا تجربہ جو اپنی ساری بوریت سنے مستقل یاد دا حصہ بن جاندے نیں باٹا دیاں جتیاں دا مستقل سٹائل چھن چھن لش لش کردے کئی ٹرینڈز دی فراغت کر چکیا اے ایس لئی استقامت لش پش تے چھل چھل وچ نہیں لمی خاموشی چپ تے بوریت وچ اے جنے گہرے راگ تے مشکل کتاباں پڑھن دی عادت پا لین فیر تھلے اتر کے ہلکی چیز نہ سنی جا سکدی اے نہ پڑھی جا سکدی اے۔
Stem Cell Bankدے حوالے نال پوری دنیا وچ ایناں کم ہویا کہ پیدائش دے موقعے تے ای بچیاں دے سیل بینک وچ رکھ دتے جاندے نیں کہ بعد وچ اوکڑاں تے بیماری دی صورت وچ مریض نوں اوہدے اپنے ای سیلز دی پیوندکاری کرکے اوہدے خلیاں نوں بچپن والی تیز نشوونما دے دتی جاندی اے تے بے جان ڈیڈ سیلز وچ ایہ نشوونما والے اپنے ای خلیے گوڈیاں تے دوجے اعضاء دے اپریشن توں بچا کے قدرتی نشوونما کر دیندے نیں بہت سارے موجودہ مریضاں نوں اوہناں دے ای صحت مند حصیاں چوں سیل لے کے بیمار گٹے گوڈیاں وچ پیوند لا کے اپریشن توں بچا لیا جاندا اے۔
وحید زمان چنگے شاعر ہون دے نال نال بڑے چنگے‘ بااخلاق انسان دوست نیں پچھلے دیہاڑے اوہناں نے ایس حیران کن فیوچر ہسپتال دا گوجرانوالہ وچ دورہ کرا کے حیران کر دتا نوجوان شاعر احمدحماد علی ایس موقعے تے سن تے فیوچر ہسپتال دے روح رواں ڈاکٹر سرفراز مغل نوں مل کے اوہناں دی پاکستان لئی تے خاص کر گوجرانوالہ دی مٹی نال محبت نے بڑا متاثر کیتا ایہ اک اجیہا ہسپتال سی جتھے خوف تے دوائیاں دی مہک دا ناں نہیں سی پھُلاں دی خوبصورت ڈیکوریشن تے آرائش وچ بسیا کوئی فائیوسٹار ہوٹل یاں دلکش کلب تے ہو سکدا اے ہسپتال نہیں جدید ترین مشینری جہدے وچ امریکن روبوٹ ہیئر ٹرانسپلانٹ‘ لائیوسکوپی دا اہتمام‘ حسن دے نال سارے لوازمات بناں کسے تکلیف و حجت دے تھیٹر وچ ہے سن ہن لب و رخسار بناں غارہ و مشاطہ وی سنور سکدے نیں دنیا وچ حسن گواچ رہیا اے پر اجہے چنگے دل والیاں دی وی کوئی تھوڑ نہیں جو ساریاں سہولتاں پوری دنیا توں لیا کے اپنے علاقے وچ لاندے نیں اسیں ڈاکٹر سرفرازمغل اگے بڑی فرمائش کیتی کہ تسیں ایہ سب لہور لے آئو اوہناں آکھیا کہ روپیہ کمانا میرا مقصد نہیں اوہ آپ بڑے مصروف آئی سرجن نیں تے اوہناں دے بھائی ڈاکٹر عدنان وی اوہناں دے نال فیوچر ہسپتال دی ترویج و ترقی لئی دن رات کوشاں نیں۔
انج نہیں کہ وطن عزیز وچ کم نہیں ہو رہیا صرف اداریاں نوں چھڈ دیو تے فیر وی مشکل ترین صورتحال وچ وی لوک ایجادات کر رہے نیں پاکستان نوں دنیا نال جوڑن لئی دن رات کاوشاں کر رہے نیں۔ پچھلے تن ورھے ملازمت دے سلسلے وچ فیصل آباد وچ گزرے۔ فیصل آبادی گواہ نیں کہ میرے جان توں پہلاں آرٹ کونسل کنی سنسان سی اوتھوں واپس آن دے بعد ہور سنسان ہو گئی اے آرٹ نال عدم دلچسپی والے سفارشی لوکاں دی تعیناتی نااہل تے کمتر ذہنی سطح تے خوشامدی اپروچ نے فیصل آباد آرٹس کونسل دا حسن گہنا دتا اے اجے سینٹ دے انتخابات نے تکنیکی سطح تے وی بڑا مایوس کیتا اینے بھونڈے انداز وچ تے پاکستانی فلماں تے تھرڈ ریٹ گیسٹ ہائوساں وچ کیمرے نہیں لائے جاندے گلی محلے دے منفی فلمی تھیٹراں وچ وی اجہی کاریگری نہیں ہوندی جو سینٹ دے ہال وچ نظر آئی۔ ایناں وڈا تنخواہ دار ادارہ ووٹراں دی ول نوں ویکھن دی تھاں ناں تے خانے تے مہر وچ الجھیا ہویا اے۔ ایہ انج ای اے کہ جے Show of Hands ہووے تے جس وچارے دیاں چار انگلیاں ہون اوہدا ووٹ نہ منیا جاوے نویں سائنسی ترقی دے دور وچ کافر ویکسین بنان لگے ہوئے نیں تے اسیں کرونا توہمات وچ زہر دا ٹیکہ تے افواہواں ساڈا مقدر نیں پتہ نہیں اسیں کدوں ٹھیک ہوواں گے؟٭٭