مشرف غداری کیس: لہور ہائیکورٹ نے خصوصی عدالت دی تشکیل کالعدم قرار دے دتی

لہور: لہور ہائی کورٹ دے فل بنچ نے مشرف غداری کیس دا فیصلہ سنان والی خصوصی عدالت دی تشکیل کالعدم قرار دے دتی، درخواست سابق صدر پرویز مشرف ولوں دائر کیتی گئی سی، خصوصی عدالت نے آئین شکنی کیس وچ پرویز مشرف نوں سزائے موت سنائی سی۔

غداری کیس دا فیصلہ سنان والی خصوصی عدالت دی تشکیل دے خلاف پرویز مشرف دی درخواست تے لہور ہائی کورٹ دے جسٹس مظاہر علی اکبر نقوی دی سربراہی وچ فل بنچ نے سماعت کیتی، وفاقی حکومت ولوں ایڈیشنل اٹارنی جنرل اشتیاق اے خان پیش ہوئے تے خصوصی عدالت دی تشکیل بارے سمری تے ریکارڈ عدالت وچ پیش کیتا۔ اوہناں نے عدالت دے ساہمنے موقف اختیار کیتا پرویز مشرف دے خلاف کیس بنان دا معاملہ کدی کابینہ ایجنڈے دے طور تے پیش نہیں ہویا۔

جسٹس مسعود جہانگیر نے استفسار کیتا کہڑی تریخ نوں کابینہ دی میٹنگ ہوئی سی۔ حکومتی وکیل نے آکھیا 24جنو 2013نوں کابینہ دی میٹنگ ہوئی سی۔ عدالت نے وکلائے طرفین دے دلائل مکمل ہون دے بعد درخواست تے فیصلہ مھفوظ کر لیا جہڑا بعدوں سنادتا گیا۔ لہور ہائی کورٹ نے فیصلے وچ کریمنل لاء سپیشل کورٹ ترمیمی ایکٹ 1976دی دفعہ 4نوں کالعدم قرار دیندیاں آکھیا آرٹیکل 6دے تحت ترمیم دا اطلاق ماضی نال نہیں کیتا جا سکدا۔ واضح رہوے لہور ہائی کورٹ ولوں کالعدم قرار دتی گئی خصوصی عدالت نے پرویز مشرف نوں پھانسی دی سزا سنائی سی۔

50% LikesVS
50% Dislikes

اپنا تبصرہ گھلو