کرونا دی گریٹ

خلیل اوجلہ

کرونے نے ہور کجھ کیتا ہووے یا نہ، اک کم ضرور کیتا،دوکاناں شام چھ وجے بند ،کوئی بندہ ماسک توں بغیر گھروں باہر نہیں جا سکدا،اک دوجے نال ہتھ ملان توں پرہیز،نجی محفلاں دی حوصلہ شکنی،جلسے جلوس ختم ،شادی ہال بند،ہفتے چ 3 دن کرونے توں بچ کے گھر بیٹھنا، ہوٹلاں چ کھابے کھان تے پابندی ،سنیا دو دن لئی ٹرانسپورٹ وی بند کیتی جارہی اے۔۔
مسٹر کرونا
جے ممکن ہوسکے تے ایناں کماں ول انتہائی توجہ دی لوڑ اے۔
دنے سارا دن بازاراں چ موڈے نال موڈا وج رہیا اے ،رشوت سپیڈ پھڑیں بیٹھی اے،تاجراں چھری تیز کرلئی اے،پٹواری دویں ہتھیں کساناں نوں لٹ رھے نیں،سبزی والیاں گوشت نوں پچھاں سٹ دتا اے۔
نک تے ماسک پاو فر باہر جاو ماسک دی ڈوریاں کن تے چڑھاو تے او ٹٹن نوں تیار کھلوتیاں ہندیاں نیں فارماسوٹیکل والے سینی ٹائیز مہنگے ویچ رھے نیں۔ڈاکٹراں نوں ویکھدے ای غریب بندے نوں بخار چڑھ جاندا اے۔۔۔
مسٹر کرونا ہن تے کجھ ریلیف دا سوچ گورئمنٹ سکولاں والے لڈیاں مار رھے نیں ربا سارا سال ای کرونا رھے پرائیویٹ سکولاں والے تیری جان نوں روندے پے نیں۔ آن لائن دے ناں تے فرنچائزڈ فیساں بٹور رہے نیں۔ جے ایہناں دا تیرے کول کوئی حل نہیں، فر توں ساڈا پکا دشمن تے دونمبری کرن والیاں دا پیٹی بھرا ایں۔