قبائلی علاقیاں وچ بیرونی عناصر انتشار پھیلان دی کوشش کر رہے نیں: وزیراعظم

اسلام آباد: وزیراعظم عمران خان آکھیا اے قبائلی علاقیاں وچ بیرونی عناصر انتشار پھیلان دی کوشش کر رہے نیں۔ وزیراعظم عمران خان دی زیر صدارت صوبہ خیبر پختونخوا وچ توانائی، اعلیٰ تعلیم، صحت، ترقیاتی منصوبیاں بارے اجلاس ہویا جہدے وچ خصوصاً ضم شدہ قبائلی علاقیاں وچ ترقیاتی منصوبیاں دی رفتار دا جائزہ لیا گیا۔

حکام نے وزیراعظم نوں بریفنگ وچ دسیا ضم شدہ علاقیاں وچ ترقیاتی منصوبیاں دی بلاتعطل پیش رفت نوں یقینی بنان لئی وزارت خزانہ توں مطلوبہ فنڈز دی فراہمی نوں یقینی بنایا گیا اے۔ وزیراعظم نے اجلاس نال خطاب کردیاں آکھیا انضمام شدہ علاقیاں دے عوام باشعور نیں، اوتھے تعمیر و ترقی تے ملک دے دوجے حصیاں دے برابر لیانا حکومت دی اولین ترجیح اے۔

عمران خان آکھیا حکومت نوں ایس امر دا مکمل ادراک اے بعض بیرونی عناصر ایہناں علاقیاں وچ انتشار پھیلان دی کوشش کر رہے نیں، اسیں عوام دے نال رل کے اجہے بیرونی عناصر دیاں سازشاں نوں نکام بنانا اے۔

ایہدے لئی ضروری اے کہ ترقیاتی منصوبیاں تے مسئلیاں دے حل دے سلسلے وچ کیتی جان والی کوششاں نال انضمام شدہ علاقیاں دی عوام نوں مکمل طور تے باخبر رکھیا جاوے تے اوہناں نوں ایس پورے عمل وچ ہر طرح توں شریک بنایا جاوے۔ وزیراعظم آکھیا تعلیم تے خصوصاً ہائر ایجوکیشن وچ سرمایہ کاری حکومت دی اولین ترجیح اے، ایس سلسلے وچ حکومت ہر ممکنہ کوشش کرے گی کہ تعلیمی اداریاں دی جائز ضرورتاں نوں پورا کیتا جا سکے۔

50% LikesVS
50% Dislikes

اپنا تبصرہ گھلو