زندگی انمول اے

لكهت:رابعہ رحمٰن

اج انسان دی زندگی کنہی ارزاں ہو گئی کہ ریت دے ذریاں وانگوں ہر پاسے کھلری نظر آندی اے۔ اوہ انسان جس لئی فرشتیاں نوں سجیدہ واجب کیتا گیا۔ جنہوں اشرف المخلوقات دا درجہ عطا کیتا گیا۔ جس لئی رب کائنات نے فرمایا، میرا بندہ، میرا مومن، انسانیت دا علمبردار تے اج ایس رب دے بندے نال کنج سلوک روا رکھیا جا رہیا اے۔ ظلمت کدے دے دن تےاوہ سن جدوں جہالت سی۔ جدوں لوک پتھر رگڑ کے اگ جلاندے سن جدوں غاراں تے خیمیاں وچ لنگھی ہوندی سی۔ جدوں سفر طوالت پاروں مہینیاں وچ طے ہوندے سن۔ راستیاں دا تعین ستاریاں دی سمت نال کیتا جاندا سی۔ جدوں انسان انسانیت تے اپنے رب توں بے خبر سی۔ ظلم دی داستاناں نال تاریخ دے ورقے تے بے شمار کالے ہوئے پر ایس دور نوں اج دے دور مماثل نہیں کیتا جا سکدا۔ اودوں نہ انسان چن اُتے اپڑیا نہ ایٹمی طاقت دا کوئی امکان نظر آندا سی ، نہ علم دی روشنی چار سو ودھی سی نہ شعور و آگہی دی منزلاں طے کر کے انسان ستاریاں اُتے کمند پان نکلیا سی، نہ اک بٹن دبان نال دنیا ساڈے ساہمنے آ جایا کردی سی پر ایس بے شعوری دے زمانے وچ اینا فشار، اینا ظلم، اینی ستم ظریفی، اینی انسانیت سوزی فیر وی نہیں سی جیہڑا کہ ایس علم دی روشنی ، فصاحت و بلاغت، عقل و دانش، شعور و آ گہی، نے اج زمیں اُتے پھیلا رکھی اے۔ حرص و ہوس ہمیشہ دی محاجی اے۔ کیہ گزرے ورھیاں دے تاجدار اج نیں یا کہ اج دے تاجدار کل ہون گے۔ہر گز نہیں۔ کیہ ایہناں نوں ثریا نے زمیں اُتے نہیں دے ماریا۔ جنہاں نے اپنا مذہب بھلا دتا تے اسلاف دی تعلیم و تربیت نال روگردانی کیتی۔ مسلماناں نے جدوں وی اسلام دے ناں اُتے زمین دا کوئی ٹکڑا فتح کیتا تے صوفیا اکرام نے محبت نال عملاً اسلام پھیلایا۔ایسے طرح اسلامی ملکاں دا رقبہ ودھدا تے مسلماناں دی فتوحات تیز ہوندیاں گئیاں تے بے شمار اسلامی ملک صفحہ ہستی اُتے نظر آن لگے۔ ایس وچ کوئی شک نہیں کہ مسلماناں نوں اپنا آپ منوان وچ لازوال قربا نیاں دینیاں پیاں۔ بچیاں، بڈھیاں ، عورتاں تے جواناں نے اپنی جاناں دی پرواہ کیتے بغیر آئندہ آن والی مسلمان نسل لئی خون دی آبیاری نال تن تے شجر لائے تاں جے اج والی اللہ دی مخلوق نوں غلامی توں نجات مل جائے پر کیہ اج دا مسلمان آزاد اے۔ کیہ اج دا مسلمان پابہ زنجیر نہیں۔ پر انج کیوں اے کیہ مذہب تے عقیدے دے طور و اطوار وی کدی بدلیا کردے نیں۔ کیہ اللہ دے بندے دی صفات پانی دے بلبلے دی صورت ہویا کردی اے۔ نہیں تے فیرآخر انج کیوں اے۔ کیوں مسلمان ای ہر تھاں اُتے تحقیر و ذلت دے گڑھے وچ ڈگدا جا رہیا اے۔ آخر مسلماناں دا قتل عام ای کیوں۔
