ہاڑا

ساجد چوہدری

کاواں وے توں ساڈا ہانی
ساڈے نال توں لکھاں ورہیاں عمراں جالی
ساڈے نال توں کالے چٹیاں ہوندیاں ویکھیاں
ستلج راوی پھنڈر ہوندیاں تکے
کاواں وے توں ساڈا محرم ساڈا جانی
ساڈے اندر باہر دے کوڑے دا توں ہی ضامن جانو
ساڈے نالوں ودھ توں جانے ساڈی کتھا کہانی
کاواں وے توں ساڈا رہبر
بحر سمندریں طوفاناں جد ڈبدے بیڑے
تیری ہک ڈاری پچھے ملدے بھوئیں دے ڈیرے
کاواں وے ہن موڑ مہاراں
مینوں لے چل اوہنیں بحر سمندریں جتھے
میں دھرتی نوں دھو دھو مانجاں، نویں بناواں
پھیر توں جد بولیں گا آ بنیرے اتے
آون والیاں متراں نال میں شگن مناواں
تینوں اپنے تن دا ماس کھواواں