رمضان شوگر ملز ریفرنس، حمزہ شہباز دے جوڈیشل ریمانڈ وچ 17جنوری تک وادھا

لہور: احتساب عدالت نے رمضان شوگر ملز ریفرنس وچ حمزہ شہباز دے جوڈیشل ریمانڈ وچ 17جنوری تک وادھا کر دتا جد کہ اپوزیشن لیڈر شہباز شریف دی مستقل حاضری معافی دی درخواستاں تے فیصلہ محفوظ کر لیا۔ احتساب عدالت وچ آشیانہ اقبال تے رمضان شوگر ملز ریفرنسز دی سنوائی ہوئی، جیل حکام نے حمزہ شہباز نوں جج امید نذیر دے ساہمنے پیش کیتا۔

دوران سماعت وکیل امجد پرویز نے شہباز شریف دی مستقل حاضری معافی دی درخواستاں تے دلائل دتے تے آکھیا شہباز شریف اپنے بھرا دے علاج لئی بیرون ملک گئے آں، ایہناں دا اپنا علاج وی جاری اے، ڈاکٹراں نے چیک اپ لئی ایہناں نوں 9تے 15جنوری دا ویلا دتا اے، عدالت شہباز شریف نوں مستقل طور تے حاضری توں چھوٹ دا حکم دیوے۔

نیب نے شہباز شریف دی مستقل حاضری معافی دی درخواست دی مخالفت کیتی تے موقف اختیار کیتا شہباز شریف دے وکیل نوں آپ علم نہیں اے کہ ایہناں دے موکل کدوں واپس آن گے، شہباز شریف عدالت دی اجازت دے بغیر بیرون ملک گئے آں، عدالت مستقل حاضری معافی دی درخواست رد کرے تے ناقابل ضمانت وارنٹ گرفتاری جاری کرے۔

عدالت نے حمزہ شہباز دے جوڈیشل ریمانڈ وچ توسیع کر دتی جد کہ شہباز شریف دی مستقل حاضری معافی دی درخواستاں تے فیصلہ محفوظ کر لیا۔ عدالت ولوں محفوظ کیتا گیا فیصلہ 17جنوری نوں سنایا جاوے گا۔