بزدار سرکار کدھرے نہیں جا رہی،وزیر اعظم مطمئن،مخالفاں نوں چپ لگ گئی

عمران خان ولوں عثمان بزدار دے خلاف سازشاں کرن والیاں نوں کرڑا پیغام،غلطیاں دسو ایکشن لواں گا،بے وجہ تنقید تے سازشاںبرداشت نہیں

عثمان بزدار نوں وسطی تے اپر پنجاب اُتے توجہ دین دی ہدایت،باغی گروپاں خموشی اختیار کر لئی،ترین سنے نکے موٹے گروپ وی بیک فٹ تے چلے گئے

ہُن بزدار سرکار نوں اپنی کارکردگی نال اہلیت ثابت کرنا پوے گی،جنوبی پنجاب نوں سنواردے سنواردے باقی پنجاب گوا لینا گھاٹے دا سودا ہوویگا

لہور(بلال مدثربٹ)پنجاب وچ ان ہاوس تبدیلی دیاں جیہڑیاں سازشاں ہورہیاں سن تحریک انصاف دی مرکزی قیادت نے اونھاں دا مکو ٹھپ دتا اے۔انتہائی باخبر ذرائع دے مطابق عثمان بزدار ہوراں دے خلاف اکٹھ کرن والے ارکان اسمبلی تے جماعت دے کچھ آگو اپنا مخصوص گروپ بنا کے بلیک میل کر رہے سن،جنھاں نوں وزیر اعظم ولوں سخت سرزنش دا سامنا کرنا پیا اے۔وزیر اعظم نے باغی ارکان جنھاں وچ ترین گروپ سنے دوجے نکے نکے گروہ وی شامل سن،اونھاں نوں واضح اکھراں وچ پیغام دتا اے کہ اونھاں جو کرنا اے کر لین،میں بلیک میل نہیں ہونا۔فیصلے کارکردگی دی بنیاد اُتے ای کیتے جان گے،کسے دی پسند ناپسند دی کوئی حیثیت نہیں۔نال اونھاں ایہہ وی آکھیا اے کہ عثمان بزدار نال کسے نوں اختلاف اے تے اوہ وجہ دسے،غلطیاں اُتے بزدار سرکار دا احتساب وی ہووے گا پر ایہہ کدی نہیں ہوسکد اکہ تسیں بغیر کسے وجہ تو ںبزدار ہوراں نوں بدلن دی ضد کرو تے آکھو کہ ان ہاوس تبدیلی ضروری اے۔ذرائع دے مطابق عثمان بزدار ہوراں نوں ایہہ پیغام دتا جا چکیا اے کہ اوہ اپنے کم اُتے توجہ دین تے سازشی تھیوریاں دی پروا نہ کرن۔اونھاں نوں ایہہ وی آکھیا گیا اے کہ جنوبی پنجاب دے نال نال وسطی تے اپر پنجاب نوں وی ٹائم دین تاں جے ایہناں علاقیاں وچ نواز لیگ دا زور توڑیا جا سکے۔ایس سارے معاملے وچ گورنر پنجاب چوہدری سرور نے اہم کردار ادا کیتا جنھاں آپسی اختلاف مکاون تے تحفظات دور کرن لئی دوواں فریقاں نوں قائل کیتا۔
وزیر اعظم ولوں عثمان بزدار ہوراں نوں تسلی بخش پیغام ملن نال اک پاسے تے ترین گروپ دے رویے وچ واضح تبدیلی آئی اے دوجے بنھے اوہ چھوٹے موٹے گروپ جیہڑے عثمان بزدار ہواں نوں دبا چہ لیا رہے سن اونھاں دا وجود وی ختم ہندا نظر آرہیا اے۔ایہناں حالاتاں وچ ہن بزدار سرکار دی ذمے داری ودھ جاندی اے کہ اوہ اپنی کارکردگی توں ثابت کرے کہ اونھے شہباز شریف دا زور توڑ کے لوکائی نوں سکھالی دتی اے۔بزدار سرکار تے اونھاں نال جڑی بیوروکریسی کول ہُن بجٹ سنے کئی موقعے نیں کہ اوہ اپنے آپ نوں ہور مضبوط کرسکن۔ جے کر بزدار سرکار ہن عملاًلہور،سیالکوٹ،گجرات،راولپنڈی سنے نواز لیگ دا گڑھ سمجھے جان والے شہراں وچ ترقیاتی کماں دا جال وچھاوندی اے تے یقینی طور اتے ایہدے نتیجے وی پی ٹی آئی دے حق وچ برامد ہون گے۔

اپنا تبصرہ گھلو