اک جماعت نے کنپٹی تے بندوق رکھ کے آکھیا فرانس دے سفیر نوں واپس بھیجو: وزیراعظم

ملتان( پنجابی میڈیا گروپ)وزیراعظم عمران خان آکھیا اے دیس وچ 100ورھے وی توڑ بھن نال یورپ وچ توہین رسالت ختم نہیں ہووے گی۔ وزیراعظم عمران خان نے ملتان وچ تقریب نال خطاب کردیاں آکھیا فرانس وچ توہین رسالت تے اک جماعت نے سرکار دی کنپٹی تے بندوق رکھ کے آکھیا فرانس دی سفیر نوں واپس بھیجو، نبیﷺ دی شان وچ گستاخی تے ہر مسلمان نوں تکلیف ہوندی اے، پر ایہنوں روکن دے دو طریقے نیں۔ وزیراعظم آکھیا اک طریقہ ٹی ایل پی دا اے کہ اسلام آاد تے دھاوا بول کے، مظاہرے تے توڑ بھن کرکے سرکار اُتے سفیر نوں کڈھن لئی دباء پاؤ، پر کیہ ایہدے نال یورپ تے فرانس وچ توہین رسالت رک جائے گی، میں لکھ کے دینا آں 100ورھے وی انج کردے رہے، ایہدے نال کوئی فرق نہیں پوے گا بلکہ آزادی اظہار رائے دے ناں تے توہین رسالت دے واقعات ہور ودھن گے۔ عمران خان آکھیا سانوں وی توہین رسالت تے تکلیف ہوندی اے تے ساڈا مقصد اک ای اے پر ایہنوں ختم کرن لئی میرا تے میری حکومت دا طریقہ دوسرا اے تے میرا ای طریقہ کامیاب ہووے گا، اسیں دنیا دے سارے مسلمان ملکاں دے سربراہواں نوں اکٹھا کرکے گل بات کر رہے آں، پچھلے دناں شاہ محمود نے 4ملکاں نال گل کیتی اے جہڑے ایہدے متفق نیں۔وزیراعظم آکھیااسیں عالم اسلام نوں اکٹھا کراں گے تے رل کے اک متفقہ لائحہ عمل لے کے یورپ نوں کہواں گے کہ آزادی اظہار دے ناں تے سوا ارب مسلمانوں نوں تکلیف نہیں دے سکدے جیویں تسیں یہودیاں نوں تکلیف دین دا سوچ وی نہیں سکدے تے ہولو کاسٹ تے کوئی منفی گل نہیں کیتی جا سکدی جہدے تے یورپی ملکاں وچ قید دی سزا اے، تے کیہ اسیں 50مسلمان ممالک رل کے یورپ نوں سمجھا نہیں سکدے کہ آزادی اظہار رائے ضرور استعمال کرو پر نبیﷺ دی شان وچ گستاخای نہیں کیتی جا سکدی جے تسیں انج کیتا تے اسیں سارے تہاڈا تجارتی بائیکاٹ کر دیاں گے، ایس طریقے نال فرق پوے گا تے اسیں کامیاب ہوواں گے۔

اپنا تبصرہ گھلو