پنڈوسیا وی نہیں تے اُچکے تیار

لكهت:مطلوب وڑائچ

مینوں پی ڈی ایم تے اوہدے توں کونج دے ڈار وانگوں وِچھڑن وانگوں وکھ ہوئی پیپلزپارٹی ولوں بیاناں توں اوہ کہاوت یاد آ رہی اے کہ پنڈ وسیا نہیں تے اُچکے تیار۔ پی ڈی ایم دا اجلاس ہویا جہدے وچ بجٹ وچ حکومت نوں ٹف ٹائم دین تے مظاہریاں دا اعلان کیتا گیا اے۔ بلاول ولوں وکھرا کہیا گیا اے کہ بجٹ دی منظوری نوں نکام بناواں گے۔ مسلم لیگ (ن) دے صدر شہبازشریف یوم تکبیر دے موقعے تے وی سیاست وچ لت اڑان توں باز نہ آئے۔ اوہناں دا کہنا سی عوام دشمن بجٹ منظور نہیں ہون دیاں گے۔ بجٹ دے پیش ہون وچ تن دن پئے نیں۔ بجٹ کیہو جیہا ہووے گا۔ ایہدے وچ لوکاں نوں ریلیف دتا جاوے گا یاں نہیں۔ کوئی وی حکومت ہووے اوہدی بجٹ توں علاوہ وی لوکاں دی زندگی سوکھی بنان دی کوشش ہوندی اے۔ وسیلے سامنے آن تے مطلوبہ ریلیف نہیں دتا جا سکدا۔ اج اپوزیشن ولوں بجٹ نوں عوام دوست بنان دیاں تجویزاں دینیاں چاہیدیاں نیں۔ اپوزیشن دے زیادہ تر لیڈر کرپشن زدہ نیں۔ اوہناں توں لٹ مار دے گُر ای سامنے آ سکدے نیں اوہدی رائے نوں بھاڑ وچ سٹ دینا چاہیدا اے پر اپوزیشن وچ اہل‘ ایماندار‘ مخلص تے تجربہ کار سیاستدان وی نیں۔ حکومت اوہناں نال مشاورت کر سکدی اے۔
پی ڈی ایم استعفیاں دے معاملے تے انج بکھری کہ اوہدی شیرازہ بندی ممکن نہیں۔ پی پی پی حکومتی مراعات توں کیویں دستبردار ہو سکدی اے اوہنوں پی ڈی ایم وچ جان داشوق نہیں۔ پی ڈی ایم تے لت ای اپنی سندھ حکومت بچان تے سٹیٹس کو برقرار رکھن لئی ماری سی۔ ایہدے لئی ہر حکومتی ادارہ کارآمد اے حالاں کہ کچے دا اوہ علاقہ جتھے ڈاکوراج اے اوہ وی ایہدے لئی بہتر اے۔ جنرل آصف نواز جنجوعہ کور کمانڈر کراچی سن۔ اوہناں نے سندھ وچ ڈاکوئواں خلاف اپریشن کیتا تے محترمہ بینظیر بھٹو نے ہتھ ہولا رکھن نوں کہیا تے جنرل صاحب نے کہیا کسے نال رعایت نہیں ہووے گی۔ اوہناں دا ایہ جرأت اظہار نوازشریف تک اپڑیا جو بینظیر بھٹو شہید دی تھاں وزیراعظم بن چکے سن تے اوہناں نے جنرل آصف نواز نوں آرمی چیف بنا دتا۔ سندھ وچ ڈاکوراج اے یاں ڈاکو راج وچ نیں ایہدا فیصلہ تے آن والے کجھ مہینے وچ ہو جاوے گا جدوں ایہو کچے دے ڈاکوئواں نوں سندھی اجرک تے ٹوپی پہنائی جا رہی ہووے گی۔ ڈاکو سردار تیغانی دا بلاول دے سیف ہائوس توں پھڑیا جانا بالکل انج ای اے۔ جیکب آباد تے دادو دے جنگلات وچ ڈاکوئواں دی تلاش دوران واقعہ پیش آیا جدوں ڈاکوئواں نوں پھڑن والی پولیس ٹیماں تے رینجرز نوں اطلاع ملی کہ جس شاہکار دی اوہناں نوں تلاش اے اوہ بلاول ہائوس دے سیف ہائوسز وچ پُتر‘ دھیاں‘ بھانجے بھانجیاں دے نال آرام کر رہے نیں تے رینجرز نے اوہناں نوں اوتھوں پھڑ لیا واللہ معجزہ۔ ایس توں پہلاں وی کراچی وچ قتل و غارت دا بازار گرم ہویا تے تاوان‘ بھتہ خوری تے جنگل دا قنون بن گیا۔ پولیس نکام ہوئی تے فیر رینجرز نے بلاول ہائوس اک لگژری سیف ہائوس چوں عزیر بلوچ نوں پھڑ لیا جنہے سینکڑوں انساناں نوں قتل کرن دا اعتراف کیتا۔
میرے پیارے قارئین! ایس گل دے گواہ رہوو کہ بڑی چھیتی پیپلزپارٹی جہڑی چاروں صوبیاں توں ہن صرف اندرون سندھ تک سُنگڑ گئی اے تے بڑی چھیتی جدوں ایہ جماعت گلی محلیاں تک محدود ہو جاوے گی تے ایہدی لیڈرشپ سندھ کارڈ دا پتہ استعمال کرے گی تے اج دے ایہ پالے ہوئے ڈاکو کل نوں سندھو دیش دا پہلا دستہ ثابت ہون گے۔ بلاول ہائوس دے کوارٹراں توں سردار تیغانی دا پھڑیا جانا مملکت لئی الارمنگ نیوز اے کیوں جے بڑی چھیتی پیپلزپارٹی کالعدم جئے سندھ دے نقش قدم تے چلن والی اے۔
دوستو! سندھ حکومت عبداللہ شاہ دا پُتر مرادعلی شاہ چلا رہیا اے۔ باپ وی بھٹو خاندان دا وفادار سی تے پُتر نے وی ایس وراثت وچ کوئی کسر نہیں چھڈی۔ ایہناں دوہاں پیو پتراں دے ہاں مثلاً بے نظیر تے راقم اکثر امریکہ یاترا دوران ٹھہردے سن۔ اج مرادعلی شاہ نے اندرون سندھ نوں ڈاکوئواں دے بظاہر حوالے کر دتا اے پر تھوڑی جہی وی سوجھ بوجھ رکھن والے ایہ چنگی طرح سمجھدے نیں کہ پیپلزپارٹی ہولی ہولی سندھ کارڈ کھیڈن لئی پوری تیاری کر رہی اے۔ بلاول بھٹو دے عزائم بھاویں کجھ وی ہون پر بلاول دی پھوپھی بلاول دے باپ نوں کون نہیں جان دا تے جہڑا وی چشم پوشی کر رہے نیں اوہ پاکستان دی سلامتی نال گھنائونا کھیڈ کھیڈ رہے نیں۔ ڈھائی کروڑ توں ودھ آبادی والا کراچی پہلے ای نفرتاں دا شکار ہو کے دھڑیاں وچ ونڈیا جا چکیا اے جد کہ تھر وچ پانی دا ڈاڈھا بحران اے تے سندھ دا جاگیردار طبقہ (یاد رہوے کہ جاگیردار ہن صرف سندھ وچ ای پائے جاندے نیں) پنجاب تے بلوچستان دا پانی چوری کرن دے باوجود سندھ دے چھوٹے کاشتکاراں نوں پانی دی منصفانہ ونڈ وچ اُکا نکام اے جد کہ قیام پاکستان دے بعدوں پنجاب وڈا بھائی ہون دے ناطے اپنی طاقت توں ودھ کے چھوٹے بھراواں دی پرورش کر رہیا اے پر پنجاب نوں پین والیاں گالھاں ایس گل دیاں گواہ نیں کہ چھوٹے بھراواں نوں وڈے بھرا دی قربانی دا اُکا احساس نہیں ایس لئی ہن حکمراناں تے لوکاں نوں پاکستان دے معروضی حالات نوں سمجھدے ہوئے کوئی دلیرانہ فیصلہ کرنا ہووے گا۔٭