گالھاں دینا منع اے

لكهت:ابرار ندیم

پہلے تسیں اک پرانا واقعہ سن لوو اگلی گل فیر کرنے آں۔ واقعہ ایہہ وے کہ کجھ ورھے پہلاں ایف ایم 101 ریڈیو پاکستان لہور تے بطور سینئر پروڈیوسر کم کرن دوران اک نویں آر جے میرے کول اپنے لائیو شو دی تفصیل ڈسکس کرن آئی تے میرے پچھن تے اوہنے اپنے شو دا جہڑا موضوع دسیا اوہ ایہ سی جے تسیں کسے نال محبت کردے او تے کیہ اوہدا کھلم کھلا اظہار کر دینا چاہیدا اے یاں نہیں۔ جہڑے لوک ریڈیو پاکستان دی تریخ توں واقف نیں اوہ چنگی طرح جان دے نیں کہ ریڈیو پاکستان اک اجیہا قومی ادارہ اے جہدی بنیادی ذمے واریاں وچ پاکستان دی نظریاتی سرحداں دی حفاظت تے سنن والیاں دی تعلیم و تربیت دے نال اوہناں نوں اک صحت مند تفریح دینا وی شامل اے۔ ساڈے ملک وچ ریڈیو پاکستان اوہ واحد نشریاتی ادارہ اے جہنوں اک مکمل فیملی چینل ہون دا وی اعزاز حاصل اے۔ اک اجہے ماحول وچ جد کہ اکثر نجی ٹی وی تے ریڈیو چینلز ریٹنگ دی دوڑ وچ اک دوجے توں اگے نکلن دے چکر وچ ساریاں اخلاقی تے صحافتی اقدار نوں بے دردی نال مدھ رہے نیں۔ ریڈیو پاکستان توں نشر ہون والے سارے پروگراماں وچ اج وی اوہناں سنہری اقدار دی پاسداری کیتی جاندی اے جو بطور پاکستانی ساڈی تہذیب و ثقافت دا مڈھلا حصہ نیں۔
ایہ اک اجیہا ادارہ اے جتھے کسے وی سکرپٹ نوں نشر کرن توں پہلاں اوہدے اک اک لفظ نوں پوری ذمہ داری نال پرکھیا جاندا اے۔ اوہناں جزئیات دا خیال نہ صرف ریکارڈ کیتے جان والے پروگراماں وچ رکھیا جاندا اے سگوں براہ راست نشریات وی اوسے ذمہ داری تے احتیاط نال پیش کیتی جاندی اے جہدے لئی نویاں آوازاں تے پروڈیوسراں دی خاص طور تے تربیت کیتی جاندی اے۔ ریڈیو پاکستان دے ایہو اوہ قاعدے نیں جہناں پاروں میں اپنی آر جے نوں آکھیا کہ ریڈیو پاکستان دی روایات سانوں اجہے کھلے ڈلھے موضوعات تے ایس انداز وچ بولن دی اجازت نہیں دیندیاں۔ جواب وچ اوس آرجے نے آکھیا سر تسیں منفی انداز وچ کیوں سوچ رہے او۔ میں عرض کیتا کہ بطور براڈ کاسٹر ایہ گل ساڈی ذمہ داریاں وچ شامل اے کہ اسیں ریڈیو پاکستان توں نشر ہون والے موضوعات دا ہر پہلو نال جائزہ لیے۔ ایس لئی سانوں اپنی ذاتی پسند یاں ناپسند توں ہٹ کے ہر ممکن احتیاط ورتنی ہوندی اے کہ ریڈیو پاکستان توں کوئی اجہی گل بات نشر نہ ہووے جہدا سنن والیاں تے کوئی منفی اثر پین دا اک فیصد وی امکان ہووے۔ اک ذمہ دار براڈ کاسٹر دی حیثیت نال سانوں ایہ گل وی ذہن وچ رکھنی ضروری ہوندی اے کہ ساڈے سنن والیاں وچ معاشرے دے ہر طبقہ فکر توں وکھووکھ عمر‘ جنس تے سوچ دے حامل پڑھے لکھے‘ ان پڑھ یاں گھٹ پڑھے لکھے اجہے لوک وی شامل نیں جو ریڈیو پاکستان تو ںنشر ہون والے کسے وی پروگرام دی بنیاد تے عین ممکن اے اپنے اپنے خاندانی تے علاقائی پس منظر‘ تعلیم تے ذہنی استعداد دے مطابق اپنی موجودہ یاں اگلی زندگی دا کوئی اہم فیصلہ یاں رخ متعین کرن۔ اوہ آر جے کہن لگی سر اوہ کیویں؟ میں کہیا فرض کرو تسیں اپنے سوچے ہوئے موضوع تے براہ راست پروگرام کردیاں جے تے ایف ایم ریڈیو دے فارمیٹ دے مطابق ایہدے وچ سنن والیاں دی آراء وی شامل کردیاں جے جہدے وچ ممکن اے کجھ آزادخیال لوک ایس موقف دی تائید کرن کہ جے تہانوں کسے نال محبت اے تے اوہدا کھلم کھلا اظہار ضرور کرنا چاہیدا اے۔ میں اپنی گل نوں ہور جاری رکھدے ہوئے کہیا ایس طرح دی بظاہر اک چھوٹی جہی غیرذمہ دارانہ غلطی نال معاشرے وچ اوہ وگاڑ پیدا ہو سکدا اے جہدا بعد وچ ازالہ ممکن نہیں۔ ایس ساری گل بات دے بعد اوس آر جے نے میرے توں باقاعدہ معذرت کردے ہوئے نہ صرف شو لئی فوری طور تے اپنا موضوع بدل لیا سگوں اگوں واسطے اپنے طرزفکر وچ وی تبدیلی دا وعدہ کیتا۔
ایہدے بعد اگلی گل ایہہ وے کہ ہن تسیں ایس واقعے نوں ذہن وچ رکھدے ہوئے گوانڈھی ملک بھارت دی سیاسی رہنما سونیاگاندھی دے اوس بیان نوں یاد کرو جہدے وچ اوہنے کہیا سی ہن سانوں پاکستان نال جنگ کرن دی لوڑ نہیں ایس لئی کہ اساں پاکستان نوں ثقافتی محاذ تے فتح کر لیا اے۔ ملک وچ مادر پدر آزادی دے حمایتی لبرل طبقیاں دے نام نہاد نمائندیاں اگے میری گزارش اے کہ اج اینے ورھے بعد سونیا گاندھی دے ایس بیان نوں ذہن وچ رکھ کے پچھلے دیہاڑیاں عورت مارچ دے ناں تے سڑکاں تے کیتے جان والے غدر تے ایہدے وچ بے شرمی تے مبنی کیتے جان والے مطالبیاں دے نال نجی تعلیمی ادارے وچ اک کڑی تے منڈے ولوں اک دوجے نال محبت دے کھلم کھلا اظہار دے حالیہ واقعے نوں ذہن وچ لیائو تے اپنے دل تے ہتھ رکھ کے ملک دی نظریاتی سرحداں تے تہذیب و ثقافت لئی برسرپیکار ساڈے ورگے گنوار تے ذہنی مریضاں نوں گالھاں دتے بناں ایہ دسو کیہ سونیا گاندھی نے غلط کہیا سی۔٭٭