پہلاں ای آکھیا سی ن لیگ تے پیپلزپارٹی آرمی ایکٹ وچ ترامیم دی حمایت کریگی: شیخ رشید

پشاور: شیخ رشید آکھیا اے پہلاں ای آکھیا سی ن لیگ تے پیپلزپارٹی آرمی ایکٹ وچ ترامیم دی حمایت کرے گی، عمران خان دا ایجنڈا احتساب اے، مارچ دے بعد احتساب اپنی اصل شکل وچ آ جاوے گا۔

وفاقی وزیر ریلوے شیخ رشید نے میڈیا نال گل کردیاں آکھیا آرمی چیف دی توسیع ساڈی قومی ذمہ داری سی۔ فضل الرحمان نے دسمبر دی گل کیتی سی پر دسمبر لنگھ گیا، پاکستان نوں خطے وچ نویں ذمہ داریاں ملن جا رہیاں نیں۔

اوہناں آکھیا بھارت وچ نوجوان اپنے حق لئی سڑکاں تے نیں، سارا بھارت مودی دے خلاف نکل آیا اے۔ شیخ رشید دا کہنا سی اضا خیل وچ نویں ڈرائی پورٹ دا افتتاح کر رہے آں، ڈرائی پورٹ 51کروڑ روپے نال مکمل کیتا گیا۔ رحمان بابا ٹرین تے 120فیصد بکنگ اے، سمگلنگ خاتمے دا واحد طریقہ ڈرائی پورٹ توں مال چکیا جاوے۔