فرخ حبیب دی انٹری

نسیم شاہد

کجھ ہفتے پہلے فرخ حبیب مینوں ملتان ملن آئے تے اوہناں نے دسیا سی کہ وزیراعظم عمران خان کابینہ وچ جیہڑی تبدیلیاں کرن والے نیں ایہناں وچ ایہناں نوں وی شامل کرنا چاہندے نیں۔ ایہناں دی ایہہ گل درست ثابت ہوئی تے اوہ اطلاعات و نشریات دے وزیر مملکت بنا دتے گئے نیں۔ کپتان دا ایہہ بوہت اہم فیصلہ اے ایس دی ہر سطح اُتے تعریف ایس لئی ہوئی اے کہ اوہناں نے اک کارکن نوں وزارت دے منصب اُتے فائز کیتا۔ کارکن وی اوہ جیہڑے ایہناں دے نظریئے اُتے پوری طرح کاربند اے تے اج توں نہیں بلکہ شروع دن توں عمران خان دے نال کھڑا اے۔ میں سمجھنا واں ساڈی سیاست وچ جیہڑے لوک طلبہ سیاست توں لنگھ کے آئے نیں اوہ بوہت رتبیت یافتہ تے باخبر سیاستدان ثابت ہوئے نیں۔ فرخ حبیب جس طرح مدلل انداز وچ گل بات کردے نیں تے الزامات دی بجائے اپنے موقف نوں پوری تیاری نال ساہمنے لیاندے نیں ایس دی وجہ نال ایہناں دی گل وچ وزن وی پیدا ہو جاندا تے گل وی بن جاندی اے۔ مینوں یقین اے کہ ایہہ نوجوان اک منفرد وزیر اطلاعات ثابت ہوئے گا۔ اگرچہ وزارتِ اطلاعات وچ فواد چودھری وی موجود نیں تاں فرخ حبیب اپنی تھاں بنان وچ کامیاب رہن گے۔
ہن تے ایہناں نوں اطلاعات و نشریات دا وزیر مملکت بنا دتا گیا اے، گویا ایہناں دے کول میڈیا نال رابطہ لئی اک وڈا عہدہ موجود اے تاں میں تے فرخ حبیب نوں ایس ویلے توں جاننا واں جدوں ایہناں دے کول کوئی سرکاری عہدہ نہیں سی، اوہ انصاف سٹوڈنٹس فیڈریشن دے مرکزی صدر سن تے ایہہ تنظیم وی اسلامی جمعیت طلبہ تے پی ایس ایف دے ہوندے ہوئے بڑی مشکل نال تعلیمی اداریاں وچ اپنی تھاں بنا رہی سی۔ ایس دور وچ فرخ حبیب اک پاسے نوجواناں وچ انصاف سٹوڈنٹس فیڈریشن دی تنظیم سازی کر رہے سن، تے دوجے پاسے اوہ واحد نوجوان سن، جیہڑے عمران خان دی میڈیا وچ کوریج لئی ترلے منتاں تے رابطے کردے سن۔ ایہہ اوہ زمانہ سی جدوں عمران خان دی خبر اخباراں دے بیک پیج اُتے سنگل یا ڈبل کالم چھپدی سی، پرائیویٹ چینلز دا آغاز نہیں ہویا سی تے واحد ذریعہ اخبار ای سن، اک دن اچانک مینوں اک کال آئی نمبر لہور دا سی، میں سنی تے دوجے پاسے فرخ حبیب سن، اوہناں نے جلدی نال اپنا تعارف کرایا تے کہیا کہ میڈیا تحریک انصاف دے نال بوہت امتیازی سلوک ورت رہیا اے ۔ عمران خان دی پریس کانفرنس وی بیک پیج اُتے لگدی اے تسیں اک دو کالم ایہناں لئی لکھے نیں، مہربانی کر کے اک کالم ایس موضوع اُتے وی لکھو کہ روایتی سیاستداناں دے نال نال عمران خان نوں وی اینی ای تھاں دتی جائے میں فرخ حبیب نوں نہیں جان دا سی تے نہ ای میری ایہناں نال ملاقات ہوئی سی پر اوہناں نے گل کجھ انج دے پر اثر انداز وچ کیتی کہ میں اگلے دن ایس موضوع اُتے کالج لکھ دتا۔

