پی ڈی ایم اللہ نوں پیاری ہو گئی؟

عدم اعتماد تے حکومت ڈیگن دے افرادی فیصلے بھیانک خواب ثابت ہون گے جنہاں دی تعبیر صرف پشیمانی ہوندی اے

مشتاق سہیل

پی ڈی ایم صرف 6 مہینے دی عمر وچ اللہ نوں پاری ہو گئی۔ اناللہ واناالیہ راجعون۔ پیدائش دے ویلے کیہ جوش و جذبہ ویکھن نوں ملیا سی خوشیاں منائیاں گئیاں۔ مٹھائیاں تقسیم ہوئیاں۔ مولانا فضل الرحمان بزرگ سن پرورش دی ذمہ داری ایہناں نوں ملی اوہناں نے ای کن وچ اذان دتی۔ درازی عمر دی دعا کیتی پر اللہ نوں ایہو منظور سی، بن کھلے مرجھاگئی۔ سانحہ ارتحال افسوسناک ، اپوزیشن حلقیاں وچ صف ماتم وچھ گئی۔ مولانا غم نال نڈھال، سربراہ سن غم دیدنی، ناقابل بیان اوہناں نے گھر وچ اپنے آپ نوں قرنطینہ کر لیا۔ پوری دنیا وچ جگ ہنسائی ہوئی۔ کیہ کیہ گلاں سنن نوں مل رہیاں نیں۔ سوشل میڈیا اُتے کسے نوں مل جوئیہ ناں دی شاعرہ دی غزل نظر توں گزری۔ مطلع حسب حال لگیا۔
منسوب چراغوں سے طرفدار ہو کے
تم لوگ منافق ہو منافق بھی بلا کے
پتہ نہیں شاعرہ دا مخاطب کون سی پر ساری علامتاں تے اپنیاں وچ ملیاں۔ سیاست دان ایدھے دے ہون یا اُودھے دے بغل وچ چھری منہ اُتے بھائی جان، رات دن اک دوجے نوں ڈیگن وچ مصروف، پی ڈی ایم اے این پی دے علیحدگی دے اعلان توں اوندھے منہ ڈگی تے تعزیتی پیغامات دا سلسلہ شروع ہو گیا، اللہ بخشے بڑی پرجوش سی سوچیا سی کجھ دن بلاگلا رہے گا پر اوہ تے ٹھس ہو گئی۔ ٹائیں ٹائیں فش، شیخ صاحب دی باچھاں کھل گئیاں۔ آپا فردوس خوشی نال ’’پھولی نہ سمائیں‘‘ اک محترم نے صدا لائی حکومت ڈیگن نکلے سن آپ ای ڈگ گئے۔ ادھورے قافلے توں منزل کنج ملے گی۔ بقول شاعر
دیے جلائے تو انجام کیا ہوا میرا
لکھا ہے تیز ہوائوں نے مرثیہ میرا
مرثیہ تمام ہویا پر حیرت نے پچھیا پی ڈی ایم یعنی پاکستان ڈیمو کریٹک موومنٹ یعنی پاکستانی جمہوریت تحریک واقعی ختم ہو گئی؟ امید نے کہیا پتہ نہیں فیر پچھیا کیہ پی ڈی ایم ہن تیکر باقی اے؟ جواب ملیا پتہ نہیں، پتہ کیتا اے؟ پتے دی گل ایہہ وے کہ بقول غالب
ہاں کھائیو میت فریب ہستی
ہر چند کہیں کہ ہے نہیں ہے
اے این پی علیحدہ ہو گئی۔ پیپلز پارٹی علیحدگی اُتے تلی بیٹھی اے شاید کالم دی اشاعت تیکر آر پار ہو جائے جس دے نال ہتھ ہویا اوہ حیرت وچ گم جس نے ہتھ کیتا اوہ اپنی ’’سیاسی پختگی‘‘ اُتے نازاں، علیحدگی دی فوری وجہ دونواں پارٹیاں نوں اظہار وجوہ دے نوٹس کیوں دتے گئے۔ یعنی ’’سبک سربن کے نہ پوچھیں کہ ہم سے سرگراں کیوں ہو ‘‘ سینیٹ انتخابات نے کچے اتحاد دی دیوار ڈیگ دتی۔رضی اختر شوق نے کہیا سی ۔
دیوار کیا گری میرے کچے مکان کی
لوگوں نے میرے صحن میں رستے بنا لیے
