کرونا ٹیسٹ‘ علاج مفت کیوں نہیں

طلعت عباس خان

جدوں دا کرونا آیا اے ملک وچ نویاں فیکٹریاں کرونا ٹیسٹ تے نویں ہسپتال بن چکے نیں۔ کیہ مدینہ دی فلاحی ریاست انج دی ہوندی سی؟ ایہ کرونا فیکٹریاں چلان والے سارے مسلمان نیں۔ کہیا جاندا اے کہ ایہناں دے ناں تے حلیہ بظاہر مسلماناں ورگے نیں پر کرتوت غیرمسلم ورگے نیں۔ لوکاں دے کول کھان نوں زہر نہیں تے ایہ چلدیاں پھردیاں مردہ لاشاں دے ٹیسٹ تے علاج دے ناں تے اوہناں دے کفن وی لاہ رہے نیں۔ اوہناں نوں پتہ اے ایہ دنیا وچ خالی ہتھ آئے تے خالی ہتھ ای ایتھوں جان گے۔ فیر وی اوہناں نوں کوئی شرم و حیا نہیں کہ ایس مشکل گھڑی وچ خدمت نال جنت دی کنجی حاصل کر لیے۔ کرونا ویکسین لیان تے لان تے غریب لوکاں توں پیسے وٹے جا رہے نیں۔ کہیا جاندا اے روس نے سانوں غریب ملک سمجھدے ہوئے دو ڈالر فی کرونا ویکسین دتی۔ ویکسین نوں پاکستان لیایا اوہنے ایہنوں اٹھ ڈالر وچ سیل کیتی جہدے تے روسی کمپنی چیک اٹھی کہ اسیں غریب سمجھدے ہوئے مفت دتی تے تسیں ایہدے تے وی پیسے بنانے شروع کر دتے۔ کہیا جاندا اے کہ ایہ اوہ بندہ اے جو خدمت کرن حکومت دا نمائندہ بن کے آیا سی ایہدے تے انکوائری کران دی لوڑ اے۔
اسیں مذہب توں ڈرنے آں نہ ایہدے تے عمل کرنے آں تے نہ ای قنون توں ڈرنے آں کہ قنون ناں دی کوئی چیز نظر وی نہیں آئوندی ایس لئی ایہ ملک چوراں‘ لٹیریاں دی آماجگاہ اے۔ صرف گل منی اے تے آئی ایم ایف دی۔ اک دوست نے میرے بھائی دی خیریت پچھن لئی فون کیتا فیر کیہا اج کل ہر پاسے کرونا دا رونا اے پر کرونا دی مہنگائی دا رونا کوئی نہیں روندا۔ کرونا ٹیسٹ دی فیس چھ توں ست ہزار روپیے اے۔ کس غریب دی پسلی اے کہ اوہ ایہ ٹیسٹ کرا سکے؟ گھر وچ چھ بندے نیں تے اک دا کرونا ٹیسٹ پازیٹو آ جاندا اے تے فیر باقی پنج بندیاں دا ٹیسٹ وی کرانا لازم اے۔ دسو اجہی فیملی کرونا ٹیسٹ کروان دی طاقت رکھدی اے جے چپ رہندا اے تے کرونا ہور پھیلان دا کارن بنے گا۔ ایس پاسے کسے دا کجھ دھیان نہیں حکومت شہریاں نوں کوئی ریلیف نہیں دے رہی۔ کئی ملکاں وچ کرونا دا ٹیسٹ تے علاج مفت ہو رہیا اے جد کہ ساڈے ایتھے حکومتی سطح تے کجھ نہیں ہو رہیا۔ حکومت وی بے بس تے غریب عوام وی بے بس وکھائی دیندے نیں۔ کیہ کیتا جاوے ایتھے تے ہن گھابرن تے وی پابندی اے۔ جائیے تے کتھے جائیے‘ ایہ ساریاں گلاں میرا ایہ دوست اک ای ساہ وچ کہہ گیا۔ جدوں میری واری آئی تے فون دی بیٹری جواب دے گئی پر سوچن تے لکھن نوں میرا ایہ دوست بہت کجھ دے گیا۔ ایسے ہفتے ٹی وی چینل تے بار بار اک نمبر وکھایا جا رہیا سی کہ اپنے محبوب قائد عمران خان نال ایس نمبر تے گل کر سکدے او۔ مقررہ وقت توں پنج دس منٹ پہلاں دسے گئے نمبر تے کال کرنا شروع کیتی پر ہر واری ایہو جواب ملدا کہ نمبر بند اے رابطہ ممکن نہیں۔ کال کرن دا ایہ سلسلہ دو گھنٹے تک جاری رہیا پر ایس عرصے وچ فون نوں بند ای پایا گیا۔ کیہ ایہ ٹھیک اے کہ پہلے توں ای ریکارڈنگ ہو چکی سی۔ انج لگ رہیا سی کہ جناب وزیراعظم نوں دس دتا گیا سی کہ ایہ سوال ہون گے؟ ایہناں تے تسیں گھابرنا نہیں۔ کئی یار دوستاں نے کہیا کہ پی ایم صاحب کرونا دے بعد پہلے توں ودھ چاک و چوبند وکھائی دتے۔ لگدا نہیں سی کہ اوہناں نوں کرونا نے چھوہیا وی ہووے نہیں تے کرونا تے جاندے جاندے وی صحت خراب کر دیندا اے جہدے بعد چہرے تے باراں وجے صاف وکھائی دیندے نیں پر خان صاحب تے ہشاش بشاش وکھائی دتے۔ کجھ دا کہنا سی کہ ایہ کرونا سب ڈراما سی وزیراعظم عمران خان نوں الیکشن کمیشن نے فارن فنڈنگ کیس وچ بلا رکھیا سی پر کرونا دا فائدہ چکیا گیا۔ اسیں خان صاحب نوں کال ایس لئی کرنا چاہندے سی کہ کرونا تے ایناں رولا اے پر عملاً اجے تک کجھ نہیں ہویا سوائے ایہدے کہ اج کل جہناں نے ماسک نہیں پایا سی اوہناں وچاریاں نوں پولیس مرغا بنا دیندی اے۔ ایف آئی آر درج کر کے حوالات وچ پندراں ویہہ قیدیاں دے نال اوہناں نوں بند کر دیندی سی۔ کیہ انج کرن نال کرونا نوں پھیلان توں روک سکدے نیں یاں حکومتی چھتری دے تھلے کرونا پھیلایا جا رہیا اے ایہدے تے فوری ایکشن لوو۔ سوائے ساریاں نوں دسیا جا رہیا اے کہ گھراں چوں ماسک لائے بناں نہیں نکلنا‘ چلو نہیں نکلدے۔ کیہ اسیں جس ماحول وچ زندگی گزار رہے آں ایہدے توں کیہ ممکن اے کہ اسیں کرونا توں بچ سکاں گے۔
خان صاحب! تہاڈے کول اوہ سہولتاں نیں جو بائی کروڑ شہریاں دے کول نہیں ایہدے باوجود تہانوں کرونا لگا۔ دوجا سوال ایہہ وے کہ اساں خان صاحب نوں اسلام آباد کچہری دا وزٹ 1998ء وچ کرایا اوہناں نے بار نال خطاب وی کیتا سی۔ ہن اوہناں نوں اوہناں دا وعدہ یاد دوانا اے خان صاحب نے کہیا سی کہ میں اقتدار وچ آیا تے ایتھے کورٹ کمپلیکس بنا کے دیواں گا۔ پلیز اوہ اپنے وعدے تے عمل کرن۔ موجودہ حالات وچ تسیں اسلام آباد ڈسٹرکٹ کورٹ نوں وزیراعظم ہائوس وچ شفٹ کرا دیو نہیں تے ترامڑی چوک تے ترنول وچ ساڈیاں عدالتاں نوں تقسیم کر دیو۔ فون تے گل کرن دا خواب وی پورا نہ ہو سکیا خان صاحب نوں شاید ایہ یاد نہیں کہ ایتھے اک کمرے وچ چھ چھ ست ست بندے اکٹھے رہندے نیں۔ اوہناں دے کول واش روم دی سہولت وی نہیں ہوندی۔ کیہ ایہ لوک صرف ماسک پا کے کرونا توں بچ سکدے نیں؟ جد کہ تسیں آپ تے صدر مملکت سہولیات دے باوجود کرونا توں محفوظ نہیں رہ سکے تے عام شہری کیویں محفوظ رہ سکدا اے۔ کرونا دا حل صرف ماسک لان نال نہیں ایہدے لئی حکومت نوں ہنگامی سطح تے ہر پرائیویٹ تے سرکاری ہسپتالاں تے کرونا ٹیسٹ مفت کرانا ہون گے جہناں دے رزلٹ مثبت آ جان اوہناں دا علاج وی مفت کرانا ہووے گا۔ ایتھے تے عام شہری توں پچھیا جاوے کہ دو جمع دو کنے ہوندے نیں تے جواب وچ کہندا اے چار روٹیاں۔
مہنگائی نے ساڈی مڈل کلاس ختم کر دتی اے۔ غریب تے جانور ہن اکثر اپنا رزق اک تھاں توں لبھ رہے نیں۔ غریباں دیاں بستیاں وچ کرونا نے سر چک لیا تے فیر قبراں لئی زمین گھٹ جاوے گی۔ کدی سوچیا جے اک کرونا ٹیسٹ دی کیہ قیمت اے۔ فیر ایہدے علاج تے خوراک دی کیہ قیمت اے؟ کرونا دے اک مریض دے ٹیسٹ علاج تے خوراک دا خرچہ گھٹو گھٹ اک لکھ روپیہ آ رہیا اے۔ اجہے وچ ایہ غریب کتھوں کرونا ٹیسٹ کرائے گا۔ اوہدا علاج کون کرے گا؟ سرکاری ہسپتالاں دے متعلق مشہور اے اوتھے مفت خوراں نوں وینٹی لیٹر دے تھلے رکھ کے ابدی نیند سلا دتا جاندا اے ایس لئی مدینہ دی ریاست دے دعویدار کرونا ٹیسٹ تے علاج مفت کران دا چھیتی آہر کرن یاد رکھو قدرت نے ہر اک نوں اپنی عاقبت سنوارن دا چنگا موقع دتا اے۔ آئو فائدہ چکیے۔٭٭