اپوزیشن جماعتاں تقسیم، بجٹ وچ حکومت نوں پریشانی نہیں ہوئے گی

جے یو آئی ف دے مولانا فضل الرحمان مفاہمت دی سیاست نوں فروغ دین دی بھرپور کوشش کر رہے نیں

قاضی بلال

بدلتا ہے رنگ آسماں کیسے کیسے،کل تیکر اک دوجے دے نال مرن جین تے ہر حال وچ اک دوجے دا ساتھ دین تے سلیکٹڈ حکومت نوں گھر گھلن لئی بنایا گیا پاکستان ڈیمو کریٹک الائنس (پی ڈی ایم) ٹوٹیاں وچ بٹ چکیا اے۔ پاکستان پیپلز پارٹی تے مسلم لیگ ن ایس ویلے حکومت دی اپوزیشن کرن دی بجائے آپس وچ اک دوجے دی اپوزیشن کر رہے نیں۔ کراچی دے حلقے این 249 وچ مسلم لیگ ن دے مفتاح اسماعیل دی شکست دے بعد تے پیپلز پارٹی دے امیدوار دی فتح نے ایہناں دونواں جماعتاں نوں اک دوجے دا دشمن بنا دتا اے۔ بلاول بھٹو زرداری تے مریم نواز دی لفٹی جنگ نے پی ڈی ایم دا تے مکمل خاتمہ کر دتا اے۔ بلاول بھٹو زرداری ایتھوں تیکر کہہ دتا کہ حقیقی سلیکٹڈ تے ن لیگ اےجواب وچ مریم نواز وی چُپ نہ رہیاں تے ایہہ تیکر کہہ دتا کہ شیر دا شکار آسان نہیں پہلے ہرائو تو سہی۔ کراچی دے ایس حلقے وچ ن لیگ دی شکست نے دونواں جماعتاں نوں بوہت دور کر دتا اے تے بداعتمادی حد توں ودھ چکی اے۔ پیپلز پارٹی اُتے ن لیگ ولوں اسٹیبلشمنٹ دے ہتھاں وچ جان دے الزامات لائے گئے نیں۔ دوجے پاسے پیپلز پارٹی نے وی اوہ ای الزامات لائے کہ آیا آپ جیہڑے ڈسکہ تے نوشہرہ وچ جتے نیں تے کیہ آپ نے وی اسٹیبلشمنٹ نال ڈیل کر لئی اے۔ لگدا انج اے کہ پاکستانی سیاست وچ اسٹیبلشمنٹ نوں وی اک خاص مقام مل چکیا اے۔
ایس ساری لڑائی وچ حیرت ایس گل دی اے کہ فیصل واڈا مکمل چپ نیں کیہ ایہناں دی کارکردگی اینی بُری سی کہ ایہناں دی جماعت پنجویں نمبر اُتے آئی یا فیر عام انتخابات وچ لوک جتوائے گئے نیں وغیرہ وغیرہ جویں سوال لوکاں دے ذہناں وچ اٹھنا شروع ہو گئے نیں، تن توں چار ضمنی انتخابات وچ پاکستان تحریک انصاف دی شکست نے ایہہ ثابت کر دتا کہ اوہ تیزی نال اپنی مقبولیت کھوندی جا رہی اے۔ ضمنی الیکشن وچ عام تاثر ایہو ہوندا اے کہ جس دی حکومت ہوندی اے اوہ ای ضمنی انتخابات وچ کامیاب ہوندا اے ایس وار تاریخ الٹی چل پئی اے۔ ناقدین تے ایہہ وی کہندے نیں کہ مشتری ہوشیار باش والی پالیسی اختیار کر کے اپنے حقوق دا تحفظ کیتا جا رہیا اے۔ ڈسکہ انتخابات وچ ن لیگ دی جت تے نوشہرہ وچ وزیر دفاع پرویز خٹک دے حلقہ توں پی ٹی آئی دا ہرنا وی اک سوالیہ نشان اے۔ ہن صورتحال ایہہ ہو گئی اے کہ ووٹ نوں عزت دو دے نال نال ووٹ اُتے پہرہ دیو دی پالیسی سیاسی جماعتاں نے شروع کر دتی اے۔ دوجے پاسے الیکشن کمیشن شدید تنقید دے باوجود کسے دی نہیں سنی تے سخت فیصلے دے رہیا اے۔
