سائیکل دوڑ
دلشاداحمد چن
کل دی گل جے نہیں پرانی
سائیکل دوڑ دی سنو کہانی
سجن بیلی ہو گئے کٹھے
اک دوجے دے پچھے نٹھے
ڈگدے ڈھہندے منزل پائی
سائیکل اینی تیز دوڑائی
تاڑیاں وجن نعرے وجے
سائیکل میرے کھبے سجے
سجناں دے وچ شان ودھائی
سائیکل اینی تیز دوڑائی
سائیکل رہیا سی تیز نساندا
ہارن گھنٹی رہیا وجاندا
کئیاں نس کے جان بچائی
سائیکل اینی تیز دوڑائی
چلی وانگ انھیری سائیکل
سبھ توں اگے میری سائیکل
پچھے رہ گئی سبھ لوکائی
سائیکل اینی تیز دوڑائی
جت دا جشن منایا سجناں
موڈھیاں اُتے چایا سجناں
ہو گئی ہور اُچیری سائیکل
سبھ توں اگے میری سائیکل
