حکومت پنجاب دا 7 ارب روپئے دا رمضان پیکیج

جاوید یونس

ریاستی وسائل اُتے سب توں زیادہ حق عوام دا ہونداا ے حکومت ایہناں وسائل نوں بطور امانت اپنے کول رکھدی اے تے ایہناں نوں شہریاں دی فلاح و بہبود تے ریلیف فراہم کرن لئی زیر استعمال لیاندی اے۔جمہوری طرز حکومت وچ ریاست دی ذمہ داری نسبتاًٍٍٍٍٍٍٍٍٍٍٍٍٍٍ زیادہ اہمیت دی حامل ہوندی اے کیوں جے منتخب حکومت نہ صرف عوام نوں جواب دہ ہوندی اے بلکہ ایہنوں اپوزیشن دی شکل وچ اک مستقل مانیٹرنگ د وی ساہمنا کرنا پیند اے۔ جمہوریت دا حسن ایہہ وے کہ سارے شہری برابر دی حیثیت رکھدے نیں تے عوام دی خدمت حکومت دا سب توں وڈامقصد اے۔
وزیر اعلیٰ پنجاب سردار عثمان بزدار صوبے دے سارے عوام خواہ ایہناں دا تعلق کسے وی علاقے نال ہوئے دی فلاح و بہبود، ترقی و خوشحالی لئی بلاامتیاز اقدامات کر رہے نیں۔ حکومت عوام نوں ریلیف فراہم کرن لئی وی یکساں اقدامات کر رہی اے۔ ماضی وچ ترقی دا عمل مخصوص علاقیاں تیکر محدود رہیا پر وزیر اعلیٰ پنجاب نے صوبے دے سارے ضلعے خصوصا ماضی وچ نظر انداز کیتے گئے ضلعیاں لئی خصوصی ترقیاتی پیکج دا اعلان ایس ضلعے وچ جا کے کر رہے نیں۔
حکومت دے اولین ذمہ داری ہوندی اے کہ اوہ شیواں دی گرانی تے مصنوعی قلت نوں کنٹرول کر کے طلب و رسد دا توازن برقرار رکھدے ہوئے اشیائے صرف دیاں قیمتاں نوں مستحکم سطح اُتے رکھے تے انج دے مثبت تے ٹھوس اقدامات کرے کہ اشیاء عوام بندے دی قوت خرید توں باہر نہ ہون بلکہ ارزاں نرخاں اُتے کھلی مارکیٹ وچ وافر مقدار وچ موجود ہون۔مہنگائی نے غریب بندا خاص طور تے تنخواہ دار طبقے دے روز مرہ دے معمولات نوں بوہت زیادہ متاثر کیتا اے۔ حکومت ہر ممکن اقدامات کر رہی اے کہ شہریاں نوں روزمرہ ضرورت دے استعمال دی شیواں فراہم کیتی جا سکن تے مصنوعی قلت، مہنگائی، ذخیرہ اندوزی، ملاوٹ تے گھٹ تولن والے عناصر دے خلاف سخت قانونی کاروائی وچ لیائی جائے گی۔
وزیراعلیٰ پنجاب سردار عثمان بزدار نے رمضان المبارک وچ صوبے دے عوام نوں ریلیف دین لئی 7 ارب روپئے دے رمضان پیکج دا اعلان کردے ہوئے کہیا کہ پورے صوبے وچ ایس دوران 313 رمضان بازار لائے جان گے۔ آٹے دا 10 کلو دا تھیلا رمضان بازاراں وچ مارکیٹ پرائس توں 120 روپئے سستا ملے گا۔ رمضان بازاراں وچ 10 کلو آٹے دا تھیلا 300 روپئے وچ دستیاب ہوئے گا۔ صرف سسٹے آٹے دی فراہمی اُتے پنجاب حکومت تقریباً 3 ارب 70 کروڑ روپئے سبسڈی دیوے گی۔
