اسٹیبلشمنٹ نال نہیں لڑ سکدا

آصف عنایت

پی ڈی ایم دے پچھلے ااجلاس وچ آصف علی زرداری دی تقریر دے ٹیکرز لیک ہوئے۔ پی ڈی ایم وچ جیہڑے فیصلے ہوئے اوہ کجھ ساہمنے آئے تے کجھ ساہمنے آ رہے نیں تے کجھ آندے رہن گے۔ میاں صاحب دی تقریراں تے ایہناں وچ عسکری قیادت دے اکابرین دے ناں لینا سیاست وچ ارتعاش پیدا کردا رہیا اے تے ایس دی باز گزشت آئندہ ورہیاں وچ آندی رہوے گی پر آصف علی زرداری نال منسوب بیانیہ جس دی قمر زمان کائرہ نے تصدیق وی کیتی اوہ الفاظ کجھ انج نیں کہ، کمزور ہو چکیا واں، میرا اک ای پتر اے تے میں اسٹیبلشمنٹ نال نہیں لڑ سکدا، مریم وی دھی اے اسیں ایس نوں جیل وچ کیوں گھلیے وغیرہ وغیرہ۔ حاصل گفتگو گل اینی ای اے کہ ’’کمزور ہو چکا ہوں، میرا اک ہی بیٹا ہے اور کوئی ہے بھی نہیں لہٰذا اسٹیبلشمنٹ سے نہیں لڑ سکتا۔‘‘
وارث شاہ دے مطابق دانشمند نوں غور ضرور کانا چاہیدا اے تاں دانشمند لوکاں نوں زرداری صاحب دے ایس بیان اُتے غور کرنا چاہیدا اے تے میاں محمد صاحب دے مطابق ایہہ گل خاصاں یعنی خاص اہل دانش دے ساہمنے کرن والی اے۔ میں نہیں جان دا کہ زرداری صاحب ایس بیان دے حوالے نال دانشوری تے دانشمندی دے کس معیار اُتے نیں پر جیہڑا بیانیہ اے جے دانشمند لئی ایس نوں شہیداں دے قبرستان گڑھی خدا بخش نوں ساہمنے رکھ کے سنیا سمجھیا تے غور کیتا جائے تے سمجھنا زیادہ مشکل نہیں۔
افراد، خاندان یا قبیلے کدی وی کسے ادارے دا مقابلہ نہیں کر سکدے پر جے سیاسی جماعتاں دی ہئیت و حیثیت مربوط سیاسی جماعت دی طرح کیتی ہوئے تے اوہ کسے ادارے توں گھٹ نہیں ہویا کردی کیوں جے عوام دی قوت دے ساہمنے کسے ادارے دی کوئی حیثیت نہیں ہویا کردی۔ ہرحال میاں محمد نواز شریف نے تنے حکومتاں اسٹیبلشمنٹ دے نال بھڑ جان دے نتیجے وچ کھوئیاں۔ جد کہ پیپلز پارٹی دا تے طرئئہ امتیاز ای ایہو رہیا اے کجھ تجزیہ کار قابل نفرت حد تیکر متعصب ثابت ہوئے نیں جویں اگلے دن اک نامعلوم (شاید ضیاء الدین) رضا رومی دے پروگرام وچ 1970 دے انتخابات وچ جناب بھٹو نوں سلیکٹڈ کہہ رہیا سی۔ بہرحال میاں نواز شریف نے حالیہ مہینیاں وچ پی ڈی ایم دے پلیٹ فارم توں جس طرح عسکری قیادت نوں نشانہ بنایا میرے خیال نال آصف علی زرداری دا بیان غور کیتا جائے اج نہیں تے کل ایہہ بیانیہ تاریخ دا حصہ بنے گا۔ تے اسٹیبلشمنٹ دے متعلق بوہت وڈا الزام ثابت ہوئے گا کہ 14 سال ہسدے ہسدے جیل کٹن تے ہر مقدمے وچ بری ہون والا سر عام کہہ رہیا اے کہ میرا اک ای پتر اے تے میں ہن کمزور ہو آں لہٰذا میں اسٹیبلشمنٹ نال نہیں لڑ سکدا گویا ایس دے پچھے شہیداں دا قبرستان اے جیہڑا ایسے جدوجہد جیہڑی ہن لڑائی تے دشمنی دی صورت اختیار کر گئی دے نتیجے وچ آباد ہویا اے۔ میرے خیال نال جناب نواز شریف دے دتے گئے بیان دے ساہمنے زرداری صاحب دی معذرت زیادہ گہرا الزام تے اسٹیبلشمنٹ لئی زیادہ نقصان دہ موقف اے۔
ہجے ایس دھول دی مٹی بیٹھی نہیں سی کہ سینیٹ وچ اپوزیشن راہنما دا قضیہ کھڑا ہو گیا۔ مریم نواز شریف پیپلز پارٹی اُتے ٹٹ پئے۔ بلاول بھٹو استدلال پیش کردے رہے پر مولانا فضل الرحمن دے سینیٹرز دا چپ رہنا سمجھ توں بالا تر ای نہیں مریم تے بلاول دی توجہ تے پریس کانفرنس دا موضوع ای نہ بنیا اج دی سیاست وچ ایکسٹرا دا کردار ادا کرن والے سراج الحق وی گیلانی صاحب نوں ووٹ دے گئے۔ گیلانی صاحب جیہڑے واحد سابق وزیراعظم نیں جنہاں نے اعتماد دا ووٹ متفقہ طور اُتے لیا تے سپیکر دے طور اُتے ویلے دی وزیراعظم تے اپنی رہنما نوں ناراض کر کے سپیکر دا کردار ادا کیتا۔ صدر نوں آئینی استثاء حاصل اے دی بنیاد اُتے خط نہ لکھن دی پاداش وچ دجالی فیصلے اُتے وزارت عظمیٰ توں فارغ ہوئے ایس قدر نہیں ڈگ سکدے کہ سینیٹ دے حزب اختلاف دے رہنما لئی اصولی موقف اُتے سودے بازی کردے۔ اصل وچ چلدے لمحے وچ اسٹیبلمشمنٹ تے سیاسی قوتاں وچ گوریلا جنگ جاری اے۔ منافقانہ روش ہتھیار اے۔ 18 ویں ترمیم وچ 58-2-B دے بدلن دے بعد اسٹیبلشمنٹ دا مورچہ ایوان صدر توں عدلیہ، بیورو کریسی، نیب تے نیاد پرستاں دے دفتراں وچ اے۔
جناب پرویز صالح جنہاں دا سیاست وچ 50 سالہ تجربہ اے تے عوامی حق حکمرانی دی خاطر درجناں وار جیل، شاہی قلعہ، گھر وچ نظر بند ہو چکے نیں دا مشورہ انتہائی بروقت تے موزوں ترین اے کہ مریم نواز تے بلاول بھٹو نویں نسل دے سیاسی رہنما تے نمائندے نیں۔ گوامی حق حکمرانی دے نعرے نال نکلے نیں ایہناں نوں معمولی گلاں اُتے اختلافات دی وجہ نال اپنے مقاصد توں انحراف نہیں کرنا چاہیدا۔ نہیں تے عوام وی مایوس ہون گے۔ مزید کہیا کہ 73 سال بعد ملک اج وی اوتھے کھڑا اے جد کہ بعد وچ بنن تے آزاد ہون والے ملکاں ایشین ٹائیگر بن گئے پرویز صالح نے زور دتا کہ اوہ سائوتھ افریقہ دی طرح قومی مفاہمت تے ٹروتھ کمیشن دا قیام ضروری سمجھدے نیں۔ آئندہ دے سفر لئی سچائی تے مفاہمت نوں بنیاد بنانا ہوئے گا۔ پرویز صالح دی ذاتی رائے وچ بڈھی ہوندی ہوئی نسل نویں نسل نوں دنیا تے وقت نال ہم آہنگ پاکستان دین وچ بُری طرح ناکام ہو گئی اے۔ ہن ساڈی امید نویں نسل اے جس نوں ساڈے بوئے ہوئے کنڈے چگن اُتے مامور نہیں کرنا چاہیدا تاں قومی مفاہمت تے سچائی کمیشن وچ سچ نوں باہر تے جھوٹ نوں دفن کر کے اپنے ماضی دی سچی تصویر تاریخ تے عوام دے حوالے کرنی ہوئے گی۔مفاہمت تے سچ دی بنیاد اُتے نویں نسل نوں دنیا تے وقت دے تقاضیاں نال ہم آہنگ ہو کے چلن لئی اپنی اہلیت نوں بروئے کار لانا ہوئے گا نہ کہ اوہ داغ دار ماضی وچ الجھ کے اک نویں بڈھی نسل بن جان تے ملک اوتھے کھڑا رہوے بلکہ مزید بربادی وچ دھکیل دتا جائے جد کہ میرے مطابق ایہہ سب گلاں اپنی تھاں کیہ اسٹیبلشمنٹ ، حکومت اپوزیشن، سول سوسائٹی، سوشل میڈیا، عدلیہ، انتظامیہ پارلیمنٹ جنہاں دا کھاندے نیں یعنی عوام دا وی کوئی ورث ہے کہ نہیں۔ 1740 ارب روپئے دا حالیہٹیکہ ایس مایوس تے تھکی ہوئی قوم توں ایس دی ہڈیاں دا چرغہ بنا کے اوہ وی آئی ایم ایف دی غلامی وچ وصول کرنا کتھے دی ٹیپو سلطانی اے۔ کوئی ہے جیہڑا وطن عزیز دا سوچے، کوئی ہے جیہڑا عوام دا سوچے، بیروزگاری، مہنگائی، دوائیاں دی قیمتاں وچ وادھا، لاقانونیت، سی پیک دی فریزنگ، گوادر دا غیر اعلانیہ حکم امتناعی، وطن عزیز دی خارجہ پالیسی (ایران اک فون کال اُتے اپنی پالیسی نہیں بدلدا، چین) اندرونی پالیسی، تعلیمی پالیسی، صحت پالیسی، اقتدار اعلیٰ سب دا سب گروی رکھ دتا گیا۔ اوہ ویلا آن کھڑا اے کہ پولیس، سول سرونٹ حتیٰ کہ فوج نوں دین لئی تنخواہواں دے پیسے نہیں ہون گے۔
پٹھ پوے اوہ سونا جیہڑا کناں نوں توڑے (اوہ سونا اگ دی بھٹی وچ سٹ دیو جیہڑا کاناں نوں توڑ دیوے)
انج دی حکمرانی انج دے ہائبرڈ نظام اُتے لعنت اے جس وچ لوک مر جان کوئی سنن والا نہ ہوئے تے سارے سنیک ہولڈر صرف تے صرف سیاست سیاست تے اقتدار اقتدار کھیڈ رہے ہون۔ حصول اقتدار تے ذاتی مفادات دی گوریلا جنگ جیہڑی حکمران طبقات وچ جاری اے نہ جانے کس انجام وچ مبتلا کر دیوے۔ اللہ خیر کرے۔