جمعتہ المبارک ،رمضان تے کروناء

پروفیسر حکیم شفیق کھوکھر

نماز جمعہ دی ادائیگی لئی کسے جامع مسجد وچ جان دی تمنا ہر مسلمان دی ہوندی اے تے ایہہ مسجد جے شہر دی انج دی مسجد ہوئے جس دی تعمیر دے دوران قرآن مجید دی تلاوت کیتی جاندی رہی ہوئے تے بقول مولانا ڈاکٹر سید عبدالاقادر آزاد ایہنوں مسجد الحرام، مسجد نبوی تے مسجد اقصیٰ توں بعد روحانی طور اُتے فضیلت حاصل اے۔ کیوں جے ایس وچ موئے مبارک تے نعلین مبارک دے نال دوجے تبرکات وی موجود نیں آپ راقم وی ایس وچ اعتکاف دے دوران ایہناں فیوض و برکات دا مشاہدہ کر چکیا اے جیہڑے ایس توں منسوب نیں۔
پچھلے سال کرونا دی وجہ نال ایس وچ اجتماعی اعتکاف نہ ہو سکیا بس قاری ظہور صاحب نے ایہہ دینی فریضہ انجام دتا۔ ایس سال ہجے تیکر حکومت ایس سلسلے وچ گومگودی کیفیت دا شکار اے۔ حالانکہ دوجے معاملات وانگوں اعتکاف، 27 رمضان المبارک تے جمعۃ الوداع نوں وی کرونا ایس۔ او پیز دے تحت کرن دتا جائے تے ایس وچ نہ صرف وزرائے اعلیٰ، گورنرز تے خود وزیراعظم پاکستان شامل ہو کے ایس رب ذوالجلال دے حضور سربسجود ہو کے ایس وباء توں نجات لئی دعا منگن گے تے یقین اے کہ اوہ ضرور ایس وبا توں نجات دا وسیلہ بنا دیوے گا۔ کیوں جے نبی کریم ﷺ دے فرمان دے مطابق اللہ تعالیٰ انصاف پسندحکمران دی دعا قبول فرماندا اے ۔ ہرسال 27ویں رمضان المبارک نوں بادشاہی مسجد لہور وچ اجتماعی عبادت تے قرآن مجید دی تلاوت توں بعد مولانا سید عبدالقادر آزاد دی روائیت نوں اگے ودھاندے ہوئے مولانا سید عبدالخبیر آزاد چیئر مین مرکزی روئیت الہلال کمیٹی پاکستان اجتماعی دعا کراندے نیں جیہڑی ملک دا میڈیا پوری دنیا وچ پیش کردا اے انج اوہ لوک وی جیہڑے مسجد تیکر نہیں اپڑ سکدے اوہ اپنے گھراں وچ بہہ کے ایس دعا وچ شامل ہو جاندے نیں۔
امید اے کہ حکومت پاکستان تے وزارت مذہبی امور ایس سلسلے وچ موثر اقدامات کرے گی تاں جے پوری دنیا دے انساناں نوں ایس وباء دی تباہ کاریاں توں نجات مل سکے۔ ایسے امید اُتے نماز جمعہ دی ادائیگی لئی بادشاہی مسجد لہور دا رخ کیتا جتھے مولانا سید عبدالخبیر آزاد نے مقررہ ایس۔ او۔ پیز اُتے عملدرآمد لئی خاص اہتمام کر رکھیا سی۔ سارے نمازی ماسک پائے تے آپس وچ مناسب فاصلہ قائم رکھے ہوئے عبادت وچ مصروف سن تے حافظ محمد یونس ایہناں دی نگرانی کر رہے سن۔ اوہ ایس اُتے اینی سختی نال عمل پیرا سن کہ مینوں وی اگے جان توں روک کے پہلی صف وچ تھاں دے دتی، جتھے میں آرام نال نماز ادا کیتی تے خطبہ سنیا۔ مولانا عبدالالخبیر آزاد نے رمضان المبارک دی اہمیت تے ایس دے دوران کیتی جان والی عبادات دے نال ماں پیو دی خدمت، نبی اکرم ﷺ دا ناں مبارک آندے ای درود شریف پڑھن تے رمضان المبارک وچ اللہ تعالیٰ نوں راضی کر کے اپنی بخشش دا سامان کرن دی اہمیت نوں بیان کیتا۔ نماز دی ادائیگی دے بعد دنیا اُتے کرونا دی تیزی دے خاتمے، کشمیری مسلماناں دی بھارتی افواج دے ظلم توں نجات تے پاکستان دی ترقی تے سلامتی لئی دعا کیتی جس وچ اوہ لوک وی شامل ہو گئے جیہڑے اپنے گھراں وچ بہہ کے ایہہ اپنے ٹی وی اُتے ویکھ رہے سن۔
ہو سکدا اے کہ کجھ دوست ایس سلسلے وچ میری رائے نال اختلاف دا اظہار کریئے پر میں بادشاہی مسجد توں اپنے تقریباً 40 سالہ تعلق دی بنا اُتے ایہہ گل وثوق نال کہہ سکنا واں کہ واقعی اللہ تعالیٰ ایس مسجد وچ منگی کئی دعائواں نوں سندا اے۔ ہاں ایس لئی انسان دی دعائواں دا ایہناں پنج شرطاں اُتے پورا اترنا ضروری اے۔ ایس لئی سانوں اپنی دعائواں دا سلسلہ جاری رکھنا چاہیدا اے تے اللہ دی رحمت توں مایوس ہو کے کفر انہ الفاظ ادا کرن دی بجائے ایس توں گزارش کردے رہنا چاہیدا اے جویں کہ مولانا ڈاکٹر سید عبدالقادر آزاد نے اپنے خطبات وچ ارشاد فرمایا اے۔ ایس لئی میں توقع رکھنا واں کہ حکومت اپنی احتیاطی تدبیراں دے نال نال اللہ تعالیٰ توں فریاد وی جاری رکھے گی۔ تاں جے ایہہ صرف پاکستان توں بلکہ پوری دنیا توں وبا دے خاتمے دا سامان ہو سکے۔