جس وچ ایہہ نشاندہی کیتی کہ تحریک انصاف نوں میڈیا نظر انداز کر رہیا اے حالانکہ عمران خان اک قومی ہیرو نیں تے سیاست وچ کردار ادا کرنا چاہندے نیں ایہہ کالم چھپیا تے مینوں نوجواناں دے پورے ملک توں فون آنا شروع ہو گئے سب ایس کالم ددی تعریف وی کر رہے سن تے میرا شکریہ وی، میں سمجھ گیا کہ ایہہ سب فرخ حبیب دی میڈیا مینجمنٹ دا نتیجہ اے۔ ایس طرح دے فون حقیقت وچ مینوں مستقبل وچ وی کالم لکھن اُتے اکسان لئی کرائے گئے نیں تاں میں ایس نوجوان دی ذہانت اُتے حیران ہویا کہ عمران خان دے کول کنج کنج دے ذہین نوجوان موجود نیں کجھ عرصے بعد فرخ حبیب نے مینوں فون کر کے دسیا کہ تہاڈے کالم دا اثر ہویا اے تے ہن تحریک انصاف نوں فرنٹ پیج اُتے تھاں مل رہی اے میں سمجھنا واں ایہہ وی ایہناں دا اک حربہ سی تاں جے مینوں مزید لکھن اُتے آمادہ کیتا جا سکے۔
مینوں یاد اے ایس اُتے میں اک کالم لکھیا جس دا عنوان سی ”عمران خان دی سنی گئی، ایس کالم وچ عمران خان نوں میڈیا ولوں مناسب کوریج دتے جان دا ذکر سی، ایس توں بعد وی فرخ حبیب چپ ہو کے نہیں بہہ گئے بلکہ اوہناں نے اک دن میری عمران خان نال گل کرائی اوہناں نے کھلے لفظاں وچ میرا شکریہ ادا کیتا تے کہیا تسیں ساڈے حق وچ اواز چُکی اے نہیں تے ایتھے سب سانوں دبان لئی موجود نیں۔ سیہہ سب گلاں میں ایس لئی لکھیاں نیں کہ فرخ حبیب دی صلاحیتاں دا اندازہ ہو سکے۔اوہ اج توں 20 سال پہلے جان گئے سن کہ عمران خان نوں میڈیا اُتے مناسب کوریج نہیں ملی تے اگے نہیں ودھ سکن گے، ایس دے بعد نہ جانے اوہناں نے کتھے کتھے رابطے کیتے ہون گے، نقب لائی ہوئے گی۔ظاہر اے کپتان وی ایہناں دی ایہناں کوششاں توں آگاہ نیں، جان دے نیں کہ ایس ویلے میڈیا نوں اپنے حق وچ ہموار کیتا سی جدوں تحریک انصاف صرف اک خواب سی، ہن تے اوہ اقتدار وچ اے کیہ وجہ اے کہ اج ایس دا مثبت چہرہ ساہمنے نہیں آ رہیا۔ اک انج دی فضا بن گئی اے، جس وچ تحریک انصاف دی حکومت دے چنگے کم وی کدھرے معدوم ہو جاندے نیں، فرخ حبیب تحریک انصاف وچ پیرا شوٹرز نہیں، اوہ ایام نوجوانی توں کپتان دے نال کھڑے نیں ایہناں دی وفاداری اپنے کپتان دے نال اے تے کسے شک و شبہ توں بالاتر اے۔ عمران خان توں غلطی ایہو ہوئی کہ اوہناں نے اپنی کابینہ دے چنائو وچ مصلحتاں نال کم لیا۔ پیراشوٹرز اگے اگے تے پارٹی لئی جدوجہد کرن والے پچھے چلے گئے تاں فرخ حبیب دی خوش قسمتی ایہہ وے کہ ایہناں نوں کپتان نے فیصل آباد توں قومی اسمبلی دا ٹکٹ دتا تے ایہناں دی صلاحیت ایہہ وے کہ اوہ انتخاب جتے تے فیصل آباد دے روایتی سیاسی خانداناں نوں شکست دتی۔
جدوں توں تحریک انصاف اقتدار وچ آئی اے ، ایہہ کمی محسوس کیتی جا رہی اے کہ ایس دے چنگے کماں دی تعریف تے ایہناں نوں اگے لیان والا کوئی موجود نہیں، جنہے وی ترجمان یا مشیر نیں، اوہ اپوزیشن اُتے تیر برسان دا کم کردے نیں تے جواب وچ عمران خان نوں ایہناں دے ہتھوں نشانہ بنواندے نیں، ایس بارے وچ میں خود کئی وار لکھ چکیا واں کہ جدوں تیکر حکومت دےچنگے کماں دی تشہیر نہیں کیتی جائے گی۔ صرف اپوزیشن اُتے گولہ باری نال کوئی فائدہ نہیں ہوئے گا۔ فرخ حبیب جس ٹاک شو وچ حکومت دی نمائندگی کردے نیں، پوری تیاری نال جاندے نیں پورے حقائق تے اعداد و شمار نال اپنا موقف بیان کردے نیں ایس ویلے سب توں وڈی لوڑ ایس گل دی وی اے کہ وزارت اطلاعات حکومت تے میڈیا دے وچکار بہتر ریلیشن شپ لئی پل دا کردار ادا کرے۔ فرخ حبیب وچ ایہہ صلاحیت موجود اے۔ دیر آیددرست آید دے مصداق کپتان نے اپنی ٹیم وچ اک چنگا کھلاڑی شامل کیتا اے۔ سب توں اہم گل ایہہ وے کہ فرخ حبیب دی کابینہ وچ شمولیت نال تحریک انصاف دے کارکناں نے وی خوشی دا اظہار کیتا اے۔ اگرچہ ایس ویلے تحریک انصاف اُتے بوہت مشکل دور اے کارکردگی اُتے سوال اٹھ رہے نیں ، مہنگائی نے حکومت دے خلاف عوامی نفرت ودھا دتی اے۔ آپ عمران خان اپنی غلطیاں دا اعتراف کر رہے نیں تاں فرخ حبیب لئی ایہہ حالات نویں نہیں، اوہ اپنی گل کرن تے راہ کڈن دا ہنر جان دے نیں۔