ضمنی الیکشن دا اِک ہور معرکہ

تحریر اکرم عامر سرگودھا

این اے 75 دے ضمنی الیکشن دے بعد ہن عوام دی توجہ پی پی 84 خوشاب دے پنج مئی نوں ہون والے ضمنی الیکشن اُتے لگ چکی اے ، قومی اسمبلی دے حلقہ 75 وچ مسلم لیگ ن دی سیدہ نوشین دی 16 ہزار 643 ووٹاں دی برتری توں کامیابی نے واضح کر دتا کہ قبل ازیں ہون والی پولنگ وچ حکومت نے دھند دی آڑ وچ 23 پولنگ اسٹیشناں دے پریزائیڈنگ آفیسرز نوں 6 گھنٹے تیکر نامعلوم مقام اُتے رکھ کے نتائج تبدیل کر کے حکومتی امیدوار نوں کامیاب کران دی کوشش کیتی سی تے 23 پولنگ اسٹیشناں دے نتیجے نوں متنازعہ بنا دتا سی۔تے ایسے تناظر وچ پی ٹی آئی دے امیدوار علی اسجد ملہی نے الیکشن کمیشن نال رجوع کر کے استدعا کیتی کہ ایس دی کامیابی دا نوٹیفکیشن جاری کیتا جائے۔ بصورت دیگر صرف متنازعہ 23 پولنگ اسٹیشناں اُتے دوبارہ پولنگ کرائی جائے۔ پر مسلم لیگ ن دی قیادت ایس توں پہلاں ایس نوعیت دا تلخ تجربہ بھگت چکی سی تے این اے 91 دی جتی نشست ہر گئی سی حالانکہ 11 مہینے تیکر مسلم لیگ ن دے ڈاکٹر ذوالفقار علی بھٹی بطور ایم این اے رہے، ایہناں دے مدمقابل پی ٹی آئی دے عامر سلطان چیمہ نے الیکشن کیشن نال رجوع کر کے موقف اختیار کیتا سی کہ ریجنل الیکشن کمیشن آفس سرگودھا وچ 20پولنگ اسٹیشناں دے تھیلے کھول کے ایہناں دے ووٹ ٹمپر کیتے گئے نیں جس اُتے الیکشن کمیشن آف پاکستان نے متنازعہ 20 پولنگ اسٹیشناں اُتے دوبارہ پولنگ دا حکم دتا سی تے عدالت نے وی الیکشن کمیشن دے فیصلے نوں برقرار رکھیا سی، 20 پولنگ اسٹیشناں اُتے دوبارہ ووٹنگ وچ عامر سلطان چیمہ 11 ہزار ووٹاں دی برتری نال جت گئے، حالانکہ پورے حلقے دی تن وار گنتی دے دوران قبل ازیں اوہ اک ہزار توں ودھ ووٹاں توں ہارے سن، ہن مسلم لیگ ن دے این اے 91 توں ہرن والے ڈاکٹر ذوالفقار علی بھٹی نے 20 پولنگ اسٹیشناں اُتے دوبارہ ووٹنگ دے عمل نوں سپریم کورٹ وچ اک وار فیر چیلنج کر رکھیا اے، ایسے تناظر وچ مسلم لیگ ن دی مرکزی قیادت تے این اے 75 توں مسلم لیگ ن دی امیدوار نوشین افتخار نے پہلے الیکشن کمیشن آف پاکستان تے پاکستان تے فیر عدالت عظمیٰ وچ قانونی جنگ لڑی، جس دے نتیجے وچ پورے حلقے وچ دوبارہ ہون والی پولنگ وچ مسلم لیگ ن دی امیدوار نوں پہلے ہون والی ضمنی پولنگ دی نسبت دوجی وار ہون والی پولنگ وچ زیادہ ووٹ ملے۔ ایس طرح مسلم لیگ ن نے پنجاب دے شہر ڈسکہ وچ ہون والا ضمنی الیکشن دا معرکہ جت کے حکومت خاص طور تے کپتان نوں اک ہور آفٹر شاک جھٹکا دتا اے۔ ہن عوام دیاں نظراں خوشاب دے حلقہ پی پی 84 وچ ہون والے ضمنی انتخاب اُتے لگیاں ہوئیاں نیں۔ پی پی 84 دے ضمنی الیکشن وچ دلچسپ تے حیران کن صورتحال پیدا ہو چکی اے۔ ایہہ نشست مسلم لیگ ن دے 2018 وچ ضلع خوشاب توں جتن والے اکلوتے ایم پی اے محمد وارث کلو دی وفات اُتے خالی ہوئی سی، 2013ء دے انتخابات تیکر خوشاب مسلم لیگ ن دا گڑھ سمجھیا جاندا سی، قومی اسمبلی دی دو تے صوبائی اسمبلی دی چار نشستاں ( ن) لیگ نے جت کے 2013 دے انتخابات وچ خوشاب توں کلین سویپ کیتا سی فیر حلقہ بندی دے بعد ضلع خوشاب دی صوبائی اسمبلی دی اک نشست گھٹ ہو گئی۔ 2018 دے انتخابات وچ مسلم لیگ ن خوشاب وچ دو دھڑیاں وچ تقسیم سی تے دونویں دھڑے اک دوجے دی کھل کے مخالفت کر رہے سن ،جس دی وجہ نال ماسوائے محمد وارث کلو دے مسلم لیگ ن نوں دیگر نشستاںاُتے شکست دا ساہمنا کرنا پیا سی تے پی ٹی آئی قومی اسمبلی دی دو تے صوبائی اسمبلی دی دو نشتاں جت گئی سی ۔ 2018 وچ ناراض مسلم لیگ ن دے دونویں دھڑے ہن ضمنی الیکشن وچ اک پیج اُتے نظر آ رہے نیں تے ایہناں وچ صلح ہو چکی اے تے مسلم لیگ ن ضمنی الیکشن جتن لئی پرعزم اے۔
پاکستان مسلم لیگ ن نے وارث کلو مرحوم دے پتر و سیاسی جانشین معظم کلو نوں پارٹی ٹکٹ جاری کیتا اے جد کہ پاکستان تحریک انصاف نے مرکزی جنرل سیکرٹری عامر کیانی دے قریبی ساتھی گل اصغر بگھور نوں پی پی 84 توں میدان وچ اتاریا تے ٹکٹ جاری کیتا سی جیہڑا کہ ریٹرننگ آفیسر دے کول جمع وی کرایا جا چکیا اے کہ پی ٹی آئی دے ایم این اے احسان ٹوانہ نے گل اصغر بگھور نوں ٹکٹ دین دی بھرپور مخالفت کیتی تے بقول سیاسی ذرائع ایم این اے احسان ٹوانہ نے ٹکٹ تبدیل کران لئی بھرپور جدوجہد کیتی تے پی ٹی آئی شمالی پنجاب دی جنرل سیکرٹری شپ دے عہدے توں اپنا استعفیٰ وی کپتان نوں بھجوایا، جس وچ واضح کیتا گیا کہ گل اصغر بگھور نوں ٹکٹ دین والی کمیٹی نے حلقہ ایم این اے ہون دی حیثیت نال میرے نال مشاورت نہیں کیتی تے گل اصغر بگھور نے 2018 دے الیکشن وچ پارٹی نال بغاوت کر کے آزاد ایم این اے دا الیکشن لڑ کے پارٹی امیدواراں دی کمر وچ چھرا گھونپیا سی۔ احسان ٹوانہ نے اپنے پارٹی عہدہ استعفیٰ وچ کپتان نوں ایہہ وی باور کرایا کہ اوہ پی ٹی آئی دا وفادار ہون دے ناطے چیئر مین قائمہ کمیٹی (خارجہ امور قومی اسمبلی ) تے ایم این اے حلقہ 94 دے عہدے توں اپنا استعفیٰ دین لئی تیار نیں جس اُتے پی ٹی آئی دے کپتان عمران خان نے پی پی 84 وچ گل اصغر بگھور نوں جاری کردہ پی ٹی آئی دا پارٹی ٹکٹ واپس لے کے احسان ٹوانہ دے گروپ دے سردار علی حسین بلوچ نوں دے دتا اے۔ یاد رہوے کہ گل اصغر بگھور دے نال 2018 دے الیکشن وچ وی انج ای ہویا سی۔ پی ٹی آئی نے این اے 94 توں پارٹی ٹکٹ گل اصغر بگھور تے پی پی 84 دا ٹکٹ ایس دے ساتھی حامد محمود وڈھل نوں دتا سی، پی ٹی آئی خوشاب دی قیادت نے حامد محمود وڈھل اُتے اعتراض چکیا تے پارٹی دی مرکزی قیادت نے قومی اسمبلی تے صوبائی اسمبلی دے دونویں ٹکٹ گل اصغر بگھور نوں دے دتے سن تے گل اصغر بگھور نے ایم این اے دا الیکشن لڑن دا فیصلہ کیتا تے بھرپور انتخابی مہم شروع کر دتی تے پی ٹی آئی دی قیادت نے پی پی 84 دا ٹکٹ سردار شجاع خان بلوچ نوں دے دتا۔ گل اصغر بگھور اپنی انتخابی مہم دی کمپیئن جاری رکھے ہوئے سن کہ پی ٹی آئی دی قیادت نے گل اصغر بگھور توں ایم این اے دے امیدوار دا ٹکٹ وی واپس لے کے احسان ٹوانہ نوں دے دتا جس اُتے گل اصغر بگھور نے پی ٹی آئی نال بغاوت کر کے 2018 وچ آزاد حیثیت توں قومی اسمبلی دا الیکشن لڑیا تے بے دریغ خرچ کر کے آزاد حیثیت نال 40 ہزار دے لگ بھگ ووٹ حاصل کیتے ایس دے باوجود احسان ٹوانہ جت گئے جس دی اک وجہ حلقہ وچ ٹوانہ گروپ دا ذاتی ووٹ بینک تے دوجا مسلم لیگ ن وچ دھڑابندی سی، ایس ویلے آزاد حیثیت نال الیکشن لڑن اُتے پی ٹی آئی دی قیادت گل اصغر بگھور نال نالاں سی کہ مرکزی جنرل سیکرٹری عامر کیانی نے راہ ہموار کر کے گل اصغر بگھور نوں دوبارہ پی ٹی آئی وچ شامل کر لیا جد کہ ہن مسلم لیگ ن خوشاب وچ دھڑا بندی ختم ہو چکی اے تے دونویں دھڑے یک جان ہو کے این اے 75 وانگوں پی پی 84 دا ضمنی الیکشن جتن لئی متحد نظر آ رہے نیں۔
سیاسی ذرائع کہندے نیں کہ احسان ٹوانہ دے گروپ دے سردار علی حسین بلوچ نوں پارٹی ٹکٹ دلوان وچ وفاقی وزیر خارجہ شاہ محمود قریشی دی سپورٹ حاصل سی، جد کہ گل اصغر بگھور نوں ٹکٹ لے کے دین وچ پاکستان تحریک انصاف دے مرکزی جنرل سیکرٹری عامر کیانی دا دونواں وار اہم کردار سی پر ایس دے باوجود دونواں وار گل اصغر بگھور پی ٹی آئی دے ٹکٹ توں محروم ہوئے، ویکھنا ایہہ وے کہ ہن گل اصغر بگھور دا سیاسی مستقبل کیہ ہوئے گا کیہ موصوف 2018 وانگوں بغاوت کر کے آزاد حیثیت نال ضمنی الیکشن لڑن گے؟ یا پارٹی دے کپتان عمران خان دے فیصلے دی تعمیل کردے ہوئے پی ٹی آئی دے امیدوار نوں ضمنی الیکشن وچ سپورٹ کرن گے ؟ ایس دا فیصلہ آن والا وقت ای کرے گا؟ تاں این اے 75 دے بعد خوشاب دے حلقہ پی پی 84 وچ ضمنی الیکشن دا دنگل سجن جا رہیا اے جس لئی کپتان دے کھلاڑی سردار علی حسین بلوچ تے مسلم لیگ ن دے متوالے معظم کلو میدان وچ نیں۔یاد رہوے کہ 2018 وچ ایس حلقے توں پی ٹی آئی دے شجاع خان بلوچ تے مسلم لیگ ن دے وارث کلودے مابین مقابلہ ہویا سی تے وارث کلو جت گئے سن۔سابقہ ایم این اے شجاع خان بلوچ تے ایم پی اے وارث کلو وفات پا چکے نیں تے ہن مقابلہ دونواں دے پتراں دے مابین ہون جا رہیا اے، ہمدردی دا زیادہ ووٹ جیہڑا حاصل کر پائے گا اوہ کامیابی سمیٹے گا؟ تاں پنج مئی نوں ہون والی پولنگ وچ پی ٹی آئی تے ن لیگ وچ کانٹے دا مقابلا ہوئے گا۔