اتحادی جماعتاں نے ہر مشکل وچ ساتھ دتا، تحفظات دور کراں گے: وزیراعظم

اسلام آباد: وزیراعظم عمران خان آکھیا اے حکومت اتحادی جماعتاں دے سارے تحفظات نوں دور کرے گی تے اوہناں نوں ہمیشہ نال لے کے چلے گی۔ تفصیلات دے مطابق وزیراعظم عمران خان دی زیر صدارت وفاقی کابینہ دا اجلاس ہویا جہدے وچ امریکا ایران کشیدگی، عالمی حالات تے ملک دی سیاسی و معاشی صورتحال دا وی جائزہ لیا گیا۔ وسیلیاں دے مطابق وفاقی کابینہ نے 16نکاتی ایجنڈے تے غور کیتا۔

وزارتاں، اداریاں تے متعلقہ محکمیاں دے انتظامی امور تے وی وزیراعظم نوں اجلاس وچ بریفنگ دتی گئی۔ وفاقی کابینہ نے اقتصادی رابطہ کمیٹی تے قنون سازی بارے کمیٹی دے فیصلیاں دی توثیق کیتی۔ اجلاس وچ پاک سعودی ایئر سروسز دے معاہدے ، ہیوی انڈسٹریز ٹیکسلا بورڈ وچ پروڈکشن کنٹرول دے ممبر تے پاکستان محتسب کراچی سیکرٹریٹ وچ انچارج ممبر دی تقرری دی منظوری دتی گئی۔ فاٹا تے گلگت بلتستان دے 4فیصد کوٹہ دی تقسیم تے رپورٹ کابینہ نوں پیش کیتی گئی۔

اجلاس وچ پی ایس او دے ایم ڈی تے سی ای او دی تقرری دا معاملہ موخر کر دتا گیا جد کہ مسلم لیگ (ن) دی نائب صدر مریم نواز دا ناں ای سی ایل وچ پان دا معاملہ زیر بحث نہیں آیا۔ اجلاس وچ نویں ایئر لائن ایئر سیال دی لانچنگ دی منظوری وی دتی گئی۔ذرائع دے مطابق کابینہ اجلاس وچ اتحادی جماعتاں دے تحفظات تے وی گل بات کیتی گئی۔ ایس موقع تے وزیراعظم عمران خان دا کہنا سی اتحادی جماعتاں نے ہر اوکھے ویلے سرکار دا ساتھ دتا، اوہناں نوں نال لے کے چلاں گے۔ وزیراعظم عمران خان دا کہنا سی اتحادی جماعتاں دے تحفظات ختم کرن لئی حکومتی کمیٹی بنائی جہدا اوہناں دے نال رابطہ اے۔ اسیں اپنے اتحادیاں دے تحفظات دور کراں گے۔

50% LikesVS
50% Dislikes

اپنا تبصرہ گھلو