امریکی ایوان نمائندگان وچ ایران نال جنگ روکن دی قرارداد منظور

واشنگٹن: امریکی ایوان نمائندگان نے صدر ٹرمپ دے ایران نال جنگ دے اختیار نوں محدود کرن دی قرارداد منظور کر لئی۔

امریکی میڈیا دے مطابق ایوان نمائندگان وچ ایران دے نال جنگ دے امکانات نوں گھٹ کرن لئی صدر ٹرمپ دے ایران نال جنگ دے اختیار نوں محدود کرن دی قرارداد منظور کر لئی گئی۔

قرارداد دے حق وچ 224جد کہ مخالفت وچ 194ووٹ پئے، ری پبلکن پارٹی دے 3ارکان نے وی قرارداد دے حق وچ ووٹ دتا جد کہ ڈیمو کریٹس دے 8ارکان نے پارٹی دے برعکس قرارداد دی مخالفت کیتی۔

امریکی نمائندگان دی قرارداد ہن سینیٹ وچ پیش کیتی جاوے گی۔ قرارداد وچ 1973دے جنگی اختیارات دے قنون دا حوالہ دتا گیا اے جہدے وچ کانگریس نوں امریکی صدر دی جنگ دے اختیارات دے استعمال بارے جانچ کرن دا اختیار دتا گیا اے۔ برطانوی میڈیا دے مطابق جے ایوان ولوں پیش کیتی ایہ قرارداد کانگریس توں منظور ہو جاندی اے تے ایہنوں ٹرمپ دے ممکنہ ویٹو دا ساہمنا نہیں کرنا پوے گا۔

ایس قرارداد نوں یک وقتی قرارداد دے طور تے پیش کیتا گیا اے جہدی منظوری لئی صدارتی دستخط دی لوڑ نہیں ہوندی اے۔ ایس بارے سپیکر نمائندگان نینسی پلوسی نے آکھیا امریکی حکومت نوں ہور تشدد روکنا چاہیدا اے جد کہ ٹرمپ دے فوجی اقدامات محدود کرن نال امریکی جاناں تے اقدار دا تحفظ ہووے گا۔

اپنا تبصرہ گھلو