رمضان بازاراں وچ کرونا ایس او پیز اُتے عملدرآمد یقینی بنایا جائے گا۔ خریداراں دی زندگیاں دے تحفظ لئی سماجی فاصلہ برقرار رکھنا لازمی ہوئے گا۔ محکمہ زراعت رمضان بازاراں وچ زرعی فیئر پرائس شاپس لائیاں جان گیاں۔ زرعی فیئر پرائس شاپس اُتے پھل تے سبزیاں 2018 دے ریٹ دے مطابق صارفین نوں دستیاب ہون گیاں۔ دال چنا، بیسن، کھجور تے دیگر اشیاء ضروریہ وی رمضان بازاراں وچ 2018 دے ریٹاں اُتے ملن گیاں۔ گھی، چکن تے انڈے مارکیٹ توں 10 توں 15 روپئے گھٹ قیمت اُتے رمضان بازاراں وچ ملن گے۔ مستقل بنیاداں اُتے ریلیف دین لئی حکومت نے سہولت بازاراں دا دائرہ کار وسیع کرن دا پلان تیار کیتا اے۔ ایس مقصد لئی وزیر اعلیٰ عثمان بزدار نے سہولت بازار اتھارٹی دے قیام دی ہدایت کردے ہوئے کہیا کہ سہولت بازاراں دے ذریعے اپنے عوام نوں مصنوعی مہنگائی توں مستقل نجات دلائواں گا۔
وزیراعلیٰ عثمان بزدار نے رمضان بازاراں دے انتظامات وچ خصوصی بچت تے کفایت شعاری دی ہدایت کردے ہوئے کہیا کہ رمضان بازاراں دے انتخابات لئی گھٹ توں گھٹ اخراجات کیتے جان تے ایس مد وچ بچائی گئی رقماں نوں عوام نوں مزید ریلیف دین لئی خرچ کیتا جائے۔ غریب بندے نوں ہر صورت وچ معاشی ریلیف دیاں گے۔ رمضان بازار دا آغاز 25 شعبان توں کیتا جائے۔ اوہناں نے کہیا کہ میں آپ رمضان بازاراں دے دورے کراں گا۔ صوبائی وزراء تے سیکرٹریز وی عوام نوں ریلیف فراہم کرن دے مشن وچ رمضان بازاراں دے دورے کرن گے۔
وزیراعلیٰ پنجاب سردار عثمان بزدار نے عوام نوں مہنگائی توں نجات دلوان تے مستقل ریلیف دین لئی پنجاب سہولت بازار اتھارٹی دے قیام دا فیصلہ کیتا جیہڑا کہ احسن اقدام اے پنجاب ماڈل بازار مینجمنٹ کمپنی ختم کر کے پنجاب سہولت بازار اتھارٹی دے قیام دی اصولی منظوری دے دتی اے۔ وزیراعلیٰ عثمان بزدار اتھارٹی دے پیٹرن انچیف تے صوبائی وزیر صنعت چیئر پرسن ہون گے۔ سہولت بازاراں وچ کسان پلیٹ فارم وی لائے جان گے تے کسان پلیٹ فارم دے ذریعے کاشتکار اپنی شیواں براہ راست فروخت کر سکن گے۔ سہولت بازار اتھارٹی پورے صوبے وچ سہولت بازاراں دے قیام نوں یقینی بنائے گی۔ سہولت بازاراں دا دائرہ کار ہر ضلعے تے ہر تحصیل تیکر ودھایا جائے گا۔ ایہہ بازار سال دے 365 دن فنکشنل رہن گے۔ سہولت بازاراں دے قیام نال عوام نوں مہنگائی توں نجات ملے گی تے حقیقی معنیاں وچ ریلیف ملے گا۔ اتھارٹی پورے صوبے وچ 400توں ودھ سہولت بازار قائم کرے گی۔ سستے سہولت بازاراں وچ نوٹیفائیڈ ریٹ اُتے دستیاب ہون گیاں۔ سستے سہولت بازاراں وچ اشیاء ضروریہ سرکاری ریٹاں اُتے ملن گیاں۔ وزیراعلیٰ نے کہیا کہ عوام نوں ریلیف دین تے پرائس کنٹرول لئی آخری حد تیکر جاواں گے۔اوہناں نے سستے سہولت بازاراں دے قیام لئی اضلاع وچ اراضی دی نشاندہی دا کم جلدی مکمل کرن دی ہدایت کیتی اے۔ پنجاب حکومت عوام نوں ریلیف دین لئی جو کجھ ممکن ہویا اوہ کردی رہوے گی۔ عوام دے حقوق دا ہر قیمت اُتے تحفظ یقینی بناواں گے۔ عوام نوں زیادہ توں زیادہ ریلیف فراہم کرنا ساڈی حکومت دا ایجنڈا اے۔
