پیپلز پارٹی دی قوم پرست سیاست، پنجاب دا حق مار کے وی مندا بولیا جا رہیا اے

پیپلز پارٹی نے ملک دی تھاویں صوبائی تعصب دی سیاست نوں ہوا دِتی، اپنے حصے توں ودھ پانی لے کے وی پنجاب اُتے چوری دا چُوٹھا الزام لایا ، نفرت دی اَگ لائی

پیپلز پارٹی نے ملک دی تھاویں صوبائی تعصب دی سیاست نوں ہوا دِتی، اپنے حصے توں ودھ پانی لے کے وی پنجاب اُتے چوری دا چُوٹھا الزام لایا ، نفرت دی اَگ لائی

بلاول تے مراد علی شاہ سنے پیپلز پارٹی دے آگو پنجاب بارے زہر اُگل رہے نیں، پنجاب نے بہت برداشت کیتا پر ہُن مزاحمت تے جواب دین دی فضا بن رہی اے

لاہور(بلال مدثر)پیپلز پارٹی نوں چاراں صوبیان دی زنجیر آکھیا جاندا سی،ملک بھر وچ ایس جماعت دی عوامی نمایندگی وی سی تے عام آدمی کسے حد تیکر ایس طاقت نوں اپنے مسئلیاں دے حل نال وی جوڑ دا سی۔پیپلز پارٹی جے کر عوامی خواہشاں دی ترجمانی کردیاں اپنیاں سیاسی ذمے داریاں نبھاوندی رہندی تے گل ہورسی،بدقسمتی نال ایس جماعت نے لوکائی دی سیوا راہیںاقتدارتیکر اپڑن دی تھاویں منفی سوچ نوں پروان چڑھایا تے نفرت بھریاںسیاسی بنیاداں اُتے وڈے صوبے پنجاب اُتے الزام تراشی شروع کردتی۔ عوامی جماعت اکھوان والی پیپلز پارٹی نے سیاست نوں تعصب دے راہے پاکے ملک دیاں فضاواں وچ زہراں بھرنیاں شروع کردتیاں۔90 دی دہائی دے آغاز وچ ای اوس ویلے دی پیپلز پارٹی چیئرپرسن بے نظیر بھٹو نے سندھ دے پانی دی کمی نوں مسئلہ بناکے مہم چلائی کہ پنجاب اوہناں دے وسائل اُتے قبضہ کررہیا اے۔اوس ویلے دی دوجی وڈی سیاسی طاقت ،نواز لیگ نے ایس دبا ئووچ آکے ناصرف پنجاب دے حصے وچوں پانی دے دتا بلکہ کالا باغ جیہے اونھاں منصوبیاں اُتے وی سمجھوتا کرلیا جیہڑے پنجاب دی زرعی شہ رگ ثابت ہو سکدے سن۔پنجاب دی قیادت،یعنی میاں نواز شریف ہوراں ہر تھاویں پنجاب دے حقاں اتے کمرومائز کردیاں کوشش کیتی کہ خورے سندھ وچ اونھاں دا ووٹ بینک ودھ جاوے یا اوہ پیپلز پارٹی دی زہریلی تے تعصب نال بھری سیاست دا جواب دے سکن۔ایس پالیسی وچ اوہ بری طرح ناکام ہوئے،اک پاسے پنجاب دے حق مارے گئے تے دوجے بنھے پیپلز پارٹی دی نفرت بھری سیاست سندھی لوکائی نوں ایہہ ثابت کرن وچ کامیاب رہی کہ اونھاں دیاں محرومیاں دے ذمے دار مقامی وڈیرے یا سیاست دان نہیں بلکہ پنجاب اے۔
ماضی دی ایہ سیاست اج اک واری فیر ابھر کے سامنے آرہی اے۔پیپلز پارٹی اک واری فیر پنجاب مخالف بیان دے کے اپنے کرپٹ وزیراں تے حکمراناں دے کالے کرتوت لکان دی کوشش کر رہی اے۔بلاول بھٹو ہون یا مراد علی شاہ،مرکزی تو ں لے کے عام قیادت تیکر ہر کوئی پنجاب نوں گالھ کڈھ رہیا اے تے ایہہ تاثر ابھار رہیا اے کہ سندھ دا پانی وڈاصوبہ چوری کررہیا اے حالانکہ ایہہ الزام اُکا ای چوٹھ اے۔حقیقت ایہہ ہے کہ پنجاب ہُن وی اپنے حصے دا پانی سندھ نوںدے رہیا اے جیہڑا پنجاب دے عام کسان نال ظلم اے۔پنجابی کسان دیاں فصلاں تے برباد ہورہیاں نیں پر اوہدا مقدمہ لڑن والا کوئی نہیں۔اج اپنجاب اپنا حق دے کے وی طعنے سن رہیا اے،تے طعنے دین والے اوہ لوک نیں جنھاں ہمیشہ اپنے حصے توں ودھ پانی لیا تے پنجاب دے وسائل اُتے وی ہمدردی دے ناں اُتے ڈاکہ ماریا۔پیپلز پارٹی صوبے دی حکومت پکی کرن لئی سیاست دا اوہ گندا کھیڈ کھیڈ رہی اے جیہدے اُتے پنجاب حکومت بھاویں چپ رہوے،عام پنجابی چپ نہیں رہن لگا۔پیپلز پارٹی جیہڑی ہُن قوم پرست سندھی جماعت بن کے رہ گئی اے ،اوہ تعصب دا جنھاں زہر گھولے گی ہُن پنجاب ولوں اونھوں جواب وی ملے گا۔
سیاسی جماعتاں پنجاب دی گل کرن یا نہ کرن پنجابی یونین سنے پنجاب دے حقاںلئی گل کرن والیاں جماعتاں عملی میدانے جواب دین لئی تیار نیں۔سیاسی حوالے نال ویکھیے تے ایہہ وڈی بدنصیبی اے جیہڑی ملکی بنیاداں نوں کمزور کرے گی۔پر جے کر پنجاب نوں ہور دبایا گیا تے اوہدے وسنیکاں دے حق مارکے وی گالھاں کڈیاں گئیاں تے حالات کدی وی قابو وچ نہیں رہن گے۔پنجاب حکومت نوں چاہیدا اے کہ اوہ انھاں لوکاں دے حق لئی کھلوئے جنھاں اونھوں ووٹ پائے نیں۔جیہڑے اوہدے توں امید کردے نیں کہ اوہدے پانیاں دی گل ہووے یا کالاباغ سنے دوجے بنیادی مسئلیاں دی،اوہدی حکومت اوہدی لڑائی لڑے گی۔پنجاب حکومت اتے واضح ہونا چاہی دا اے کہ عام پنجابی دا مسئلہ صوبے دی ونڈ نہیں بلکہ پانی سنے اونھاں بنیادی حقاں دا حصول اے جیہڑے صوبائی تعصب دی نذر ہورہے نیں۔