زنجیر
آتش کیانی
انھے نھیرے چار چفیرے لیکھیں میرے ویکھو جردا جاواں میں
تری یاری حرص دی ماری ہجر کٹاری دل نوں روگ کیوں لاواں میں
پیر پسارے یار پیارے آپ مہارے کھوبے کھبدا جاواں میں
ازلوں تیرے گل لگ میرے شکوے کہڑے دل وچ یار وساواں میں
لاویں لارے ڈھیر پیارے بے اتبارے کوڑیاں آساں لاواں میں
یار پرائی پیار دی پھاہی گل اچ پائی کیکر ہن پچھتاواں میں
ربوں آئی سینے لائی سر تے چائی اوہرے ڈنگ ٹپاواں میں
کرے تیاری پیار پجاری غرضاں ماری مول نہ یار ولاواں میں
دل بے مایا کس تے آیا قدر گنوایا کیتی گل نبھاواں میں
گل پرانی ڈھیر سیانی یار کیانی لکھیا جھولی پاواں میں
