غزہ وچ اسرائیل تے حماس دے درمیان جنگ بندی دا امکان

واشنگٹن( پنجابی میڈیا گروپ)غزہ وچ پچھلے10دناں توں جاری اسرائیلی وحشیانہ بمباری توں بعد ہن جنگ بندی دا امکان ظاہر کیتا جارہیا اے۔
امریکی میڈیا دے مطابق غزہ وچ پچھلے10دناں توں جاری اسرائیلی بمباری دے بعد ہن اسرائیلی حکومت تے فلسطینی مزاحمتی تنظیم حماس دے درمیان جنگ بندی دا امکان ظاہر کیتا جارہیا اے،مصری حکام نے حماس دی قیادت نال مذاکرات کیتے نیں جد کہ اسرائیلی نے تسلیم کیتا اے کہ ایس نے فوجی اہداف حاصل کرلئے نیں۔
امریکی میڈیا دا کہنا اے کہ جنگ بندی لئی امریکا، مصر تے قطر سنے ہور یورپی ملک اپنا کردار ادا کررہے نیں، اوہناں ملکاں ولوں غزہ دی خراب صورتحال دے باعث اسرائیلی وزیراعظم نیتن یاہو تے حماس دی قیادت اُتے کشیدگی ختم کرن لئی شدید دبا اے۔امریکی حکام دے مطابق بائیڈن انتظامیہ نوں حالیہ ہفتے دے دوران ہی سیز فائر دی اُمید اے کیوں کہ اسرائیل تے حماس دے درمیان کسی وی قسم دا تصادم اک وار فیر ایس نازک صورتحال نوں ہور خراب کرسکدا اے۔

اپنا تبصرہ گھلو