حضرت باوا میراں شاہؒ

کئی اولیائے کرام دی دھرتی ہون پاروں بھیرہ نوں مدینہ اولیا وی کہیا جاندا اے

پیر فاروق بہاوالحق شاہ

ھیرہ نوں انج ای مدینہ اولیا کہیا جاندا اے ایتھے سینکڑاں اولیائے کرام آسودہ خاک نیں۔ ایہناں وچ اک وڈا ناں مباوامیراں شاہ دا اے۔ جنہاں دا اصلی ناں سید احمد شاہ بھیروی اے۔
حضرت میراں شاہ دی ولادت باسعادت رجب المرجب 979 متحدہ ہندوستان وچ ہوئی۔ آپ دے والدین پاک طینت، خوش بخت تے برگزیدہ بندیاں وچوں سن۔ آپ دی والدہ ماجدہ حافظہ قرآن سن۔ آپ دی پرورش تے تربیت دے دوران مسلسل ایہناں دی زبان اُتے قرآن کریم دی تلاوت جاری رہندی۔ انج تے آپ دا بچپن عام بالاں وانگوںگزریا سی عام بالاں دے برعکس اوہ زیادہ ویلا گھر یا مسجد وچ بسر کیتا کردے سن۔
آپ نے ابتدائی تعلیم اپنے گھر وچ اپنے والدین توں ای حاصل کیتی۔ آپ دی والدہ ماجدہ حافظ قرآن سی ایس وجہ نال بچپن توں ای قرآن کریم نال محبت تے شغف ایہناں دی شخصیت دا حصہ بن چکیا سی۔ جدوں آپ دی عمر مبارک 11 سال ہوئی تے آپ دے والد بزرگوار نقل مکانی کر کے دہلی تشریف لیائے جتھے آپ نے مختلف علماء تے رفقہا ء توں تعلیم حاصل کیتی۔ حضرت میراں شاہ نے دلی دے جید علماء کرام توں علم تے کسب فیض حاصل کیتا۔ حدیث، فقہ، تے تفسیر قرآن دی تعلیم وی دہلی دے علما خاص طور تے حضرت سید عبدالرحمن شاہ صاحب دہلوی توں حاصل کیتی۔ 20 سال دی عمر تیکر آپ نے صرف،نحو، علم فقہ، علم تفسیر تے علم اصول فقہ اُتے عبور حاصل کر لیا۔
علم فقہ اُتے عبور حاصل ہون تے تقوی تے پرہیز گاری دی بدولت مغلیہ دور حکومت وچ آپ نوں قاضی القضاء دے منصب اُتے فائز کیتا گیا۔ حضرت میراں شاہ، مغل شہنشاہ نورالدین سلیم جہانگیر دے عہد وچ (1014 تا 1036) وچ چیف جسٹس دے عہدے اُتے فائز رہے۔ ایہناں دا دور قضا مغلیہ دور حکومت دا سنہری دور سی۔ ایہناں ای دناں وچ جدوں مغلیہ دربار وچ سجدہ تعظیمی دا حکم دتا تے باوا میراں شاہ نے مجدد الف ثانی دی تقلید وچ سجدہ تعظیمی دے حرام ہون دا فتویٰ جاری فرمایا۔ جدوں آپ دی مخالفت کیتی گئی تے چیف جسٹس دے عہدے توں استعفیٰ دے دتا تے درویشی دی راہ اختیار کیتی۔
دلی نوں خیر آباد کہن توں بعد آپ سب توں پہلے شہنشاہ اولیاء حضرت خواجہ معین الدین چشتی اجمیری دے مزار اُتے تشریف لے گئے اوتھے حاضری دتی چلہ کشی کیتی تے کئی دن قیام پذیر رہے۔ ایس دے بعد عراق تشریف لے گئے تے بغداد شریف وچ حضور پیران پیر دستگیر شیخ عبدالقادر جیلانی محبوب دے مزار اُتے مسلسل 21 سال عبادت الٰہی وچ مصروف رہے۔ اوتھے درس حدیث دا سلسلہ شروع کیتا، ایس دے بعد آپ مدینہ منورہ حاضری ہوئے تے قریب 13 سال آقا دو عالم ﷺ دے روضہ انور دے جوار وچ لنگھائے۔ مدینہ منورہ توں ہمیشہ حج لئی پید ل سفر کیتا تے حج کیتے۔ آقائے دو عالم ﷺ نے آپ نوں خواب وچ آ کے ارشاد فرمایا کہ آپ پنجاب وچ جا کے تبلیغ دا فریضہ سرانجام دیو۔ آقا دو عالم ﷺ دے حکم اُتے آپ پنجاب ول عازم سفر ہوئے تے پنجاب دا سفر کردے ہوئے ضلع خوشاب دے علاقے وادی سون وچ تشریف فرما ہوئے۔ آپ دی ولادت دی خوشبو دور دراز علاقیاں تیکر ودھ گئی تے لوک جوق در جوق آپ دی خدمت وچ حاضر ہون لگے۔پر لوکاں دی بھیڑ توں اکتا کے موجودہ خوشاب دے نیڑے قصبہ گروٹ تشریف لے گئے ایتھوں آپ بیریل شریف تشریف لیائے جتھے اک فقیر گلاب شاہ دے کول قیام پذیر ہوئے۔
پیربل شریف توں بھیرہ اپڑن توں بعد سب توں پہلے مسجد حکیماں والی وچ قیام پذیر ہوئے تے فیر محلہ پراچگان وچ آ گئے تے ایتھے درس حدیث تے درس قرآن شروع کیتا ایسے مسجد وچ شمس العارفین حضرت خواجہ شمس الدین سیالوی دے جد امجد حافظ محمد شریف نوں بیعت نال سرفراز فرمایا تے خرقہ خلافت وی عطا فرمایا۔
حضرت میراں صاحب نے بھیرہ وچ رشد و ہدایت دا سلسلہ شروع کیتا۔ ہندو اکثریت دے شہر وچ توحید دی شمع روشن کیتی۔ کئی خداواں نوں پوجن والے لوکاں دے دلاں وچ محبت رسول ﷺ دی جوت جگائی۔ آقائے دو عالم ﷺ نال والہانہ عشق دی بنا اُتے جدو وی حضور اکرم ؐدا اسم گرام زبان اُتے آندا تے آپ اُتے رقت طاری ہو جاندی۔ تے حضور پاک ؐنال محبت دا ایہہ عالم سی کہ آقا عالمؐ دی سوا لکھ توں ودھ حدیثاں ازبر کر رکھیاں سن۔ آپ دی زبان فیض ترجمان وچ انج دی تاثیر سی کہ جیہڑا وی بندا آپ دی زبان توں نکلے ہوئے الفاظ سماعت کردا اوہ سدھے ایس دے دل وچ جا اتردے۔ آپ دے روحانی فیض دا ایہہ عالم سی کہ حضرت میاں شیر محمد شرقپوری فرماندے بھیرہ وچ میراں شاہ حکومت کر رہے نیں۔
آپ نے متعدد لوکاں نوں خرقہ خلافت عطا فرمایا۔ ایہناں وچ نمایاں ترین شخصیت تے حضور خانوادہ پیر سیال دے جداعلیٰ نیں۔ ایسے طرح آپ دے مزار مبارک دے نال اک بزرگ فیض بخش دا مزار اے اوہ وی آپ دے شاگرد تے خلفا وچ شامل سن۔ آپ دے تے خلیفہ وادی سون دے علاقے انگہ دے گل پیر شاہ سن۔ ایہناں دی عقیدت دا ایہہ عالم سی کہ اوہ بھیرہ آندے تے پیدل تے ننگے پیراں سفر کر کے آندے۔ حضور میراں شاہ دے خلیفہ ڈھوڈھا شریف ضلع گجرات وچ وی تشریف فرما سن۔
حضور میراں شاہ صاحب دا وصال تے 18 رمضان المبارک 1092ھ وچ 113 برس دی عمر وچ ہویا۔ عرس مبارک ہر سال چیت دے مہینے وچ ہوندا اے تے چیت دے ہر اتوار نوں ملک بھر توں ہزاراں عقیدت مند بھیرہ وچ آپ دی بارگاہ وچ حاضر ہوندے نیں تے فیوض و برکات سمیٹ دے نیں۔( ابوشاہین فاروقی دی کتاب تاریخ بھیرہ توں ماخوذ )