غدارِ وطن میر صادق تے حامد میر

مسلماناں نوں جدوں وی نقصان اپڑایا غداراں نے اپڑایا

فاطمہ جہاں

گھر دا بھیدی لنکا ڈھائے۔ ایہہ بڑی پرانی کہاوت اے۔ پر ایہدے وچ بڑی سچائی اے۔ اوس ویلے تک کوئی کسے دا کجھ نہیں وگاڑ سکدا جد تک گھر دے وچوں نہ کوئی غدار جمے ۔ ایہہ گل ہمیشہ یاد رکھو جدوں اپنیاں وچ غدار، مکار تے منافق پیدا ہون لگن تے میدان وچ کھلوتا شیر وی کتیاں کولوں ہار جاندا اے۔ ٹیپو سلطان نوں جنھے دھوکا دتا اوہ میر صادق سی۔ اوہنے سلطان نال دغا کیتا۔ انگریز نے انعام دے طور تے اوہدیاں کئی نسلاں نوں نوازیا ۔ ماہانہ وظیفہ ملدا رہیا پر میر صادق دیاں نسلاں وچوں جیہڑا وی کوئی وظیفہ لین آندا۔ عدالت وچ آواز لگدی ’’میر صادق غدار دے ورثا حاضر ہون‘‘۔ ایہہ گل یاد رکھو شہید وی صدیاں بعد قبر وچ جا کے وی زندہ رہندا اے۔ اوسے طراں غدار دی غداری وی صدیاں زندہ رہندی اے۔ فرق صرف ایس گل نال پیندا اے کہ کون بدنام ہویا تے کون نامور ی کما گیا۔
حامد میر، کہن نوں تے اک صحافی اے۔ پر اپنی ماں نال غداری کردا پیا اے۔ ایہدے کالم، انٹرویو کوئی وی پروگرام ویکھ لوئو۔ صرف تے صرف پاکستان دے خلاف نیں۔ کوئی وی موقع ہووے ایہہ اپنے وطن دا سودا کرن لئی ہر ویلے تیار رہندا اے۔ دشمناں نوں کوئی نہ کوئی کہانی دے چھڈدا اے۔ اپنے اداریاں دی ہرزہ سرائی ہر پلیٹ فارم تے کردا اے تے ایہدا موقف ہندا اے کہ پاکستان وچ صحافت دی آزادی نہیں۔ ہور کیہڑی آزادی اینوں چاہیدی اے جد وی کوئی میٹنگ معزز اداریاں دی ہوندی ایہہ اینوں عزت تے مان دتا جاندا اے۔ ایہدیاں ویڈیو تے میڈیا ایس گل دا گواہ اے حالانکہ غدار دی سزا اے کہ اوہنوں پھانسی دے دتی جاوے۔ ایہدے وچ کوئی دورائے نہیں کہ حامد میر دے کردار تے نظر دوڑائو تے سارے ایس رائے دے نال ہون گے کہ غداری دے تمام پہلوواں تے پورا اُتردا اے۔ میڈیا وچ ایہدیاں تقریراں کالم تے Tweets ایس گل دے گواہ نیں۔
چند دیہاڑے پہلے دی گل اے اسلام آباد دے پریس کلب دے باہر اک مظاہرہ صحافی اسد طور دے حق وچ ہویا۔ ہونا وی چاہیدا سی کیونکہ کسے وی صحافی نال ایہہ زیادتی پوری صحافت نال اے۔ ادارہ بدنام ہو جاندا اے افواہاں پھیلن لگ جاندیاں نیں کہ صحافت آزاد نہیں۔ گلوبل میڈیا وچ ایہہ گل پھیل جاندی اے۔ تے فیر ساری دنیا دیاں نظراں پاکستان دی آزادی نوں شک دی نظراں نال ویکھن لگ پیندیاں نیں۔
