سرکار دی ساری پالیسیاں دا مقصد پسے ہوئے طبقے نوں اُتے چُکنا اے:وزیراعظم

نوشہرہ: وزیراعظم عمران خان دا کہنا اے سرکار دا سب توں وڈا چیلنج ملک نوں فلاحی ریاست بنانا تے ساری پالیسیاں دا مقصد پسے ہوئے طبقے نوں اُتے اُکنا اے۔

اضاخیل ڈرائی پورٹ نوشہرہ دی افتتاحی تقریب نال خطاب کردیاں وزیراعظم عمران خان دا کہنا سی ڈرائی پورٹ نال تجارت وچ وادھا ہووے گا، روزگار ملے گا تے ایتھوں دے لوکاں نوں وی فائدہ ہووے گا پر ایس توں پہلاں ریلوے سسٹم دی بہتری لئی پیسہ خرچ نہیں کیتا گیا جہدے نال ریلوے دے حالات دن بدن وگڑدے گئے، انگریز جہڑی پٹڑیاں چھڈ کے گیا سی ایس توں گھٹ پٹڑیاں ہو گئیاں۔ وزیراعظم دا کہنا سی پاکستان وچ ماضی دی حکومتاں ایلیٹ کلاس تے مخصوص طبقیاں لئی آئیاں، ہولی ہولی سرکاری ہسپتالاں دا بھیڑا حال ہویا، لوک پرائیویٹ ہسپتال جان لگے پر ساڈی حکومت دا سب توں وڈا چیلنج ملک نوں فلاحی ریاست بنانا تے حکومت دی ساری پالیسیاں دا مقصد پسے ہوئے طبقے نوں اُتے چُکنا اے۔

وزیراعظم عمران خان آکھیا ریلوے دے مزدور تے انجینئر نوں کہنا چاہنا آں تسیں ریلوے نوں انج چلاؤ جیویں اپنی گڈی دی حفاظت کردے او تے اسیں کسے قسم دا سفارشی سسٹم نہیں لیاواں گے تے کرپشن کوئی وی کرے، تسیں صرف معلومات دیو، اوہناں کرپٹ عناصر دے خلاف ایکشن لینا ساڈا کم اے، شیخ رشید نے ریلوے دا خسارہ گھٹ کیتا، ریلوے نوں ہن پرائیویٹ سیکٹر دے نال مقابلہ کرنا اے۔

ایس توں پہلاں وزیراعظم ہاؤس ولوں ٹوئٹ وچ دسیا گیا وزیراعظم عمران خان نے اضاخیل ڈرائی پورٹ نوشہرہ دا افتتاح کر دتا، پاکستان ریلویز نے 12مہینے وچ 507ملین روپے دی لاگت نال اضاخیل ڈرائی پورٹ دا ایہ منصوبہ پایہ تکمیل تک اپڑایا، اضاخیل ڈرائی پورٹ 28ایکڑ تے محیط اے جہدے وچ مال برداری دی نقل و حمل یعنی لوڈنگ تے اَن لوڈنگ دی جدید سہولتاں دستیاب نیں۔ وزیراعظم ہاؤس دے مطابق ایہ ڈرائی پورٹ نوشہرہ شہر توں 8کلومیٹر دی دوری تے مین جی ٹی روڈ تے واقع اے تے ایہنوں رنگ روڈ پشاور دے نال براستہ سڑک رسائی وی حاصل ہووے گی۔ اضاخیل ڈرائی پورٹ دے راہیں کراچی بندرگاہ توں فریٹ دی ملک وچ نقل و حمل تے فیر ایس سامان دی افغانستان نوں براستہ سڑک منتقلی کیتی جا سکے گی۔

50% LikesVS
50% Dislikes

اپنا تبصرہ گھلو