’’میری چیچی دا چھلا ّماہی لاہ لیا ‘‘

لكهت:اثار رانا

سیاست تے انقلاب وچ اک فرق آر یاں پار دا ہوندا اے سیاست وچ آر پار نہیں ہوندی ایس لئی بلاول بھٹو دی پارٹی نے موقعے توں بھرواں فائدہ چک لیا تے ایہو پاکستان دی سیاست دا حسن اے۔ ہن تے مسلم لیگ ن چیکدی پھردی اے میری چیچی دا چھلا ماہی لاہ لیا گھر جا کے شکایت لاواں گی‘ تے بھیا تسیں چیچی پھڑائی ای کیوں سی۔ بقول پنڈی بوائے دے آصف زرداری نال ہتھ ملا کے ویکھنا پیندا اے کہ انگلیاں پوریاں نیں۔ ہن تسیں چیچی پھڑائی اے تے کچیچی نہ وٹو تے گھر جا کے شکایت لان دا وی کوئی فائدہ نہیں۔ گھر والے کہڑا اپنا دامن بچا کے بیٹھے نیں۔ پتہ نہیں بلاول بھٹو مسلم لیگ نوں مشورے دے رہے نیں یاں اوہناں دا توا لا رہے نیں۔ کہندے نیں ٹھنڈا پانی پیو‘ کدی کہندے نیں ساڈی کامیابی مسلم لیگ ن نوں ہضم نہیں ہو رہی۔ بھائی ہضم ایس لئی نہیں ہو رہی کہ تسیں اوہناں دے 81 ووٹاں دی پوڑھی بنائی تے من ڈولے میرا تن ڈولے گا تے سینٹ وچ اپڑے۔ ایہو سین تہاڈے نال ہوندا تے ویکھدا کہڑی کاسوری تے کہڑا ہاجمولا تہاڈے اندرونی نظام دی ویلے سر ٹیسٹنگ کردا۔
دھوکہ دہی تے موقع پرستی پیپلزپارٹی دا مزاج تے نہیں سی حیرت اے تسیں ذوالفقارعلی بھٹو شہید دے فلسفے دا ای کریاکرم کر دتا۔ بی بی شہید دے نال تے اوہناں دے قاتل نہ لبھ کے تسیں پہلے ای کھلواڑ کر چکے او۔ بہرحال ایہ مننا پوے گا کہ جے موقع پرستی وچ مسلم لیگ ن سیر اے تے پیپلزپارٹی سواسیر اے۔ اسیں تے کدوں توں پی ڈی ایم مرحوم دی ہٹ ویڈیوز وچ بلاول دی مسکراہٹ توں سمجھ گئے سی کہ اوہ مریم نوں ویکھ کے دل ای دل وچ گنگنا رہے نیں کہ چل چلیے دنیا دی اوس نکرے‘ توں ایس نکرے تے میں اوس نکرے۔ ڈاکٹر نے سنتاسنگھ نوں کہیا کہ تہاڈی بیوی صرف دس پندراں دن دی مہمان اے‘ سنتا سنگھ اتھرو صاف کردے ہوئے بولیا ڈاکٹر جتھے 25 ورھے برداشت کیتا ایہہ دن وی برداشت کر لواں گا۔ میرے ہونہار بلاول تے مریم ہن واری اے میثاق جمہوریت دے اصل مذاق جمہوریت بنان دی۔ کڈھو ہن دوویں اپنیاں اپنیاں جیباں چوں ماضی دے گندے انڈے تے مارو اک دوجے نوں۔ کاش تسیں سنتا سنگھ وانگوں برداشت پیدا کر لیندے۔ میں بار بار کہنا واں کہ جمہوریت نوں جناں نقصان پیپلزپارٹی تے مسلم لیگ دی رقابت نے اپڑایا ایناں تے ضیاء الحق تے مشرف نے نہیں اپڑایا۔ تسیں سو واری اک پلیٹ فارم تے اکٹھے ہو جائو تہاڈے بیک گرائونڈ وچ اک ای گانا چل رہیا ہوندا اے ساڈا چڑیاں دا چنبہ وے بابل اساں اڈ جانا۔
بھاویں مریم بی بی غالب دا ایہ شعر گنگناندیاں ہون گئیاں۔
کاوے کاوے سخت جانی ہائے تنہائی نہ پوچھ
صبح کرنا شام کا لانا ہے جوئے شیر کا
