منی لانڈرنگ دے الزامات، جہانگیر ترین نے ایف آئی اے نوں جوابات جمع کرا دتے

لہور( پنجابی میڈیا گروپ)پی ٹی آئی رہنما جہانگیر ترین ولوں منی لانڈرنگ دے الزامات تے فیڈرل انوسٹی گیشن ایجنسی (ایف آئی اے) نوں 8سوالاں دے جواب جمع کرا دتے نیں۔ جہانگیر ترین ولوں ایہ جوابات جے ڈی ڈبلیو دے سیکرٹری دفتر راہیں جمع کروائے گئے۔ ایف آئی اے ایہ جوابات جائزہ لین دے بعد 22اپریل نوں عدالت وچ جمع کروائے گا۔ خیال رہے ایف آئی اے نے جہانگیر ترین تے علی ترین توں اگست 2020ء وچ 8سوالاں دے جواب منگے سن، جہڑے اجے تک جمع نہیں کروائے جا رہے سن۔ ذرائع دے مطابق ایف آئی اے نے جہانگیر ترین توں جے کے فارمز دی ساری مشینری دی اصل رسیداں، 35ہزار ایکڑ دے رقبے دے ثبوت، ایم سی بی بینک دی رپورٹ، مشینری، تخمینہ رپورٹ، برطانیہ وچ خریدی گئی جائیداداں دی منی ٹریل جمع کروان دا آکھیا گیا سی۔ ایف آئی اے ذرائع دا کہنا اے جائزہ لیا جائے گا کہ اوہ متعلقہ سوالات دے جوابات نیں یا فیر غیر متعلقہ جوابات دتے گئے نیں۔

اپنا تبصرہ گھلو