حامد میر دا طریقہ واردات کیہ اے سب جاندے نیں۔ اوہ مظاہریاں وچ شرکت کردا اے۔ مائیک اپنے ہتھ وچ پھڑدا اے اصل ایشو تے بولن دی بجائے ملکی معزز اداریاں دی ہرزہ سرائی شروع کر دیندا اے۔ ایس واقعہ وچ وی اوہنے آئی ایس آئی تے سنگین الزامات لائے نیں۔ نازیبا الفاظ استعمال کیتے نیں جیہدی ویڈیو ساری دنیا وچ وائرل ہو گئی اے۔ اوہنے ایس ادارے واسطے بزدلو، بے غیرتو دے الفاظ استعمال کیتے۔ ایتھوں تک کیہا کہ اسیں تہاڈے گھر وڑ کے جانوں مارتے نہیں سکدے کیونکہ تہاڈے کول ٹینک تے بندوقاں نیں پر اسیں تہاڈے گھر دیاں گلاں باہر لیا سکنے آں۔ اسیں تہاڈے گھر وڑ کے دساں گے کہ آرمی والیاں دے گھر کیہ ہوندا اے۔ حامد میر ایہو جہیاں کوششاں کنی وار کر چکیا اے لیکن ہمیشہ اوہنوں منہ دی کھانی پئی اے۔ پتہ نہیں ایہنوں آرمی تے سول اداریاں نوں لڑان وچ کیہ مزا آندا اے۔ اسلام آباد وچ وی اینٹی آرمی صحافیاں دا گروپ اے جنہوں کجھ سیاستداناں دی حمایت حاصل اے مخصوص موم بتی مافیا وی ایہدے وچ شامل اے۔
گل ہو رہی اے حامد میر دی۔ اسد طور تے حملہ 5th genertation war دی اک کڑی اے۔ ایہدے وچ ملک دی سب توں وڈی ایجنسی نوں اُلجھایا جا رہیا اے پر ایس حملے وچ اوہناں لوکاں دیاں شکلاں واضح نیں۔ تفتیش اگے ودنی چاہیدی اے۔ سی سی ٹی وی کیمریاں وچ اوہناں دیاں شکلاں واضح نظر آ رہیا نیں۔
حامد میر نے کسے وی ثبوت توں بغیر کہہ دتا کہ ایہہ ایجنسی دے بندے سن۔ حالانکہ اوہ اگر ویکھدے کہ جتھے اسد طور رہندا اے اوس عمارت وچ بڑے کیمرے نیں۔ اگر ایہہ کم ISI نے کرنا ہوندا تے اوہ اینے کیمریاں دی موجودگی وچ کاروائی کر کے کسے بندے نوں ہیرو بنا کے چلے جان، سوچن دی گل اے، سمجھ وی نہیں آندی۔ اطلاعات دے مطابق حامد میر نوں نوکری توں برطرف نہیں کیتا گیا بلکہ اوہناں دے پروگرام Capital Talk نوں آف ایئر کر دتا گیا اے۔ تے اوس ویلے تک آف ایئر رہن گے جد وں تک ایس معاملے دا کوئی حل نہیں نکل آندا۔ ذرا ماضی ول نظر دوڑائو جدوں حامد میر تے حملہ ہویا سی اوہدوں وی جیو نیٹ ورک تے پابندی لگ گئی سی کیونکہ حملہ وی فیک سی۔ جھوٹھا پروپیگنڈا کیتا گیا سی۔
ہن وی جیو نیوز نے ایس بارے وچ اپنی کوئی پوزیشن واضح نہیں کیتی بلکہ تحریری طور اُتے کوئی کاروائی وی نہیں کیتی۔ جیو نیوز واسطے ایہہ فیصلہ آسان نہیں ہیگا کیونکہ جیو نیوز تے حامد میر دی نقطہ نظر ہمیشہ اک ای رہیا اے۔ یعنی آرمی تے ملکی معزز اداریاں دے خلاف ہرزہ سرائی۔ جیو نیوز نہیں چاہندا کہ اوہنوں حامد میر دے کیے دھرے دا خمیازہ بھگتنا پوے۔ جسطراں پہلوں بھگتنا پیا سی۔ ایس لئی اوہدا پروگرام آف ایئر کر دتا اے۔
بند کمرے دی میٹنگ وچ ایہہ فیصلہ کردیاں ہویاں قمر باجوہ نے کہیا اے کہ ’’ساڈی پالیسی صحافتی برادری نوں ہراساں کرنا نہیں۔‘‘
جس دیہاڑے ایہہ تقریر ہوئی اوسے دن وزارت اطلاعات تے ISI دا رابطہ ہویا۔ اعلیٰ سطحی اجلاس ہویا۔ پریس ریلیز جاری کیتی گئی کہ ساڈا ایس معاملے نال کوئی تعلق نہیں۔ عام طور تے ISI ایسا رد عمل ظاہر نہیں کردی پر ایہہ ضروری سی۔
