کیہ ڈسکہ دی جت مریم دے بیانیے دی جت اے؟
لكهت:مطلوب وڑائچ
ڈسکہ ضمنی در ضمنی الیکشن وچ مسلم لیگ (ن) دی پنجاب نیشنل پارٹی دی حمایت تے تعاون نال جت حکومت لئی جھٹکے توں گھٹ نہیں۔ مسلم لیگ ن نے 2018ء دے الیکشن توں وی ودھ برتری حاصل کیتی۔ ظاہرے شاہ نے اک لکھ دس ہزار توں ودھ جد کہ اوہناں دی دھی نوشین نے اک لکھ توں دس ہزار توں ودھ ووٹ حاصل کیتے۔ اسدملہی نوں 93ہزار ووٹ ملے‘ اوہ مطمئن ہون گے کہ 61 ہزار توں 93 ہزار ووٹ ہو گئے۔ نتیجے توں ثابت ہوندا اے کہ 19فروری نوں حکومتی اشارے تے حلقے وچ حالات وگڑے۔ الیکشن کمیشن دا ایہ فیصلہ ٹھیک تے سپریم کورٹ نے پورے حلقے وچ فیر پولنگ دا فیصلہ برقرار رکھ کے بالکل ٹھیک کیتا۔ الیکشن کمیشن نے بہترین انتظامات کیتے۔ رینجرز نے ہن چڑی وی نہیں پھڑکن دتی۔ پرامن پولنگ ہوئی‘ ایہناں دیہاڑیاں میں کینیڈا توں اپنے گھر ڈسکہ آیا ہویا سی میں الیکشن نوں مکمل طور تے مانیٹر کیتا۔ حکومت لئی ایہ اک چتاونی اے کہ اوہ لوکاں نوں مہنگائی‘ بیروزگاری تے دوجے مسئلیاں توں نجات دوائے نہیں تے اگلے الیکشن وچ ہر حلقہ این اے 75 ثابت ہو سکدا اے۔
19 فروری نوں ہون والے ضمنی الیکشن وچ خوف تے جبر تے زبردستی ووٹ پوان دی ای وجہ سی کہ آپ میرے آبائی قصبہ میترانوالی وچ پی ٹی آئی نوں ساڑھے 19 سو ووٹ پئے جد کہ ن لیگ دی نوشین افتخار نوں تقریباً 15 سو ووٹ پئے پر دس اپریل نوں ہون والے الیکشن وچ جہدے وچ ساڈی پنجاب نیشنل پارٹی نے مسلم لیگ ن دے نال الحاق کیتا سی تے میں ایس الیکشن وچ آپ موجود سی۔ میترانوالی دی عوام نے باقی حلقے دی عوام وانگوں نوشین افتخار نوں چار سو ووٹاں دے بھاری مارجن توں میترانوالی دے پولنگ سٹیشن توں جتوایا تے اک گل ایتھے میں کہنا چاہواں گا کہ الیکشن رزلٹ آن دے بعد پی ٹی آئی دے رہنما فواد چوہدری دا بیان سامنے آیا اے کہ ن جتی نہیں سگوں پی ٹی آئی ہاری اے تے دوجا بیان پی ٹی آئی دی رہنما فردوس عاشق اعوان نے ایہ دے ماریا کہ سانوں ایہ الیکشن آر اوز نے ہروایا اے۔ اودھر پی ڈی ایم اپنے منطقی انجام نوں اپڑ گئی۔ نیک نیتی‘ ایثار تے تحمل و برداشت ورگے وڈے اتحاداں دی کامیابی تے مضبوطی لئی پہلی لوڑ تے شرط ہوندی اے۔ جہدی پی ڈی ایم وچ کمی سی۔ پچھلے دیہاڑے بلاول نے سرمحفل پی ڈی ایم دے سیکرٹری شاہد خاقان عباسی دا شوکاز نوٹس پاڑ دتا سی ای سی دے اجلاس وچ بلاول دے ایس اقدام تے تحسین کردے ہوئے تاڑیاں ماریاں گئیاں۔ ذرا سوچو ایہ اجلاس استعفے دین نہ دین دے حوالے نال فیصلہ کرن لئی سدیا گیا سی۔ شرکاء دے تاڑیاں مارن توں ظاہر ہوندا اے کہ پی پی پی کسے صورت تے اوہدا کوئی لیڈر‘ عہدیدار کارکن استعفے دین دی حمایت نہیں کردا۔
