(ن) لیگ نوں فوج دے خلاف بولن دی قیمت چکانی پئے گی: وزیر داخلہ

کراچی( پنجابی میڈیاگروپ)وزیر داخلہ شیخ رشید دا کہنا اے مسلم لیگ (ن) نوں فوج دے خلاف زبان استعمال کرن دی قیمت ادا کرنی پوے گی۔ کراچی وچ میڈیا نال گل کردیاں شیخ رشید دا کہنا سی نیب، ایف آئی اے تے دوجے ادارے بڑا چنگا کم کر رہے نیں، فیر وی ایف آئی اے وچ ہور بہتری لئی کوشاں آں، ملکی معیشت سدھے پاسے جا رہی اے، پاکستان دی خارجہ پالیسی بہتر اے، چین تے دوجے ملکاں نال چنگے تعلقات نیں، عمران خان لئی خیر ویکھ رہیا آں، اوہناں دے خلاف کوئی سازش کامیاب نہیں ہووے گی، عمران خان 5ورھے پورے کرن گے تے اگلے الیکشن وچ وی ڈٹ کے مقابلہ کرن گے۔شیخ رشید نے آکھیا پی ڈی ایم ختم ہو چکی اے، مولانا فضل الرحمان توں آکھیا سی بالاں دے ہتھاں وچ نہ کھیڈو تسیں خراب ہوو گے، مولانا فضل الرحمان دی سیاست نوں بہت نقصان اپڑیا اے۔ آصف زرداری تاش چھاتی دے نال لا کے کھیڈ رہے نیں، پیپلزپارٹی دی قیادت سمجھدار اے پر (ن) لیگ نوں فوج دے خلاف زبان استعمال کرن تے قیمت ادا کرنی پوے گی۔ وزیر داخلہ دا کہنا سی عمران خان لئی اپوزیشن کوئی چیلنج نہیں، صرف مہنگائی چیلنج اے تے اوہ مہنگائی وی کنٹرول کر لین گے، رمضان پیکیج دا اعلان چھیتی کر دیتا جائے گا۔

اپنا تبصرہ گھلو