وزیراعلیٰ پنجاب سردار عثمان بزدار نے کہیا کہ مہنگائی اک وڈا مسئلہ اے تے ایس نال عام بندے دی زندگی متاثر ہوندی اے۔ ماضی وچ اشیاء ضروریہ دی قیمتاں وچ اتار چڑھائو دے نتیجے وچ عام بندے دی زندگی نوں انتہائی مشکل بنا دتا گیا تے الزام مارکیٹ فورسز نوں دتا گیا جد کہ ایہہ سارا سیکٹر Unregulated رہیا جس دا خمیازہ عام بندے نے مہنگائی دی صورت وچ بھگتیا۔ وزیراعلیٰ عثمان بزدار نے پولیس کانفرنس نال خطاب کردے ہوئے کہیا کہ کابینہ دے 42 ویں اجلاس وچ پاکستان تحریک انصاف دی حکومت نے اہم فیصلے کیتے جس دا فائدہ صوبے دے عوام نوں اپڑے گا تے ایہناں نوں مہنگائی توں حقیقی معنیاں وچ ریلیف ملے گا۔ ایہناں فیصلیاں وچ The Punjab Sugar Supply Chain Management Order 2021 تے The Pervention of Specuiation in Essential Commodities Ordinance 2021 دی منظوری شامل اے۔ پنجاب کابینہ نے چینی دی پیداوار ، ترسیل تے خرید و فروخت دے پورے نظام نوں ریگولیٹ کرن دا فیصلہ کیتا اے۔ پنجاب شوگر سپلائی چین مینجمنٹ آرڈر 2021 دے تحت شوگر ملز تے ڈیلرز دے گودام دی رجسٹریشن ہوئے گی تے صرف رجسٹرڈ ڈیلر ای چینی دی خرید و فروخت کر سکے گا۔ سپلائی چین مینجمنٹ آرڈر دے تحت شوگر مافیا نال نمبڑنا ممکن ہو سکے گا تے عوام نوں سستی چینی دی فراہمی یقینی بنائی جا سکے گی۔ کوئی وی فیکٹری، ڈیلر، ہول سیل ڈیلر 2.5 میٹرک ٹن توں زیادہ چینی سٹور نہیں کر سکے گا تے ایس توں ودھ چینی ذخیرہ کرن دی اجازت متعلقہ ڈپٹی کمشنر توں حاصل کرنی ہوئے گی۔ غیر رجسٹرڈ ڈیلر ہول سیل ڈیلر چینی دی خرید و فروخت نہیں کر سکن گے۔ کوئی وی شوگر مل غیر رجسٹرڈ ڈیلر نوں چینی فروخت نہیں کر سکے گی۔ ایس آرڈر دے تحت شوگر ملاں تے ہول سیل ڈیلر اپنا سارا ریکارڈ کین کمشنر نوں وکھان دے پابند ہون گے۔
پنجاب کابینہ نے The Prevention of Specutation in Essential Commodities Ordinance 2021 دی وی اصولی منظوری دے دتی اے عوام نوں ریلیف دین لئی ایس قانون دے تحت اشیاء ضروریہ جس وچ چینی، گندم ، خوردنی تی، چاول، دالاں وغیرہ عوا م نوں سستے داماں فراہمی یقینی بنائی جا سکے گی تے ذخیرہ اندوزی دی موثر روک تھام ممکن ہوئے گی۔ ایس دے تحت اشیاء ضروریہ دے نرخاں نوں سٹے بازی دے ذریعے ودھان دی روک تھام کیتی جا سکے گی تے سٹے بازی کرن والیاں دے خلاف کاروائی ہوئے گی۔ رمضان المبارک نیڑے اے تے اسیں صوبے دے عوام نوں ذخیرہ اندوزاں تے ناجائز منافع خوراں تں نہ صرف بچانا اے بلکہ ایہناں دے نال وی اوہ ای سلوک ہوئے گا جیہڑا قبضہ مافیا دے نال ہو رہیا اے۔ بیرسٹر شہزاد اکبر نے کہیا کہ وزیراعلیٰ بزدار دی قیادت وچ پنجاب حکومت نے اشیائے ضروریہ دی سستے داموں فراہمی تے شوگر مافیا دی سرکوبی لئی مثالی اقدامات چکے نیں جس اُتے اوہ مبارکباد دے مستحق نیں۔ اشیائے ضروریہ متعلق آرڈیننس دے نفاذ نال مثبت اثرات مرتب ہون گے۔ شوگر مافیا لئی مافیا دا لفظ بوہت نکا اے ایہناں لوکاں نے منی لانڈرنگ وی کیتی اے تے بے نامی اکائونٹس وی بنائے نیں ایس گروہ دے خلاف 10 ایف آئی آر ہو چکیاں نیں۔ شوگر انڈسٹری متعلقہ امور نوں ریگولیٹ کرن لئی وفاقی تے پنجاب حکومت اک پیج اُتے نیں ایس ضمن وچ ٹریک اینڈ ٹریس سسٹم وی نافذ کیتا جائے گا۔ پہلے تے وٹس ایپ اُتے ارباں کھرباں دی ڈیل کیتی جاندی سی تے چینی دی قیمت وچ خود ساختہ وادھا کیتا جاندا سی پر حکومتی اقدامات نال ایہہ پورا نظام ریگولیٹ ہوئے گا تے چینی دی قیمت نوں ودھن توں روکیا جا سکے گا۔
اشیائے ضروئیہ دی قیمتاں نوں کنٹرول کرن، وافر مقدار وچ فراہمی نوں یقینی بنان ، طلب و رسد وچ توازن برقرار رکھن دے خلاف نہ صرف تحصیل، ضلعی و ڈویژنل سطح اُتے پرائس کنٹرول کمیٹیاں موجود نیں بلکہ مجسٹریسی نظام وی موجود اے۔ حکومت نوں چاہیدا اے کہ اے کہ اوہ پرائس کنٹرول کمیٹیاں نوں فعال تے متحرک بنائے تاکہ حکومتی اقدامات دے ثمرات عوام تیکر اپڑ سکن۔ اشیاء دی مصنوعی قلت، مہنگائی، ذخیرہ اندوزی، ملاوٹ تے گھٹ تولن وچ ملوث عناصر دے خلاف سخت قانونی کاروائی عمل وچ لیائے جان تے ڈپٹی کمشنر ،اسسٹنٹ کمشنر تے مجسٹریٹ باہر نکلن تے حکومت ولوں دتے گئے رمضان پیکج اُتے عمل درآمد دے علاوہ رمضان بازاراں و سہولت بازاراں وچ اشیاء ضروریہ معیاری فراہم کیتیاں جان۔ انتظامیہ ایس امر نوں وی یقینی بنائے کہ دکاندار اشیاء دی قیمتاں دی لسٹاں نمایاں طور اُتے آویزاں کرن۔ حکومت نوں چاہیدا اے کہ عام بندے دی سہولت لئی وڈے شہراں دی اہم شاہرائواں اُتے الیکٹرانک بورڈ آویزاں کرے جنہاں اُتے اشیاء ضروریہ دی قیمتاں دے ٹیکرز چلدے رہن۔ ایہہ گل خوش آئند اے کہ وزیراعلیٰ پنجاب سردار عثمان بزدار نے صوبائی وزراء تے سیکرٹریز صاحبان نوں اضلاع الاٹ کیتے نیں تاکہ اہ رمضان بازاراں تے سہولت بازاراں دے اچانک وزٹ کرن تے حکومت اقدامات اُتے عمل درآمد نوں یقینی بنان۔ صوبائی وزراء دے دوریاں نال انتظامیہ اُتے وی اک چیک ہوئے گا تے اوہ بہتر طور اُتے اپنے فرائض سرانجام دے سکن گے۔
وزیراعلیٰ پنجاب سردار عثمان بزدار نے پورے پنجاب وچ چینی دی مقررہ ریٹ اُتے فراہمی یقینی بنان دا حکم دتا اے۔ پنجاب وچ چینی مقررہ ریٹ اُتے فروخت کرن لئی فوری اقدامات کیتے جان۔ وزراء ڈویژنل ہیڈ کوارٹر تے اضلاع وچ جا کے چینی دی صورتحال مانیٹر کرن۔ شوگر ملاں توں مقررہ ریٹ اُتے چینی فراہم کرن لئی قانونی کاروائی کیتی جائے گی۔ مقررہ ریٹ اُتے چینی فروخت نہ کرن والیاں دا سٹاک قبضے وچ لے کے نیلام کر دتا جائے گا۔ مہنگی چینی ویچن والیاں دے خلاف کاروائی تیز کیتی جائے۔ اوہناں نے کہیا کہ گراں فروشاں دے خلاف ایف آئی آر، گرفتاری تے جرمانے کیتے جان۔ غریب بندے نوں ہر صورت وچ معاشی ریلیف دینا چاہنے آں۔ وزیراعظم عمران خان دے ویژن دے مطابق مہنگائی دے الزالے تمام تر اقدامات کیتے جان گے۔ رمضان المبارک وچ سستی چینی سنے دیگر کھان پین والیاں شیواں فراہم کیتیاں جان گیاں۔