جے یو آئی ف دے مولانا فضل الرحمان مفاہمت دی سیاست نوں فروغ دین دی بھرپور کوشش کر رہے نیں۔ دوجی وار اوہناں نے پیپلز پارٹی تے اے این پی نوں اتحاد وچ واپس آن دی دعوت دے دتی اے پر دونواں جماعتاں نے کوئی مثبت جواب نہیں دتا۔ شہباز شریف دی ضمانت اُتے رہائی دے بعد بظاہر اوہناں نے مورچے سنبھال لئے نیں تے اوہ وزیراعظم عمران خان ولوں انتخابی اصلاحات لئی اپوزیشن نال مذاکرات تے ایس دے نال نال الیکٹرانک ووٹنگ مشیناں دے اگلے عام انتخابات وچ استعمال دی دعوت اُتے شہباز شریف نے سخت بیان دتا اے تے ایہنوں مکمل طور اُتے مسترد کر دتا اے تے کہیا کہ پوری دنیا وچ ایہہ نظام فیل ہو چکیا اے تے اپوزیشن وچ ہوندے پی ٹی آئی خود ایس دی مخالفت کر چکی اے۔ شہباز شریف نے تاحال سیاسی ملاقاتاں شروع نہیں کیتیاں تے نہ ای کسے وڈی جماعت دی وڈی قیادت نال رابطہ کیتا اے البتہ میڈیا اُتے اوہ بیانات جاری کر رہے نیں، ن لیگ تے پی پی وچ دوریاں اینی ودھ چکیاں نیں کہ ہن حکومت نوں گھٹ توں گھٹ ایہناں دو جماعتاں توں کوئی خطرہ نہیں۔
اگلے مہینے وچ بجٹ اجلاس شروع ہو جائے گا۔ اپوزیشن جماعت دے منقسم ہون دی وجہ نال بظاہر حکومت نوں کوئی پریشانی نہیں البتہ جہانگیر ترین گروپ نال وزیراعظم دی ملاقات توں بعد تصویر کجھ صاف ہونا شروع ہو گئی اے۔ جہانگیر ترین ولوں ایہہ بیان آنا کہ بجٹ وچ ساڈے ایم این ایز تے ایم پیز مشکلات پیدا نہیں کرن گے ایس تاثر نوں تقویت دیندا اے کہ ہن جہانگیر ترین نوں جلدی کلین چٹ مل جائے گی۔ چینی بحران پیدا کرن والے اک وار فیر سیاست دی نظر ہو جان گے تے عوام پورا رمضان ایہناں مافیاز دی وجہ نال مہنگی چینی لائناں وچ لگ کے خریددے رہے۔ حکومت تاحال مہنگائی کنٹرول کرن وچ مکمل طور اُتے ناکام نظر آئی اے۔ عوامی مسائل اپنی تھاں ایسے طرح موجود نیں۔حکومت اپوزیشن تے اپنے مخالفین نوں رام کرن وچ ضرور کامیاب ہوئی اے۔ جہانگیر ترین نوں قابو کرن توں بعد بظاہر حکومت دے ساہمنے وڈا سیاسی چیلنج نہیں۔
معاشی طور اُتے کمزور ملک وچ نویں وزیر خزانہ شوکت ترین دی آمد تے ایہناں دا ایہہ بیان کہ آئی ایم ایف نے پاکستان دے نال زیادتی کیتی اے تے بجلی ٹیرف وچ وادھے دا مطالبہ ٹھیک نہیں۔ ہن ایہہ گل ثابت ہو گئی اے شیخ حفیظ واقعی پاکستان دے خیر خواہ نہیں سن بلکہ اوہ ہمیشہ توں آئی ایم ایف دے خیر خواہ رہے نیں۔ ملک وچ مہنگائی دا ذمہ دار وی سابق وزیر خزانہ حفیظ شیخ ای نیں۔ پوری قوم نوں پریشانی وچ پان والیاں نوں کدی کسے نے کجھ نہیں کہیا اے تے اوہ ایسے طرح بریف کیس چک کے واپس اپنے آقائواں دے کول چلے جاندے نیں۔ ایسے طرح ندیم بابر مشیر پٹرولیم ارباں روپئے جیب وچ پا کے چلدے بنے نیں۔ معیشت نوں سنبھالن دی کوشش کرن والے وزیراعظم نے مزید وزراء بنا کے اپنی کابینہ دی تعداد نصف سنچری مکمل کر لئی اے۔ کفایت شعاری دیاں گلاں کرن والی حکومت نوں چاہیدا اے کہ اوہ اپنی جہازی سائز کابینہ اُتے کنٹرول کرن۔ نویں مشیر خزانہ نوں چاہیدا اے کہ اوہ آئی ایم ایف نال مذاکرات ضرور کرن پر پاکستان دے مفادات نوں پہلے ترجیح دین۔ سب توں پہلے مشیر خزانہ نوں مہنگائی کنٹرول کرن لئی اقدامات چُکنا چاہیدے نیں نہیں تے مہنگائی ایس حکومت نوں لے ڈبے گی۔ عوام دا ہن وزیراعظم عمران خان دے نال رومانس ختم ہوندا جا رہیا اے۔ عوام نوں فوری ریلیف نہ ملیا تے عام انتخابات وچ پی ٹی آئی گمنام ہو سکدی اے۔