اسرائیلیاں، یہودیاں، استعماری تے صیہونی طاقتاں نال سلطنت روم و شام جاندی نظر آندی اے۔ مسلماناں دا انج قتل عام کہ معصوم بالاں دے سر تن توں جدا، ماواں دی گود وچ بے کفن جوان لاشے ، حوا دی دھیاں دی حرمت دی تذلیل دی داستاناں، لہو دریا دی صورت پھٹ رہیا اے تے کدھرے ایہناں ظالماناں نے دہشت گرداں تے طالبان دے ناں اُتے پاکستان نوں تباہ بربادی لئی نشانہ بنا رکھیا اے۔ کنہے بے گناہ معصوم خانداناں نوں اک لمحے وچ نیست و نابود کر دتا جاندااے۔ بالاں دے عالمی دن اُتے معصوم نوازائیدہ بالاں دے بے جان جسم کلمہ طیبہ دے غلاف وچ لپیٹ کے ماواں دفنان لئی زمین لبھدیاں نیں تے کدھرے پھُلاں، جگنوئواں تے ستاریاں جہے کومل جسم خاک بدہن ہو رہے نیں۔ ایہہ کنج شعور اے۔ ایہہ کنج ترقی اے۔ ایہہ کنج خناس انسان دے ذہن وچ بھر گیا اے۔ کیہ اج ایہہ ظلم کرن والے کل ایس زمین دے نیچے نہیں ہون گے تے کیہ فیر ایہہ زمین ایہناں نوں تھاں دیوے گی کہ فاسد ماداں وانگوں اپنے سینے توں کڈ کے گندے بدبو دار کوڑے دے ڈھیر اُتے اگل دیوے گی۔حیرت اے کہ انسانیت دا علمبردار اقوام متحدہ تے دوجی این۔ جی۔ اوز اینے وسیع پیمانے اُتے ہون والے مسلماناں اُتے مظالم تے اذیتناک حالات اُتے چپ کیوں نیں۔ دنیا دے کسے وی کونے وچ دوجے مذہباں دے بندیاں دے نال ذرا جہی نا انصافی اُتے ہر کوئی متحرک ہو جاندا اے پر میڈیا دے اینا واویلا کرن تے غزہ دے مسلماناں اُتے بے بہا ظلم ڈھان بلکہ ایہناں نوں صفحہ ہستی توں مٹان دی پرزور سازش تے بہیمانہ رویہ دے باوجود کسے دی زبان تیکر نہیں ملی۔ مسلماناں نے کیہ کجھ برداشت نہیں کیتا۔ کشمیر دے مسلماناں اُتے مظالم، جنگ آزادی 1947 دی تباہ کاریاں، بھارت دے بزدلانہ حملے۔ بنگلہ دیش دے علیحدہ ہو جان دا جان لیوا دکھ۔ دہشت گردی دی نام نہاد جنگ وچ ان گنت قیمتی جاناں دا ضیاع تے ایہناں دے خانداناں دی قربانیاں۔ آخر مسلمان کدوں تیکر برداشت کرے گا۔ اپنی غلطیاں تے گناہواں دا خمیازہ بوہت بھگت لیا۔ مسلمانو۔۔۔! اج اکٹھ دا ویلا اے۔ بغل وچ چھری منہ وچ رام رام کہن والیاں نوں پہچان کے اپنی راہواں متعین اپنے مقصد واضح کرن دا ویلا اے۔ کیوں نہ اسیں قدم تے دم بدم فیر توں اسیں اک ہو جائیے۔ دنیا دے کونے کونے وچ ودھے ہوئے مسلماناں دا اک پلیٹ فارم ہوئے۔ کوئی فرقہ، کوئی صوبہ، کوئی متعصب فکر کوئی شیعہ سنی نہ ہوئے۔ سب مسلمان ہون۔ سب دا ایمان اک ہوئے محمد خدا تے قرآن اک ہوئے۔ آزادی منشور ہوئے۔ انسانیت دستور ہوئے۔