پی ڈی ایم توں بعد خطرے
شہباز شریف دی رہائی نال اپوزیشن نوں تقویت ملے گی
تحریر حمیداللہ بھٹی
اپوزیشن نے کجھ مہینے خوب دھماچوکڑی مچائی پر ہن حکومت دی بجائے اپوزیشن اتحاد وچ شامل جماعتاں اک دوجے اُتے خوب برس رہی اے مسلم لیگ ن تے پی پی دی قیادت دے نال دوجے درجے دے رہنما وی بیانات دی گولہ باری وچ مصروفنیں اک پاسے توں باپ نوں باپ بنان دا طعنہ دتا جاندا اے تے دوجے پاسے توں پنجاب وچ بلا مقابلہ سینٹر منتخب کران لئی حکومت نال افہام و تفہیم اُتے جواب طلبی کیتی جاندی اے اک دوجے نوں رگیدن دی ایہہ کوئی پہلی مثال نہیں بلکہ ورھیاں توں سیاستداناں دا انج دا ای چلن اے کیوں جے مفاد نوں اصول، اخلاق تے وضع داری اُتے ترجیحی دتی جاندی اے ایس لئی گل کردے ہوئے اخلاقی گراوٹ دا خوب مظاہرہ کیتا جاندا اے جے مفاد ہوئے تے بدترین مخالف جماعتاںمیثاق جمہوریت کر لیندی اے تے جے مفاد نہ ہوئے تے وزیراعظم نوں نااہل کران لئی سیاسی قیادت کالے کوٹ پا کے عدالت عظمیٰ جان وچ وی مضائقہ نہیں سمجھدی فائدے لئی اک دوجے دے امیدواراں دی تائید کیتی جاندی اے پر جے عہدہ ملن دا امکان ہو چاہے اوہ ایوان بالا وچ قائد حزب اختلاف جہیا بے اختیار ای کیوں نہ ہوئے تھامیا دامن جھٹکن وچ تاخیر نہیں کیتی جاندی سیاسی کھیڈ دے اینے رنگ نیں کہ بندہ سمجھدے ہوئے چکرا جاندا اے پر جے نہیں چکراندے تے ثابت قدم رہندے نیں تے اوہ سیاسی زعما نیں جیہڑے خم ٹھونک کے اپنے فیصلیاں دا دفاع کردے نیں تے اپنے ہر فیصلے وچ ملک و قوم دی بہتری نال تعبیر کردے نیں۔
کدی موجودہ حکمران جماعت بطور اپوزیشن دھرنے دیندی تے سونامی دی طاقت دے مظاہرے کردیسی پر اج سابق حکمران جماعتاں بطور اپوزیشن احتجاج کرن وچ مصروف نیں حیرانگی دی گل تے ایہہ وے کہ اپوزیشن نے موجودہ حکمراناں نوں نااہل قرار دیندے ہوئے گران لئی اک وسیع تر اتحاد بنایا پر ایہہ اتحاد اک برس وی قائم نہ رہ سکیا تے کجھ مہینے اکٹھے چل کے ہن پی ڈی ایم وچ شامل جماعتاں اک دوجے دی مخالفت اُتے کمربستہ نیں تے حکومت اُتے لان والے الزامات اک دوجے اُتے لا رہیاں نیں عوام رابطہ مہم توں دبائو دا شکار حکومت نے پی ڈی ایم ٹُٹن نال سُکھ دا ساہ لیا اے پر ایہہ سُکھ عارضی لگدا اے بلکہ انج محسوس ہوندا اے کہ پی ڈی ایم توں ہن زیادہ گھمبیر خطرات پیدا ہو گئے نیں جنہاں نال عہدہ برآہونا حکومت دی صلاحیتاں دا امتحان اے۔
اصل وچ پی ٹی آئی دی موجودہ پارلیمانی پارٹی وچ انج دے لوکاں دی کمی نہیں جیہڑے حالات دا رُخ ویکھ کے شامل ہوئے تے عمران خان نے وی شخصی ووٹ رکھن والیاں نوں ساری بدنامیاں نوں قبول کرن وچ تساہل توں کم نہیں لیا۔ایس توں علاوہ درجناں آزاد منتخب ہو کے جہانگیر ترین دے ذریعے حکمران کشتی اُتے سوا ہوئے ایہناں لوکاں دا پی ٹی آئی دے نظریے یا عمران خان دی سوچ توں کوئی سروکار نہیں ایسے لئی جدوں وی مشکل ویلا آندا اے ایہہ نہ صرف منظر عام توں غائب ہو جاندے نیں بلکہ حکومت اُتے دبائو پا کے حیثیت منوان تے مفاد حاصل کرن دی کوشش کردے نیں سینٹ الیکشن ہوئے یا کالعدم تحریک لبیک دا دھرنا ، الیکٹ ایبلز تے سیاسی چھتری دے بغیر منتخب ہون والیاں نے نیازی تے بے رُخی ظاہر کیتی آئندہ وی حکومت نوں خطرات توں بچان لئی ایہہ لوک موہڈھا پیش کرن دی بجائے الگ رہن دا تاثر دے سکدے نیں۔ ایس لئی ایہہ گل ذہن نشین کر لینی چاہیدی اے کہ حکمران جماعت دی پارلیمانی پارٹی وچ وقتاً فوقتاً بلند ہون والی اختلافی اوازاں عارضی نہیں متقل نیں جویں ای تبدیلی دی راہ ہموار ہوئی ایہہ مخالف کیمپ وچ شامل ہو سکدے نیں ایہہ سمجھنا کہ پی ڈی ایم دی ٹوٹ پھوٹ دے بعد حکومت نوں لاحق خطرات سرے توں ختم ہو گئے نیں۔ درست نہیں بلکہ ویکھو تے انتظار کرو دی پالیسی اُتے عمل پیرا کسے ویلے وی سیاسی داغ مفارقت دے سکدے نیں۔
