ہُو دی تار
گلفام نقوی
توں ایں توں ایں توں ہر سو
اللہ ہو، اللہ ہو
عشق دا بوٹا لا دے ربا
پیار دے ول سکھا دے ربا
لبھے دلڑی تیری جوہ
اللہ ہو، اللہ ہو
کعبہ گرجا مسجد مندر
دھرتی تے سنسار دے اندر
ذرے ذرے دے وچ تو
اللہ ہو، اللہ ہو
باہو جی دیاں سوچاں تائیں
معرفت دیاں رمزاں تائیں
جہڑا جانے اوہ باہو
اللہ ہو، اللہ ہو
وحدت دے نشے وچ گھوکن
عشق دی اگ وچ تن من پھوکن
بھن کے کوڑے جام سبو
اللہ ہو، اللہ ہو
پاک نبیؐ دی شان نرالی
امت اوہدی قسمت والی
لوں لوں وچ اوہدی خشبو
اللہ ہو، اللہ ہو