یاراں نے اتحاد دے خاتمے دے بینڈ باجے وجا دتے۔ہر دوجے ٹی وی چینل اُتے بھڑاس کڈی جا رہی اے۔ ایہناں انتخابات وچ قائد حزب اختلاف دے چنائو نال گل وگڑی۔ پیپلز پارٹی نے سربراہ اجلاس دے فیصلے دے برعکس یوسف رضا گیلانی نوں اپوزیشن لیڈر بنان اُتے اصرار کیتا۔ فیصلے دے مطابق چیئر مین سینیٹ پی پی تے اپوزیشن لیڈر ن لیگ نال ہونا سی۔ بدقسمتی نال گیلانی چیئر مین دا الیکشن ہار گئے 7 ووٹ مسترد ہوئے شور مچیا پر مسترد کیتے جان دے فیصلے نوں چیلنج کیوں نہ کیتا گیا۔ ایس دے بجائے گیلانی نوں قائداپوزیشن بنان دی ضد، حکمران اتحادی باپ دے 5 ووٹ لئے تے اپوزیشن لیڈر بن گئے۔
وفاقی وزیر دا پروٹوکول ملے گا ن لیگ منہ دیکھتی رہ گئی۔ مریم نواز نے لکیر کھینچ دتی پیپلز پارٹی اپنے گھر خوش، بلاول بھٹو کامیابی اُتے اینے جذباتی ہوئے کہ کلے موجودہ حکومت نال لڑن نوں تیار، یوسف رضا گیلانی نے جانے کنج کہہ دتا کہ ضرورت پئی تے حکومت دی وی اواز بنن گے۔ شاید 5 ووٹاں دا قرض چکانا چاہندے سن ایتھوں ای دراڑ پئی۔ مولانا نے پی پی تے اے این پی نوں شوکاز نوٹس دتے۔ ایہو نوٹس علیحدگی دی وجہ بن گئے۔ کنج دا شاندار اتحاد سی کہ شامل پارٹیاں جو مرضی کرن ایہناں توں پچھیا نہ جائے کہ آپ دے منہ وچ دند کنہے نیں۔ تے ایہناں دندان آز توں کنج کنج نوں کٹ رہے نیں۔ پی ڈی ایم وچ شامل سارے جغادری تے بقول شخصے 10 ہزار سال قبل مسیح دے بزرگ لیڈر کم عقل، 32 سالہ نوخیز لیڈر آئن اسٹائن کہیا کہ جمہوری انداز وچ تحریک کنج چلانی اے۔ ایہہ صرف اسیں جاننے آں پنجاب وچ سلیکٹڈ وزیراعلیٰ نوں ڈیگ کے اگے ودھدے تے اسلام آباد اپڑدے ای حکمران آپ نس جاندے۔ جذباتی فیصلے انج دے ای ہوندے نیں۔ پنجاب وچ 6 ارکان اسمبلی وزیراعلیٰ نوں کنج ڈیگن گے۔ شہنائی دے شور وچ طوطی دی اواز ویکھو، ’’سلیکٹڈ وزیراعلیٰ ‘‘ نوں کنج تے کدوں ڈیگدے نیں۔ جواب ایہہ وے کہ کوئی جواب نہیں، اپنی اپنی ڈفلی اپنا اپنا راگ، اپنے اپنے مفادات اپنے اپنے رابطے، سب کجھ سیاسی پسپائی دا نتیجہ، کھیر پکائی جتناں نال دلیہ بن گیا۔ پی ڈی ایم مفادات دے حصول لئی بنائی سی؟ مفادات حاصل ہو گئے ۔ سارا فائدہ پیپلز پارٹی نے اٹھایا۔ اول آخر نقصان ن لیگ نوں ہویا۔ ن لیگ ای ہمیشہ نقصان کیوں اٹھاندی اے؟ بابا جی توں پچھیا بولے ن لیگ دا بیانیہ وڈی حد تیکر نظریاتی، آئینی تقاضیاں دے مطابق پر رویہ غیر لچکدار دوراندیشی دی کمی، ویلے اُتے فیصلے کرن دی سمجھ نہیں، سیاست نوں ہمیشہ بازیچہ اطفال سمجھیا تے نقصان چکیا۔ عوام شخصیت نال پیار ضرور کردے نیں پر شخصیت منظر توں غائب ہو جائے تے مایوس وی جلدی ہو جاندے نیں تے ایدھے اُودھے ویکھن لگدے نیں۔ جنہاں دے ہتھ باگ ڈور اے اوہ جھکان دی کوششاں وچ لگے نیں پر بقول ن لیگی لیڈراں دے ہن کیہ جھکن گے تن وار زمین چٹ چکے ہر وار ایہو ہو رہیا اے۔ دو تہائی اکثریت توں حکومت بنائی تنے وار بیک جنبش قلم توڑ دتی گئی۔کدی ہائی جیکر کدی غداراب تاحیات نااہل تے اشتہاری، سزا دین والا دبائو دے اعترافات دے بعد اللہ نوں پیارا ہو گیا ۔ سزا باقی، بابا جی بولے پتر انج کنج چلے گا۔ بابا جی پرانے دور دے بزرگ 2018 دے بعد توں تے انج ای چل رہیا اے۔ پی ڈی ایم دی شکل وچ اپوزیشن نے بھاری پتھر ڈیگن دی کوشش کیتی سی حکومت کجھ دن پریشان رہی پر بیل منڈھے نہ چڑھ سکی کسے مالی نے تنے اُتے ضرب لائی اتحادیاں وچ فساد پھیل گیا۔ ہن اپنے اپنے گھر دے باہر بہہ کے ’’سلیکٹڈ‘‘ دے خلاف نعرے لان گے۔غلطی کس دی اے؟ کس دی وی ہوئے پوری اپوزیشن خمیازہ بھگتے گی، نیب نے سارے اپوزیشن لیڈراں دے کیسز ٹیبل اُتے رکھ لئے نیں کہن نوں جہانگیر ترین وی ریڈار اُتے نیں پر آپا فردوس نوں یقین اے کہ ایہناں نوں جلدی ای کلیئرنگ سرٹیفکیٹ مل جائے گا۔ اونج وی پنجاب اسمبلی دے 22 تے قومی دے اٹھ ارکان ایہناں دے پچھے نیں۔ ایہناں نوں کجھ ہویا تے تحریک انصاف پچھے رہ جائے گی۔ کجھ بہی خواہواں دا خیال اے پی ڈی ایم اللہ نوں پیاری نہیں ہوئی دودھڑیاں وچ بٹ گئی اے ایہہ ہور وی بُرا ہویا بے ضرر بنا دتی گئی۔ پی ڈی ایم توں دو جماعتاں بیک آئوٹ کر گئیاں ہن پنج جماعتاں اپنے 27 سینیٹراں دے نال آزاد گروپ د شکل وچ سینیٹ وچ موجود رہن گیاں۔ دونواں جماعتاں ن لیگ تے جے یو آئی دے کول افرادی قوت موجود اے پنج جماعتاں دی پی ڈی ایم اک پاسے دو جماعتاں پیپلز پارٹی تے اے این پی دی ترقی پسند پی ڈی ایم دوجے پاسے حکومت دا کیہ وگڑے گا اول آخر نقصان اپوزیشن دا ہوئے گا۔ جلتی پر تیل چھڑکنے والے مسلسل اسپرے کرن تے اگ بھڑکان وچ لگے۔ حافظ حسین احمد نے وی اک بوتل اٹھا رکھی اے ایہناں دے نیڑے غیبت حرام سگے بھائی دا گوشت کھان دے مترادف پر ’’ سیاسی غیبت‘‘ جائز بلکہ ضروری، صورتحال دھماکہ خیز عقل و دانش توں کم لیا جائے ورنہ ’’دلوں کی الجھنیں بڑھتی رہیں گی، اگر کچھ رابطے باہم نہ ہوں گے‘‘
اپوزیشن لیڈراں نوں اطمینان نال بہہ کے بلکہ لیٹ کے اکھاں بند کے سوچنا چاہیدا اے کہ ’’سفر وچ کجھ نہ کجھ تے بھُل ایہناں توں وی ہوئی اے، جو پچھے سن اوہ سب اگے نکلدے جا رہے نیں۔ عدم اعتماد تے حکومت ڈیگن دے افرادی فیصلے بھیانک خواب ثابت ہون گے جنہاں دی تعبیر صرف پشیمانی ہوندی اے۔ جتھوں تیکر حکومت دے ڈیگن دا تعلق اے اوہ اپوزیشن توں نہیں اپنے بوجھ توں ڈگے گی کدوں ڈگے گی جدوں حکم ہوئے گا۔