’’سب اچھا اے‘‘

لكهت:ابرار ندیم

ایہ پرویزمشرف دے مارشل لاء 12اکتوبر 1999ء توں ٹھیک اک مہینے پہلاں ستمبر دی گل اے۔ اوس ویلے دے وزیراعظم میاں نوازشریف لئی ملک دی سیاسی فضا انج دی سی جیویں اج اے۔ اپوزیشن جماعتاں دے سارے رہنما میاں نوازشریف نوں اقتدار چوں کڈھن دے ون پوائنٹ ایجنڈے تے متفق سن۔ اخباری خبراں تے تجزیاں دے مطابق اقتدار دے ایواناں توں میاں صاحب دی رخصتی دے حوالے نال صاف وکھائی دے رہیا سی کہ جی کا جانا ٹھہر گیا اے۔ صبح گیا یا شام گیا۔ بھاویں ا وس ویلے نجی ٹی وی چینل تے اوہناں تے اندر دیاں گلاں دسن والے نجومی اینکراں دا وجود نہیں سی پر ایہدے باوجود اقتدار دے اعلیٰ ایواناں وچ فریقین وچ جاری کشمکش دیاں خبراں باہر آنا شروع ہو گئیاں سن۔ پتہ نہیں میاں صاحب دی ایہ کہڑی سیاسی حکمت عملی سی کہ اپنے خلاف ساریاں قوتاں دے گٹھ جوڑ دے باوجود اوہناں نے اپنی مصروفیات وچوں چنگا بھلا وقت کرکٹ میچاں نوں دینا شروع کر دتا جہدے لئی اوہ کرکٹ کھیڈن تقریباً ہر ہفتہ اسلام آباد توں لہور تشریف لیاندے۔ ایہناں حالات وچ میاں صاحب دے خیرخواہ دوجے کجھ کالم نگاراں وانگوں میں وی اوہناں نوں حالات دی سنگینی توں خبردار کرن لئی اوہناں دی کرکٹ کھیڈن وچ دلچسپی نوں بنیاد بنا کے ’’بلو بچ کے موڑ توں‘‘ دے عنوان توں اک کالم لکھیا۔ پتہ نہیں اوس ویلے ایہ کالم میاں صاحب دیاں نظراں چوں گزریا یاں نہیں قنون قدرت تے ہے ای قنون کرکٹ وی ایہو اے کہ کوئی وڈے توں وڈا بلے باز وی مسلسل پرفارمنس نہیں دے سکدا۔ دو چار میچاں وچ چنگی کارکردگی دے بعد اک ادھ واری گھٹ سکور یاں صفر تے آئوٹ ہونا لازمی اے۔
کرکٹ دی دنیا وچ عظیم منے جان والے بلے باز سعید انور‘ انضمام الحق‘ لارا‘ ٹنڈولکر تے مارک وا تے وی کجھ میچاں وچ لگاتار پرفارمنس دین دے بعد اک وقت اجیہا آئوندا اے جدوں اوہ اینے برے طریقے نال صفر تے آئوٹ ہوندے نیں کہ اوہدے تے کھڈاری تے کھڈاری ویکھن والیاں نوں وی شرم آئوندی اے۔ اوہو کھڈاری اوہناں نوں چارے شانے چت کردا اے جہدی اوہ پچھلے میچاں وچ کسے چور وانگوں پٹائی کردے نیں۔ پر آفرین اے ساڈے بلے باز وزیر اعظم دے جہڑے اک دو تن تے کیہ پچھلے چھ ست ورھیاں توں مسلسل چنگی کارکردگی دا مظاہرہ کر رہے نیں۔ کسے وی میچ وچ گھٹو گھٹ پنجاہ رنز بنانا تے اوہناں لئی انج ای اے جیویں قومی کرکٹ ٹیم دے بلے باز سلیم ملک لئی ہر میچ وچ صفر تے آئوٹ ہو جانا۔ شاید ای کوئی میچ ہووے جہدے وچ اوہناں نے پنجاہ توں گھٹ سکور کیتے ہون نہیں تے ہر میچ وچ 100,95,90,80 دے نیڑے رنز بنانا تے اوہناں دے معمول وچ شامل اے سگوں ہن تے انج لگدا اے میاں صاحب اپنی اننگز دا آغاز ای پنجاہ رنز توں کردے نیں۔ ایس شاندار کارکردگی دا سہرا اوہناں دی ہنرمندی‘ قسمت‘ بالراں یاں ایمپائراں وچوں کہدے سر جاندا اے سانوں ایہدے نال کوئی غرض نہیں ایہدا فیصلہ تے آن والا وقت کرے گا یاں آن والے وقت دا حکمران۔ سانوں تے میاں صاحب نوں پچھلی اننگ وچ سنچری سکور کرن دی مبارکباد دین دے نال اوہناں نوں خبردار وی کرنا اے کہ مسلسل شاندار کارکردگی دا مظاہرہ کردے ہوئے اوہ ایس میچ تک آ گئے نیں جتھے آ کے اکثر کھڈاری صفر تے آئوٹ ہو جاندے نیں تے اکثر تے انج آئوٹ ہوندے نیں کہ فیر ساری عمر پوری کوشش دے باوجود فیر فارم وچ نہیں آئوندے جیویں کہ سپرسٹار بلے باز سلیم ملک دی مثال ساڈے سامنے اے۔
انج وی حالات بدل گئے نیں نویں انتظامیہ‘ غیرجانبدار ایمپائرنگ تے کفارے لئی بے تاب نوجوان فاسٹ بالر تہانوں آئوٹ کرن لئی غصے نال بھرے بیٹھے نیں اجیہاں تبدیلیاں نیں جو خطرناک حد تک تہاڈے خلاف نیں۔ میاں صاحب کوئی لکھ تہانوں سب اچھا ہے دی رپورٹ دیوے حقیقت ایہو اے کہ حالات ہن اوہ نہیں رہے جدوں سارے ایڈوانٹیج تہاڈے کول سن۔ ایمپائر‘ بائولر تے انتظامیہ سب کجھ تہاڈی مرضی دے مطابق سی تے تسیں پوری طرح من مرضی کرن وچ آزاد سی۔ جدوں دل کیتا جہنوں چاہیا چوکا‘ چھکا لا دتا نہ بولڈ ہون دا ڈر‘ نہ ایل بی ڈبلیو‘ کیچ یاں رن آئوٹ ہون دا ڈر‘ مخالف ٹیم دی فیلڈنگ تک تہاڈی مرضی نال کھلوتی سی۔ بائولر گیند اوتھے سٹدے جتھے تہانوں ہٹ لان وچ زیادہ آسانی ہووے تے رہی سہی کسر فیلڈر پوری کر دیندے جس شاٹ تے سنگل بننی اوکھی ہوندی اوتھے فیلڈراں دی ملی بھگت نال چوکا ہو جاندا پر ویلے دی ایس ستم ظریفی نوں کیہ کہیے کہ سدا اکو جیہا نہیں رہندا کجھ تے مخالف ٹیم وچ کجھ اک ضروری تبدیلیاں تے کجھ دن بدن ودھدے ہوئے عوامی دبائو پاروں مخالف ٹیم تہاڈے توں اگلا میچ ہر حال وچ جتن تے تہانوں صفر تے آئوٹ کرن دیاں تیاریاں وچ اے تے تہانوں پتہ اے کہ کرکٹ تے سیاست اجیہا بے رحم کھیڈ اے جہدے وچ کسے لمحے کجھ وی ہو سکدا اے۔ ایس لئی میاں صاحب تہانوں مشورہ اے کہ اگلی اننگز اپنے ذہن چوں ایہ گل کڈھ کے پوری احتیاط نال کھیڈو کہ ہن انتظامیہ‘ ایمپائر یاں مخالف ٹیم وچوں کوئی تہانوں سپورٹ کرے گا کیوں جے ساریاں دی اپنی بقاء دا مسئلہ اے۔٭٭