کوئٹہ:دہشتگرداں دا فرنٹیئر کور دی ٹیم اُتے حملہ:4 شہید

راولپنڈی( پنجابی میڈیا گروپ) وطن دے دشمن بزدل دہشتگرداں دے حملے وچ مارگیٹ مائنز دی سیکورٹی اُتے فرنٹیئر کور دے4جوان شہادت دے رتبے اُتے فائز ہو گئے ۔پاک فوج دے شعبہ تعلقات عامہ(آئی ایس پی آر)دے مطابق فرنٹیئر کور دی ٹیم اُتے حملہ بارودی سرنگ دے ذریعے کیتا گیا۔ حملے وچ جونیئر کمیشنڈ افسر سنے4بہادر جوان شہید ہوئے۔آئی ایس پی آر دے مطابق شہیداں وچ صوبیدار سردار علی خان،سپاہی مصدف حسین،سپاہی محمد انور،سپاہی اویس خان شامل نیں۔ایف سی دے جوان مارگیٹ مائنز دی سیکورٹی اُتے موجود سن۔صوبیدار سردار علی خان دا تعلق ضلع لکی مروت دے گائوں وانڈا لنگرکیل نال اے جد کہ سپاہی مصدف حسین وہاڑی،سپاہی محمد انور ڈی آئی خان دے رہائشی جدکہ سپاہی اویس خان دا تعلق بانڈل ضلع نیلم نال سی۔آئی ایس پی آر دے مطابق دہشتگرداں دی تلاش لئی ایف سی بلوچستان دے علاقے وچ سرچ آپریشن جاری اے۔ بلوچستان وچ سخت محنت نال امن واستحکام قائم کیتا گیا، امن دشمناں دے ایسے بزدلانہ قدم بلوچستان دے امن نوں سبوتاژ نہیں کر سکدے۔ سیکیورٹی فورسز جاناں دے نذرانے دے کے امن دشمناں دے مذموم عزائم خاک وچ ملان لئی پرعزم نیں۔

اپنا تبصرہ گھلو