ایس وچ شائبہ نہیں کہ کئی دہائیاں توں ملک دا مسلہ بُری حکمرانی اے ایہنوں ای بنیاد بنا کے پی ٹی آئی اقتدار وچ آئی پر تبدیلی دے باوجود عوام دشمن اقدامات جاری نیں بلکہ انج محسوس ہوندا اے کہ بُری حکمرانی وچ وادھا ہو گیا اے۔ ایہہ نااہلی اے یا ناتجربہ کاری، حکومتی ادارے ای نقاب کُشائی کر رہے نیں۔ پٹرول بحران لئی بنائے کمیشن نے اپنی رپورٹ وچ بحران نوں مصنوعی قرار دیندے ہوئے اوگرا، پٹرولیم ڈویژن تے آئل کمپنیاں نوں ذمہ دار قرار دتا اے۔ چلو ایہہ تے تحقیق وچ ثابت ہو گیا تے خرابی دی وجوہات دا تعین وی ، سوال ایہہ وے کہ جدوں عوام دی جیباں توں ارباں روپئے نکلوایا جا رہیا سی تے حکمراناں کیوں نہ واردات نوں سمجھ سکے جے ویلا خرابی دا ادراک کردے تے اینی لُٹ مار نہ ہوندی ہن ساری خرابیاں دا ذمہ دار سابق حکمراناں نوں قرار دین وچ وزن نہیں رہیا ایس لئی کہیا جا سکدا اے کہ بُری طرز حکمرانی دا سلسلہ منقطع نہیں ہو سکیا بلکہ مصنوعی بحراناں نال نہ صرف مصنوعی مہنگائی وچ وادھا ہو گیا اے بلکہ روزگار دے موقعے وی گھٹ ہوئے نیں جس دی بنا اُتے کہہ سکدے نیں کہ پی ڈی ایم دے بعد وی حکومت لئی خطرات موجود نیں۔
لوڑ دے مطابق عدم ترسیل نال عوامی بے چینی ودھدی اے ماہ صیام وچ آ ٹے، چینی تے دیگر روزمرہ دی شیواں دی قلت وچ کوئی دورائے نہیں روزہ داراں نوں گھنٹیاں چینی تے آٹے لئی یوٹیلٹی سٹورز تے سستے رمضان بازاراں وچ خوار کیتا جاندا اے انج دے لوک حکمراناں نوں کنج کوسدے نیں کجھ ڈحکیا لُکیا نہیں سبسڈی توں مستفید ہون والیاں دی تعداد بوہت گھٹ اے اکثر عام مارکیٹ دا رُخ کردے نیں جتھے حکومتی نرخاں اُتے کجھ نہیں ملدا انج محسوس ہوندا اے کہ حکومت تے پرائس کنٹرول کمیٹیاں بے اثر ہو چکیاں نیں ایہہ نااہلی اے یا ناتجربہ کاری، جو وی اے حکومت لئی خطرات جنم دے رہی اے جس اُتے قابو نہیں پایا جاندا تے اپوزیشن دے بغیر وی نفرت دا لاوا خطرے دا روپ دھار سکدا اے۔
جہانگیر خان ترین دے خلاف قائم ہون والے مقدمے تے چینی بحران دی تحقیقات دے باوجود ایس امر توں انکار نہیں کیتا جا سکدا کہ اوہ تاحیات نااہلی دے باوجود سیاست وچ بوہت اہم نیں عمران خان دے قریبی دوست رہن والے ترین زیر عتاب ہو کے وی اپوزیشن تے حکومتی صفاں وچ زیر بحث نیں سچ تے ایہہ وے کہ پی ڈی ایم تبدیلی لئی عوام دی بجائے جہانگیر ترین اُتے نظراں جمائے بیٹھی اے حالانکہ اوہ تحریک انصاف وچ رہن دا عزم ظاہر کردے نیں پر ایہہ پاکستان اے ایتھے کجھ وی تے کسے ویلے وی ہو سکدا اے معمولی اکثریت نال قائم وفاقی تے پنجاب حکومت نوں ڈیگن لئی کلے جہانگیر ترین ای کافی نیں ایس لئی پی ڈی ایم ٹُٹن توں بعد ایہہ کہنا کہ حکومت مستحکم اے کسے طور درست نہیں عمران خان تے جہانگیر ترین دی ملاقات کران دی کاوشاں جاری نیں پر عمران خان چینی مافیا دے خلاف جیہڑی فضا بنا چکے نیں ایس توں بعد افہام و تفہیم دی گنجائش نہیں رہی بلکہ تحقیقات توں بعد کاروائی نہیں کیتی جاندی تے لوک ایہو پیغام لین گے کہ حامی تے مخالفاں وچ انصاف دا معیار وکھرا اے ایہہ تاثر حکومتی ساکھ نوں مجروح کر سکدا اے ایس لئی جو کرنا ہوئے گا سوچ سمجھ کے کرنا ہوئے گا نہیں تے نہ پی ڈی ایم دے علاوہ وی ہر پاسے خطرے نیں کیوں جے شہباز شریف دی رہائی نال اپوزیشن نوں تقویت ہوئے گی وجہ ایہہ وے کہ اوہ نہ صرف سب لئی قابل قبول نیں بلکہ غیرضروری تنائو ودھان دی بجائے صرف ٹارگٹ ول دھیان رکھدے نیں ایس لئی ایہہ تصور کرنا کہ حکومت لئی ٹف ٹائم ختم ہو چکیا اے مناسب نہیں بلکہ دبائو ودھن دے خطرے موجود نیں۔