اج ملک وچ جہانگیر ترین دا معاملہ وی سیاست وچ ہلچل مچائے ہوئے اے۔ جہانگیر نوں مقدمیاں دا سامنا اے تے اوہ ضمانتاں لئی نس بھج کر رہے نیں اوہ دس ورھے توں عمران دے ساتھی سن۔ اوہناں دی عمران خان نال جہڑی قربت سی اوہدے لئی ساتھی لفظ صحیح مفہوم ادا نہیں سکدا۔ بلاشبہ پنجاب وچ پی ٹی آئی دی حکومت سازی وچ جہانگیر ترین دا کردار ناقابل فراموش اے۔ اوہناں نے پچھلے دیہاڑے بینکنگ کورٹ وچ پیشی دے موقعے تے کہیا میں دس ورھے تحریک انصاف لئی خون پسینہ بہایا اے۔ یقینا انج ای اے اوہناں دے خلاف کیس بنے تے اوہ مایوس نظر آئے۔ عدالت گئے تے ناراض سگوں غصے وچ وی سن۔ اوہناں آکھیا کہ سانوں دھکیا نہ جاوے۔ وفاداری دا امتحان لیا جا رہیا اے اوہناں دے نال کجھ ایم این ایز سن۔ ایف آئی اے دے سامنے پیش ہونا سی تے رات نوں اوہناں دے عشائیے وچ صوبائی وزیر‘ مشیر‘ اٹھ ایم این ایز تے اکی ایم پی ایز سنے پنجاہ دے نیڑے ارکان اسمبلی موجود سن طاقت دا چنگا بھلا مظاہرہ کیتا گیا۔جتھے عمران ترین کشیدگی عروج تے نظر آئی پر تریجے دیہاڑے ضمانتاں وچ توسیع لئی عدالتاں وچ جہانگیر ترین تے علی ترین پیش ہوئے تے اوہناں دی ٹون بدلی ہوئی سی۔ عمران خان دا ساتھ نہ چھڈن دا اعلان کیتا جہدے نال پی پی پی تے ن لیگ دی قیادت نوں مایوسی ہوئی جو جہانگیر ترین نوں استعمال کرکے حکومت گرانا چاہندے سن۔
جہانگیر ترین کہندے نیں اوہناں دے خلاف کیس اک سازش دے تحت بنائے گئے۔ عمران خان توں کجھ لوک دور کرنا چاہندے سن جد کہ حکومتی عہدیدار کہندے نیں احتساب ساریاں دا اکو جیہا بھاویں کوئی کناں ای طاقتور تے اہم بندہ کیوں نہ ہووے۔ ایس معاملے وچ اگے اگے ویکھو کیہ ہوندا اے پر اطلاعات‘ تجزیے تے مشاہدے موجب جہانگیر ترین دے نال جہڑا سلوک کیتا جا رہیا اے پس پردہ معاملے تے حقائق کجھ ہور نیں۔
دوستو! میرا جہانگیر ترین صاحب نال قریبی تعلق رہیا اے تے میں اک خاص مشن وچ اوہنا ںدے نال رَل کے طالع ازمائی تے مشن تے کم کیتا اے تے میرے سینے وچ بہت سارے سیاسی راز چھپے نیں جہناں نوں میں چھیتی ای اپنی نویں کتاب وچ قارئین دی نذر کراں گا۔ اجے میں ایہو کہنا چاہنا واں کہ ’’بدلتا ہے رنگ آسماں کیسے کیسے؟‘‘۔٭٭