ایتھے کاوے کاوے توں اوہو مراد اے جو چاچا غالب دے دماغ وچ سی۔ تسیں جے ایہنوں دوجا کاوے کاوے سمجھ رہے او تے جسٹس (ر) عظمت سعید رنج ہو سکدے نیں۔ کیوں جے ایہ براڈشیٹ والا کھیڈ ہن قوم دی جان چھڈے نہ چھڈے ایہدے نال جڑے ہر کردار نوں رول کے رکھ دیوے گا۔ ایہ کاوے موسوی پٹواری دا منڈا اے جو ساریاں نوں دوروں دوروںاکھیاں مارے گا۔
ساڈے ورگا پاکستانی تے ایہ نہیں کہ عدالت دے قابو نہ آوے تے نیب جپھا مار دیوے کاوے کاوے نے تے رپورٹ نوں ای رد کرکے آوے دا آوا ای وگاڑ دتا تے ایہنوں عدالتی تریخ تے اک دھبہ قرار دتا اے تے ایس ویلے اسیں ایہناں دی آڑ وچ اپنے دل دی ریجھ پوری کر رہے آں کہ پاکستانی انصاف پیدائش توں لے کے اج تک بس مصلحت دی تان تے تاتاتھیا کردی رہی اے۔ کاش ساڈے عدالتی نظام وچ کانیلس‘ بھگوان داس تے دراب پٹیل ہمیشہ موجود رہے۔ بہرحال ہن براڈشیٹ ایشو نوں کھڈے لائن لانا ممکن نہیں۔ ددھ دا ددھ تے پانی دا پانی ہونا چاہیدا اے۔ بنتاسنگھ بھنگ گھوٹ رہیا سی سنتاسنگھ بولیا دنیا چن تے اپڑ گئی تے توں بھنگ گھوٹ رہیا ایں۔ بنتا بولیا ہن اک گلاس پی لاں میں وی چن تے اپڑ جاواں گا۔ اسیں 20کروڑ بنتے بھنگ پیتے بناں چن دے چکور آںنہیں تے قومی خزانے تے ایناں وڈا ڈاکا پیا‘ رضیہ غنڈیاں وچ پھسی رہی تے ہر اک نے حصہ بقدر جثہ رج کھادا تے جہناں دے خون پسینے دی کمائی ایہ دولت سی اوہ بھکھے مردے رہے‘ وعدیاں‘ نعریاں‘ دعویاں تے خواباں دی بھنگ پی کے ایہ لیڈر توں چھلا دے جا نشانی تیری مہربانی کہندے رہے۔ ایہناں دی جدوں وی واری آئی کدھرے نہ کدھرے گھگو رو پیا۔ کیوں نہ آئین وچ ترمیم کر دیئے خزانہ تے غریب دی عزت طاقتوراں نوں لٹن دا حق ہووے گا تے جہدی واری ہووے گی اوہ رج کے واری لوے گا۔
ساڈی قسمت وچ بس لسٹاں ای رہ گئیاں نیں کدی بلیک لسٹ‘ کدی گرے لسٹ تے کدی ریڈلسٹ‘ غریب دی جورو ساریاں دی بھابھی ہوندی اے۔ سانوں تے لگدا اے پوری دنیا نوں سانوں بھابھی دا عالمی ایوارڈ دے دینا چاہیدا اے۔ ہن ایہناں لندن دے کالے دل والے گوریاں نوں ویکھو ڈگے کھوتی توں نیں تے غصہ پاکستان تے کڈھ رہے نیں۔ کرونا دی تریجی لہر گھلی وی آپ برطانیہ نے تے سفری پابندی وی ساڈے تے لا دتی۔ بھارت‘ جرمنی‘ فرانس حالاں کہ بنگلہ دیش وچ کرونا دی شدت ساڈے توں ڈھیر ودھ اے پر ریڈلسٹ ساڈے مقدر وچ آئی۔ مجال اے ایہدے تے بطور نمائندہ قوم حکومت نے ذرا وی احتجاج کیتا چوں چاں کیتی ہووے۔ شاید ساڈا یقین اے کہ جس طرح پاکستان نوں لٹن والیاں‘ گالھاں کڈھن والیاں نوں برطانیہ اپنی جھولی وچ گرائپ واٹر پلاندا اے کل نوں سانوں وی گود لے سکدا اے۔ ٹھیک اے بھیا تسیں سارے اپنے کل دی فکر رکھو ایس قوم دا کیہ؟ نہ ایہدا کل سی نہ اج اے تے نہ آن والا کل۔ ایہ تے بس بالن اے طاقتوراں دی بھٹھی دا۔٭