اسلامی نظریاتی کونسل نے نیب آرڈیننس دی کجھ دفعات نوں غیر شرعی قرار دے دتا
اسلام آباد: اسلامی نظریاتی کونسل نے نیب آرڈیننس دی کجھ دفعات نوں غیر شرعی قرار دے دتا۔ چیئرمین اسلامی نظریاتی کونسل آکھیا نیب قنون نوں دین اسلام دے جرم و سزا دے قوانین نال ہم آہنگ قرار نہیں دتا جا سکدا۔
سربراہ اسلامی نظریاتی کونسل قبلہ ایاز نے اسلام آباد وچ پریس کانفرنس کردیاں آکھیا نیب آرڈیننس دی دفعات 14ڈی، 15اے تے 26غیر اسلامی نیں، وعدہ معاف گواہ بننا، پلی بارگین دی دفعات غیر اسلامی نیں، ملزم نوں زیادہ ویلے لئی زیر حراست رکھنا تے تشہیر کرنا غیر شرعی اے۔
قبلہ ایاز آکھیا پرویز مشرف دی لاش نوں ڈی چوک وچ لٹکانا عدالتی فیصلہ نہیں، جج دی آرا اے، بالاں تے جنسی تشدد دے سدباب لئی خصوصی پلس سٹیشن یاں خصوصی سیل قائم کیتے جان۔
دوجے پاسے چیئرمین اسلامی نظریاتی کونسل دے بیان تے ردعمل ظاہر کردیاں فواد چودھری آکھیا ادارے دی تشکیل نو دی لوڑ اے، اج تک مذہبی طبقیاں دی سوچ نوں نظریاتی کونسل توں رہنمائی نہیں ملی، جدید تقاضیاں توں ہم آہنگ انتہائی جید لوک ایس ادارے نوں سنبھالن۔