حامد میر دی ایس غداری نے جھوٹے بیانیے نوں ملک دشمن لوکاں نے بڑھا چڑھا کے پیش کیتا تے کہیا جا رہیا اے۔ انڈیا وچ ایس بیانیے نوں ہیڈ لائنز بنایا گیا کہ ویکھو اوتھے صحافت آزاد نہیں تے پاکستان وچ سب کجھ آرمی کرواندی اے۔
پاکستان وچ عوامی سطح تے ایہہ مطالبہ زور پھڑدا جا رہیا اے کہ ایس معاملے دیاں تحقیقات کرائیاں جان تے ملزمان نوں سنگین سزا دتی جاوے کوئی ایسا قانون بنایا جائے کہ ہر کوئی ایرا غیرا نتھو خیرا پاکستان تے پاکستانی معزز اداریاں دے خلاف جھوٹا پروپیگنڈہ نہ کر سکے۔ ISI ایہناں ملزمان دی گرفتاری وچ ملکی اداریاں نال تعاون کرے گی۔ وزارت داخلہ ولوں تحقیقات وی کروائیاں گئیاں نیں۔ شیخ رشید دے بقول اک سی سی ٹی وی فوٹیج ملی اے جہدے وچ اوہناں دیاں شکلاں واضح نیں تے اسیں اوہناں دے نیڑے پہنچ رہے آں۔‘‘
ہر محب وطن دے دل وچ ISIتے معزز ملکی ادارے بڑے اہم نیں۔ اوہناں ول کوئی انگلی چُکے کوئی محبت وطن برداشت نہیں کرے گا۔ غدار دی سزا صرف پھانسی اے۔ لوکی اپنی ذاتی دشمنیاں کڈن لئی اوچھے ہتھ کنڈے اپناندے نیں۔ کسے نوں وی بدنام کرنا ۔ غداری کرنا تے جھوٹا پروپیگنڈہ کرنا۔
حامد میر دا خیال سی کہ ایہہ گلاں کر کے اوہ کوئی بھگت سنگھ ہیرو یا I-con بن جاوے گا۔ آزادی دااستعارہ بن جاوے گا۔ کوئی اوہدے نال نہیں کھلوتا ایس جنج وچ بینڈ، باجا تے باراتی سب غائب نیں حامد میر کلا رہ گیا اے۔ تازہ ترین بیان دے مطابق حامد میر نے کہیا اے کہ جے اسد طور نوں انصاف مل جاندا اے تے میں اپنا بیان واپس لے لواں گا تے نالے معافی منگ لواں گا۔
اصل گل تے ایہہ غداراں نوں سزا دتے بغیر شُتر بے مہار وانگوں چھڈ کے اسیں ملکی سلامتی نوں دائو تے نہیں لا سکدے۔ ملکی اداریاں دے خلاف ناں جائو ایہہ ساڈی سلامتی دے ضامن نیں۔ ایہہ ٹرینڈ کیوں بن گیا ایہہ کہ جیہڑے اینٹی ملٹری صحافی ہندے نیں اوہی چنگے ہندے نیں۔ ایہہ ساڈی سب دی ذمہ داری اے کہ اسیں اپنے معاشرے وچ لُکیاں ایناں کالیاں بھیڈاں نوں لبھئے تے کیفر کردارتیکر پہنچائیے۔ جنھاں کوئی غدار کسے قوم نوں نقصان اپڑاندا اے ہور کوئی نہیں ، غدار ہر ادارے وچ موجود ہندے نیں۔ صحافت، عدالت، سیاست، کوئی وی ادارہ ہووے۔ ہر اوہ بندا غدار اے جیہڑا اپنے گھر دے خلاف اے تے دشمناں نوں نقب لان وچ آسانی دیندا اے۔ساڈے ملک وچ وی اوہ قانون بننا چاہیدا اے جہدے وچ غدار نوں کیفر کردار تیکر اپڑایا جا سکے۔ پورے ملک دی سلامتی نوں کھڈے لائن نہیں لا سکدے۔ پاکستانی محب وطن عوام کسے نوں ریڈ لائن کراس کرن دی اجازت نہیں دین گے۔ مسلماناں نوں جدوں وی نقصان اپڑایا غداراں نے اپڑایا۔ ایہہ کم حضرت عثمان غنی ؓ توں شروع ہویا اج تک جاری و ساری اے۔ جہدے پچھے پیسے دا اقتدار دا لالچ اے۔
جیہڑا غدار وطن ہندا اے اوہ کدی وی یارِ وطن نہیں ہوندا۔